Nicolas Maduro po pranon urimet me rastin e fitores në zgjedhjet presidenciale në Venezuelë

Svetllana Kallmikova 
Në zgjedhjet presidenciale, që përfunduan në Venezuelë, fitues u bë Nicolas Maduro. Ai arriti të sigurojë në mbështetje të vet 50.66 për qind të votave të zgjedhësve. Ky rezultat është i mjaftueshëm për t'u bërë president i vendit.

Urimet e veta Presidentit të sapozgjedhur të Venezuelës ia shprehën tashmë Presidenti rus Vladimir Putin, udhëheqja e Kinës dhe liderët e vendeve të Amerikës Latine. Kandidati i opozitës, Henrique Capriles, nuk i njeh rezultatet e zgjedhjeve dhe kërkon me këmbëngulje rinumërimin e votave.

Mbështetësit e Nicolas Maduro janë përfshirë nga gëzimi dhe euforia: menjëherë pas shpalljes së rezultateve të zgjedhjeve në rrugët e Karakasit njerëzit filluan të shpërthejnë fishekzjarre shumëngjyrëshe. Në sheshin para Pallatit, ku mori fjalën Nicolas Maduro, nuk kishe ku të hidhje kokrrën e mollës.

Rivali i tij kryesor, Enrique Capriles, u mbështet nga 49.07 për qind e elektoratit. Megjithatë, sipas mendimit të tij, Maduro i humbi zgjedhjet. Opozita kërkon rinumërimin e votave, njofton nga Karakasi korrespondenti i Radiokompanisë "Zëri i Rusisë" Viktor Suhov:

- Opozita deklaron se ajo kërkon me këmbëngulje rinumërimin e të gjitha votave, një për një. Këto janë fjalët e Enrique Capriles. Deri tani opozitarët kundërshtojnë të pranojnë rezultatet e zgjedhjeve. Nëse do të llogarisim në shifra absolute, atëhere rezulton se Capriles mbeti pas Maduro, mbas numërimit të 99.12 për qind të votave, vetëm me 234.935 vota.

Kreu i Këshillit Kombëtar Elektoral të Venezuelës, Vicente Diaz, ka deklaruar se e mbështet propozimin për rinumërimin e votave, duke saktësuar njëkohësisht se nuk i vë në dyshim rezultatet e zgjedhjeve.

Megjithatë, siç venë në dukje ekspertët, opozita nuk ka praktikisht asnjë shans për të fituar zgjedhjet edhe pas rinumërimit të votave. I gjithë problemi konsiston në faktin se në Venezuelë vepron sistemi elektronik i votimit, tha Kryeredaktori i revistës "Amerika Latine" Vladimir Travkin:

- Nuk ka asnjë arsye që të mos i besohet rezultateve të zgjedhjeve. Unë dua t’ju kujtoj se në kohën e vet ish-Presidenti amerikan, Jimmy Carter, që vlerësoi rezultatet e zgjedhjeve të mëparshme në Venezuelë, të cilat i fitoi Hugo Chavez, deklaroi se në Venezuelë ekziston sistemi më i përsosur i zgjedhjeve në botë. Domethënë të gjitha votat e siguruara nga Nicolas Maduro janë fituar prej tij në mënyrë plotësisht të ligjshme. Le të presim edhe rezultatet e votimit të venezuelasve jashtë vendit. Ato mund të ndryshojnë disi hendekun midis rivalëve, por nuk ka gjasa të ndryshojnë rezultatin e vetë zgjedhjeve.

Nicolas Maduro nuk është aspak kundër rinumërimit të votave. "Ne e mirëpresim këtë gjë. Ne nuk duam dhunë, ne dëshirojmë paqe", - deklaroi Presidenti i sapozgjedhur i Venezuelës.