Pushtimi italian i Shqipërisë në karikaturat e kohë

Një mjet për ta shprehur kundërshtinë ndaj agresorëve ishin edhe karikaturat, të cilat paraqisnin në një mënyrë më eksplicite, thumbuese dhe artistike, synimet ekspansioniste dhe arrogancën e dy diktatorëve të kohës, por edhe bashkëpunimin e heshtur të Britanisë

Pushtimi italian i Shqipërisë është një nga ngjarjet më të rëndësishme dhe njëkohësisht më fatkeqe në historinë e Shqipërisë, çka ndërthur në vetvete edhe një seri interesash të pisëta që u luajtën në atë kohë në kurriz të një populli të vogël e të pambrojtur, anëtar themelues të Lidhjes së Kombeve. Kësisoj nga studimi i shumë materialeve dhe artikujve të shtypit të kohës, ndjehet më së miri, sidomos në mediat e vendeve demokratike perëndimore dhe ato të majta, një ndjenjë e dukshme refuzimi dhe revolte ndaj këtij hapi si dhe solidariteti me popullin shqiptar. Një mjet për ta shprehur këtë ishin sigurisht edhe karikaturat, të cilat,
përkrah përmbajtjes së teksteve të artikujve dhe fotove, paraqisnin në një mënyrë më eksplicite, thumbuese dhe artistike, synimet ekspansioniste dhe arrogancën e dy diktatorëve të kohës, Benito Musolini dhe Adolf Hitler, por edhe neglizhencën, bashkëpunimin në heshtje dhe pasojat e poltikave të dështuara britanike, që u kishin bërë deri në atë kohë konçesione të mëdha Italisë dhe Gjermanisë duke viktimizuar popujt e vegjël. Nga një skanim i vëmendshëm i shtypit të kohës në Francë, Europë e më gjerë, po sjellim për lexuesin e gazetës DITA, një përzgjedhje karikaturash me diçiturat dhe shpjegimin përkatës, përkrah disa fotove të përzgjedhura e të pabotuara më parë. A.P.

Karikaturë në mediat amerikano-latine, ku satirizohet roli negativ dhe neglizhenca britanike kundrejt hapave të Italisë. Në diçiturën origjinale shënohet: Italia pushton Shqiëprinë: Firma është në letër dhe unë të garantoj për integritetin e territorit tënd.

Një karikaturë në shtypin e kohës në Francë, e cila satirizon pretendimet e ditëve të para të pushtuesve italianë ku thuhej se “Populli na priti me qetësi”. Karikatura shprehte solidatitetin me popullin shqiptar dhe në këtë kontekst vihej në dukje më shumë agresiviteti dhe armatosja deri në dhëmbë e trupave pushtuese, përballë një populli të pambrojtur e të viktimizuar

Karikaturë në shtypin francez, e cila ironizon pretendimet italiane se kishin ardhur në qetësi dhe se ishte populli shqiptar që i kishte kërkuar. Duken qartë viktimat e bombardimeve mbi kryeqytetin shqiptar, sipas perceptimit dhe idesë së autorit

Anonçimi i numrit të radhës në gazetën “L’Humanite”, 8 prill 1939, që i kushtohej në pjesën më të madhe Shqipërisë

Hartë e kohës, botuar në shtypin francez, që ilustron strategjinë e pushtimit italian të Shqipërisë

“Le Petit Parisiene”, 9.4.1939: Bedri Pejani flet në një tubim të mërgatës politike shqiptare në Paris ( botohet për herë të parë)

Ish-lideri komunist francez, Justin Godard, flet në Paris, në një tubim solidarizues me popullin shqiptar, kundër pushtimit Italian. “Le Petit Parisiene”, 9.4.1939.

Karikaturë në shtypin francez, në ditët e para të pushtimit Italian të Shqipërisë. Në diçiturë shkruhet: “Dy këmbana që nuk dëgjohen. – Po: Këmbana alarmi“, duke aluduar qartë për pretendimet e rreme dhe propagandën false nazifashiste të kohës.

Luftëtarë shqiptarë duke pritur pushtimin me luftë ( botohet për herë të parë) , marrë nga shtypi amerikano-latin