-Ishte nder i veçantë të përfaqësoja Shtetet e Bashkuara të Amerikës në
Republikën e Shqipërisë gjatë disa prej viteve më të vështira të
historisë pas komuniste të saj. Shqiptarët kanë një trashëgimi krenare
dhe i përkasin një civilizimi të hershëm; ata janë luftëtarë trima, që,
sipas traditës së Skënderbeut, luftojnë kundër shtypjes. Sot kjo do të
thotë që Shqipëria është përkrah Shteteve të Bashkuara të Amerikës dhe
vendeve të tjera të NATO-s në Afganistan. Shqiptarët janë të njohur për
bujarinë dhe mikpritjen, tipare që pata rastin t’i shoh nga afër gjatë
fluksit të madh të refugjatëve nga Kosova në vitin 1999. Shumë shqiptarë
hapën dyert e shtëpive dhe strehuan njerëz të panjohur që po i
largoheshin shtypjes – ashtu siç shqiptarët kishin bërë edhe gjatë
Luftës së Dytë Botërore. Po ashtu unë pata rastin të shoh shpirtin
shqiptar të pavarësisë, që çoi në shpalljen e pavarësisë nga Perandoria
Osmane 100 vjet më parë, e mbështetur me krenari nga Presidenti Udrou
Uilson. Në historinë më
moderne, i njëjti shpirt pavarësie ka çuar në
krijimin e shumë partive politike dhe në konflikt politik, në periudhën
pas viteve 1990 e deri sot. Shqipëria dhe Shtetet e Bashkuara të
Amerikës ndajnë të njëjtat ideale për lirinë. Në Shtetet e Bashkuara ne
kemi punuar për t’i kthyer këto ideale në realitet për më shumë se 200
vjet dhe ende nuk i kemi arritur të gjitha synimet tona. Shqiptarët kanë
qenë të lirë të punojnë për këto ideale për një kohë shumë më të
shkurtër, kështu që kur njerëzit më pyesin në se unë jam optimiste për
të ardhmen e Shqipërisë, unë përherë përgjigjem PO. Shikoni sa shumë
keni arritur. Nëse shqiptarët e thjeshtë janë aq bujarë sa të mirëpresin
të huajt, unë kam besim se klasa politike shqiptare do ta gjejë rrugën e
saj drejt të ardhmes, ndonëse shpresoj që për këtë nuk do të duhen 100
vjet të tjerë. Kam vetëm një gjë tjetër që dua shtoj: unë lashë një
pjesë të zemrës time në Shqipëri dhe ky vend do të jetë përherë shumë i
veçantë për mua.
No comments:
Post a Comment