“Dy gishtat”, Rama: Shëmti, do i heqim. Berisha: Rama njëlloj si Ramiz Alia, dy gishtat i duken bajonetë

Pak pas deklaratave të Ramës lidhur me monumentin me dy gishta në qendër të Kavajës, ka reaguar edhe kryeministri Berisha. Në një takim me të rinjtë në Bërzhitë të Tiranës, Berisha tha se Ramës i duken dy gishtat si bajonetë, njëlloj si Ramiz Alisë.

“Me këta gishtërinj përpjetë nisëm rrugën e Europës, rritëm ekonominë shqiptare 400 herë, morëm anëtarësimin në NATO. Edi Rama bllokmen deklaroi në Vlorë se dy gishtërinjtë janë bajoneta

që u është ngulur në sy shqiptarëve. Rama është njëlloj si Ramiz Alia, dy gishtat i duken si bajonetë. Ramës gishtrinjtë tuaj i duken bajoneta, trikoja ime i duket pazmore ndërsa nesër stilografi im do t’i duket shpatë, furrë që do e përvëlojë, ne do ecim përpara”- tha Berisha.

Në një takim me gazetarët më herët në mëngjes, krysocialisti tha se ai monument është një shëmti nga ana estetike si dhe theksoi se demokracinë nuk e solli Sali Berisha. Rama shprehu angazhimin për rindërtimin e sheshit “Demokracia” të Kavajës.

“Ne do e ndërtojmë sheshin dhe do i japim Kavajës përmasat e një qyteti mesdhetar dhe t’i japim atij komuniteti një shesh me dimension tjetër do jetë sërish sheshi “Demokracia”, por ai monument është siç e tha kryetari i Bashkisë së Kavajës, nuk është tamam monument, nuk janë tamam as dy gishta dhe ajo është një farsë. Nuk i takon Saliut të vendosë së çdo bëjë me monumentin kur Kavaja drejtohet nga Elvis Roshi dhe për më tepër që kryeministri ende në detyrë ka thënë se asnjë fond nuk jap për këtë qytet unë, përderisa Kavaja zgjodhi atë si kryetar bashkie

Çështja e monumentit në qendër të Kavajës, është kthyer në një debat publik mes Berishës, liderit të opozitës Rama dhe krybashkiakut Elvis Roshi.