Filma kundër të gjitha klisheve

Seksi, dhuna, mobing në internet - asnjë temë nuk është tabu për regjisorët e rinj të Projektit Medial Wuppertal. Me videot e tyre nxënësit dhe studentët kanë iniciuar shumë debate dhe kanë fituar çmime.

Projekti Medial Wuppertal - diskutim mes migrantëve në një kinema në Wuppertal në premierën e dokumentarit "Të rinj dhe myslimanë në Gjermani"

Studim, dashuri, muzikë pop - bota e 22-vjeçares Yasemin është e larmishme dhe e re, plot ide dhe përshtypje të reja. Një botë në nisje dhe jo botë e harresës. Por pikërisht kjo temë e ka interesuar. "Doja të dija se çfarë ndodh kur njerëzit humbasin kujtesën dhe çfarë do të thotë kjo për familjet e tyre." E pikërisht për familje me origjinë turke, në të cilat shpesh jetojnë nën të njëjtën çati tre breza. Atë kulturë Yasemin e njeh mirë. Ajo vetë vjen nga një familje gjermano-turke.

Dokumentari i Yasemin Markstein për turke të sëmura me demencë, tregon tre breza të një familje

Për dokumentarin e saj më të ri ka filmuar me kamera të moshuar, të sëmurë me demencë. Ajo i tregon ata në divanin e dhomës së ndenjes, me vajzat e tyre gjatë ushtrimeve të gjuhës turke kundër harresës. Ajo i filmon në krevat me fotografinë e babait në dorë, të cilën e përkëdhelin me ëmbëlsi, pasi arrijnë ta njohin. Dhe Yasemin flet me të afërmit për shërbimin e lodhshëm, frikërat dhe agresionin.
"Ky është një film që më prek shumë personalisht", thotë Yasemin. Dhe për të cilin ajo ka arritur më në fund pjekurinë e duhur pas rreth 25 prodhimesh në Projektin Medial në Wuppertal.
Një zë për të rinjtë
Prej gjashtë vjetësh angazhohet regjisorja e re në punishten për video të të rinjve, e cila në 27 tetor feston 20-vjetorin e themelimit. Një mësuese i pati treguar asaj për Projektin Medial. Bashkë me pesë shokë të klasës Yasemin xhiroi një film të shkurtër mbi temën seksualitet dhe sqarim. Sot ajo prodhon dokumentarët e saj, ndihmon të rinj të tjerë nga mosha 14 vjeç gjatë prodhimit të filmave dhe sapo ka nisur studimet në shkollën e lartë të filmit në Köln.
Një karrierë disi e pazakontë, mendon drejtuesi i Projektit Medial, Andreas von Hören. "Pjesa më e madh e rreth 500 të rinjve që çdo vit xhirojnë këtu plot 150 video, e bëjnë këtë vetëm një ose dy herë." Projekti nuk ka si qëllim përgatitjen e talenteve të reja. "Ne u japim të rinjve një zë për temat e tyre me mediumin film", thekson pedagogu për mediet. Por këtë e bëjmë në nivel profesional pasi filmat që lindin në Projektin Medial shpesh arrijnë tek një publik i gjerë.
Interes i madh brenda dhe jashtë vendit

Andreas von Hören

Çdo dy muaj në kinemanë më të madhe të Wuppertal-it zhvillohet një premierë e prodhimeve më të reja, që pasohet nga një diskutim. Më pas dokumentarët janë disponibël si DVD në qendrat për të rinjtë, shkolla apo qendrat e këshillimit. Me shitjen e tyre, Projekti Medial financon një pjesë të madhe të filmave të tij, pasi dokumentarët ndërkohë kërkohen në të gjithë hapësirën gjermanishtfolëse dhe edhe nga shkolla jashtë vendit. "Këtu të rinjtë shpjegojnë këndvështrimin e tyre për të gjitha temat që u interesojnë dhe kjo është mjaft e veçantë në nivel ndërkombëtar", thekson von Hören.

Një bashkëpunëtore e Projektit Medial Wuppertal gjatë xhirimeve për dokumentarin "Përshëndetje luftë" në 2003.

Integrimi, seksualiteti, dhuna, ekstremizmi i djathtë, varësia apo mobing në internet, asnjë temë nuk është tabu. Andreas von Hören me ekipin e tij prej 25 pedagogësh të medies dhe regjisorë, kujdesen që të tregohen këndvështrime të ndryshme dhe që të mos cënohen rregullat për mbrojtjen e të rinjve. Shumë filma janë nderuar tashmë me çmime, për shembull seria e dokumentarëve "Përshëndetje luftë", në të cilën të rinj gjermanë, irakianë dhe amerikanë shprehnin mendimin e tyre për luftën e Irakut në vitin 2003.
Integrimi - Temë e përhershme
Edhe seriali "Të rinj dhe myslimanë në Gjermani" tërhoqi shumë vëmendje. Aty të rinjtë tregojnë për jetën e tyre të përditshme si myslimanë, diskutojnë besimin e tyre, polemizojnë për shaminë e kokës apo rolet e gjinive në shoqëri. "Temat rreth integrimit luajnë një rol të rëndësishëm që prej themelimit të Projektit Medial", thotë von Hören. Kjo nuk është e çuditshme pasi në Wuppertal rreth 28 për qind e popullsisë ka sfond migracioni. Filmi i Yaseminës për demencën në familjet me origjinë turke është megjithatë dokumentari i parë në dy gjuhë i Projektit Medial. "Ne duam të arrijmë edhe turqit më të moshuar", thotë Yasemin.
Se sa shumë i prek kjo temë familjet me origjinë turke u bë e qartë që në premierën e filmit. "Papritur një ngrua u ngrit në këmbë duke qarë në kinema dhe thirri: ju lutem më ndihmoni, unë e kam vetë këtë hall", tregon Yasemin Markstein. Edhe vetëm për këtë moment puna e saj ia ka vlejtur. "Me filmat e mi mund të ndryshoj diçka dhe kjo më bën krenare", thotë studentja.