Friday, November 15, 2013

Armët kimike, Rama-qytetarëve: Nuk i pranojmë. I pamundur asgjësimi në Shqipëri

PROTESTA KUNDËR ARMËVE KIMIKE, BESIMTARËT MYSLIMANË FALEN NË SHESH
Falen per armet kimike
Ora 14:30
Kryeministri i vendit, Edi Rama i ka dhënë fund ankthit të mijëra shqiptarëve që prej disa ditësh protestuan për t’i thënë “Jo" armëve kimike të Sirisë në Shqipëri. Në një konferencë për shtyp, kryeministri Rama ka deklaruar se Shqiperia nuk do te perfshihet në operacionin e shkatërrimit të lëndeve kimike të Sirisë.


"Me respektin me të madh ndaj shqiptarëve ju them të gjithëve se “JO”, nuk do të përfshihemi në këtë operacion" - kështu iu drejtua kryeministri Edi Rama të gjithë shqiptarëve që po prisnin vendimin para kryeministrisë.

Rama sqaroi se kur u vu ne konktakt iu kerkua konfidencialitet, cka e detyroi te mos fliste publikisht per diskutimet qe po zhvilloheshin ne kuader te asgjesimit te arsenalit kimik te Sirise. Kryeministri garantoi se nuk do e tradhetonte kurre popullin e tij.

Një ditë më parë News24, duke iu referuar burimeve nga qeveria, paralajmëroi se kryeministri do t'e refuzonte qe armët e Sirisë te shkaterroheshin ne Shqiperi.

FJALA E PLOTE E KRYEMINISTRIT RAMA
"Në 11 shtatorin e saposhkuar, kur i’u drejtova parlamentit për programin e qeverisë së re, e nisa fjalën time me tragjedinë e kullave binjake dhe barbarinë e regjimit vrastar në Siri.Ishte koha kur armët kimike të Assadit kishin bërë një kërdi që tronditi botën dhe çdonjërin nga ne po ashtu. Shtetet e Bashkuara, Franca, Britania e Madhe, shpallën përgatitjen për sulmin ushtarak ndaj Sirisë. Në përputhje të plotë me boshtin strategjik të politikës së jashtme të Shqipërisë, si edhe me programin e ri qeverisës, unë theksova se Shqipëria do të ishte, si gjithnjë, “në krah të Amerikës dhe çdo aleance që Shtetet e Bashkuara do të ngrenë, në çdo front ku kjo luftë mund ta kërkojë”. Rrjedha e mëtejshme e ngjarjeve çoi në Rezolutën e Kombeve të Bashkuara për çarmatosjen pa luftë të regjimit sirian, përmes shkatërrimit të arsenalit kimik të regjimit kriminal të Asadit. Këtë rezolutë e mbështeti plotësisht dhe Shqipëria, në përputhje të plotë me nderin e me dinjitetin tonë si vend i angazhuar botërisht, për të kontribuar për lirinë, demokracinë, paqen, kudo në botë.

Më pas, u kontaktuam drejtëpërdrejtë nga aleati dhe partneri ynë i madh, Shtetet e Bashkuara, për të konsideruar në parim pjesëmarrjen bashkë me vende të tjera në operacionin e shkatërrimit të arsenalit kimik të Sirisë. Dhe përgjigja jonë, ashtu si përgjigja e një sërë vendesh të tjera, ishte ajo që imponon historia jonë e këtyre njëzet e tre viteve; boshti strategjik i politikës sonë të jashtme, pa dallime partiake deri dje paradite; detyrimi ynë për të qenë në krah të aleatëve tanë më të mëdhenj, në çdo përpjekje madhore për një botë më të mirë dhe, padyshim, vetë interesi ynë kombëtar që është pazgjidhshmërisht i lidhur me marrëdhënien tonë speciale me Shtetet e Bashkuara: Po, në parim ne jemi të gatshëm të përfshihemi në këtë operacion si pikë mbështetjeje në Mesdhe, por nuk kemi asnjë kapacitet të brendshëm për të marrë pjesë në të drejtëpërdrejtë. Prandaj gjithçka që lidhet me transportin, teknologjinë, ekspertizën, duhet ta marrin përsipër Shtetet e Bashkuara dhe vendet e tjera. Siç është plotësisht e natyrshme, na u kërkua konfidencialitet i plotë sepse procesi i organizimit të operacionit ishte vetëm në fazën e vet më fillestare, atë të vendosjes së kontakteve në parim.

Lejomëni të dashur bashkëqytetarë, t’ju pyes lidhur me këtë moment të parë të rrëfimit tim, tërësisht të sinqertë para jush: A mund dhe a duhet t’u thoshte jo në parim Shqipëria Shteteve të Bashkuara, për një përpjekje kaq madhore në shërbim të njerëzimit? A mund të imagjinohej dhe të imagjinohet se Shtetet e Bashkuara i kanë hyrë kësaj përpjekjeje, për t’ia hequr armët kimike nga duart një vrasësi dhe pastaj për të vrarë me to Shqipërinë, apo cilindo vend tjetër aleat të përfshirë në këtë përpjekje? A mundet që një mendje normale, sado armiqësore ndaj Amerikës, të shkojë deri në pikën se Shtetet e Bashkuara, do ta udhëhiqnin një operacion të tillë në sytë e gjithë planetit, për të çuar në vendet aleate vdekje e shkatërrim, duke vrarë në radhë të parë trupat e tyre të ekspertëve dhe vetë veten e tyre para tërë ekraneve të botës? Nuk po ju them që të shkatërrosh armë kimike është njësoj si të hash karamele.

As po përpiqem t’ju them se shkatërrimi i armëve kimike në Shqipëri është diçka që duhet të na bëjë të ndjehemi qetësisht të kënaqur, siç besoj do të ndjehej kushdo që do ta shihte këtë gjë të ndodhte larg vendit ku jeton vetë. Po ju them vetëm se po, kjo është pjesa e vështirë e të qenit të angazhuar kundër armiqve të njerëzimit dhe në krah të Shteteve të Bashkuara e të vendeve të aleancës euroatlantike.

Kjo është pjesa e vështirë e një marrëdhënieje strategjike nga e cila ne, shqiptarët, duhet ta dimë më mirë se shumë të tjerë që kombet dhe vendet marrin më shumë se ç’janë në gjendje të japin. Sepse tamam kjo, është ajo pjesa e vështirë pa të cilën sot Sllobodan Miloveshiçi mund të ishte ende në qafën e gjysmës së kombit tonë ndërsa ne shqiptarët e Shqipërisë s’do ishim jo në NATO, po në asnjë lloj refeneje ndërkombëtare.
Sidoqoftë unë e di fare mirë që sot, pakkush dëshiron të kujtohet për bombat e Amerikës që çliruan gjysmën e kombit tonë dhe shumëkush mund të jetë përqeshës, nëse shtoj këtu se pa pjesën e vështirë jeta, vendi, bota, nuk bëhen dot kurrë më të mira.
Prandaj po rikthehem tek bombat e Asadit, të cilat sipas tribunës së Partisë Demokratike dhe disa burimeve të helmatisura keqaz të informimit, një njeri po aq i çmendur sa Asadi, kryeministri i Shqipërisë, kërkon t’i plasë në Shqipëri.

E në këtë pikë dua t’i shoh në sy, drejtëpërdrejtë, të gjithë. Me radhë. Në radhë të parë ata, të gjithë ata, që më dhanë besimin e tyre të paçmueshëm në 23 qershor, e që sot janë të frikur e të shqetësuar përpara skenarëve të një apokalipsi mbi Shqipërinë. Këta skenarë haluçinantë kanë kallur gjithë këto ditë në mendjen tuaj ultësisht, poshtërisht, kafshërisht, politikanë pa din e iman që vetëm Shqipërinë nuk duan, pronarë mediash të zhytur në pazare e borxhe që kanë humbur shtigjet e privilegjeve të tyre të deridjeshme apo të tjerë, ca me qëllim e ca nga padija, që janë turrur t’i hedhin benzinë zjarrit të imagjinatës suaj duke nxjerrë nga goja gjithëfarë monstruozitetesh e absurditetesh.

Ju që më votuat për ëndrrën e Rilindjes së këtij vendi, që më mbështetët në kohë të vështira dhe që më sollët në zyrën e kryeministrit për të mos u vrarë më kurrë në bulevard nga dritaret e kësaj godine; për të mos u shkelur më kurrë në interesat legjitime të familjes suaj dhe të atdheut tonë të përbashkët; për të mos mbetur më vrima e fundit e kavallit në qeverisjen e këtij vendi; Ju prindër e gjyshër, vajza e djem, kudo në Shqipëri e jashtë Shqipërisë, që sot prisni me zemër të dridhur çfarë do t’ju them për gjithë tmerret dhe shpifjet që ju kanë dëgjuar veshët këto ditë;

Ju të reja e të rinj që dje përzutë nga protesta juaj ata që na e lanë Shqipërinë të sakatuar nga të katër anët, të zhytur në borxhe e në plehra, dhe që sot vazhdoni të protestoni nën dritaren time; Të gjithë ju, 1 milionë njerëzit që e kthyen 23 qeshorit në referendumin e madh popullor kundër plehrave dhe importit të plehrave, mësojeni sot dhe ju lutem përulësisht të mos e harroni kurrë deri ditën kur do të më mbani në këtë detyrë:
Unë nuk do t’ju tradhëtoja kurrë për asnjë interes e asnjë çmim dhe asnjëherë, për asnjë arsye, nuk do të bëja pas shpinës suaj asgjë që do të cënonte qoftë edhe një fije jetën, sigurinë, të ardhmen tuaj. E po ashtu kurrë, në asnjë rast të ngjashëm dhe për asnjë qëllim sado të lartë, siç është ky i çarmatimit të një kanibali që ka zhdukur si insekte 100 mijë njerëz si ju, unë nuk do të merrja një vendim pa e ndarë atë me ju, pa shkuar në parlament për të marrë votën e të zgjedhurve tuaj, pa pasur paqe në shpirtin tim për shkak të trazimit të shpirtit tuaj.
Por dëgjojeni me vëmendje, as unë nuk do ta merrja këtë vendim pas shpinës suaj dhe as ma ka kërkuar kush që ta bëj një gjë të tillë për çështjen në fjalë.

Ju’a kam thënë të gjitha këto më parë. Ju’a thashë edhe konkretisht për këtë çështje dy herë, edhe ditët e fundit. Por zhurma ishte shumë e madhe dhe shqetësimi i kallur brenda jush nga skenarët e sajuar të tmerrit, ishte shumë i thellë për t’u dëgjuar fjalët e mia të pakta.

Po atëherë pse s’ju thashë dot më shumë? Pse nuk ju tregova dot për çfarë po diskutohet mes nesh dhe aleatëve tanë të mëdhenj? Pse nuk e bëra më parë të ashtuquajturën transparencë të kaqkeqpërfolur nga ata që deri dje, ju jepnin plumbin ballit dhe ju quanin llumi i shoqërisë? Lejomëni atëherë, ta vazhdoj rrëfimin tim sot që e kam të mundur ta bëj një gjë të tillë dhe t’ju shpjegoj pse e kam pasur të pamundur deri mbrëmë.

Ky të dashur miq është një operacion i komplikuar, sa civil aq edhe ushtarak, dhe si i tillë përgatitja e tij nuk mund të jetë subjekt debati publik. Kjo nuk ndodh në asnjë vend serioz, ku qeveria, publiku dhe parlamenti thirren në debat vetëm kur ka një plan operacional e jo gjatë ndërtimit të planit operacional.  Por, për më tepër, dua t’ju siguroj sot se në gjithë procesin e diskutimeve intensive të gjithë këtyre javëve, ne jemi përqëndruar me vëmendje e vullnet të madh përmes një grupi teknik, duke kërkuar nga ekspertiza e partnerëve përgjigje për çdo pyetje të ngritur nga ambientalistët, çdo shqetësim të shprehur nga ju, çdo argument ekspertësh apo pseudoekspertësh që ngrinin peshë mendjen tuaj nga ekranet e faqet e gazetave.

Ndërsa unë jam përpjekur me shumë vullnet e pasion, të marr jo vetëm sigurinë e plotë për moscënimin e asnjë fijeje floku dhe mosmbetjen e asnjë mbetjeje në territorin shqiptar, po njëkohësisht edhe mirëkuptimin që në këtë përpjekje të madhe të fuqive të mëdha, supet e vogla të Shqipërisë të mos ngarkoheshin përtej mundësive të tyre. Kemi gjetur përgjigje të njëpasnjëshme, kemi marrë garancira të njëpasnjëshme, por është dashur kohë. E ndërkohë, përveç gatishmërisë në parim, siç ju kam thënë, nuk kam marrë asnjë angazhim përfundimtar, për ta çuar këtë çështje për vendim para qeverisë e Kuvendit të Shqipërisë.

Sepse kam qenë gjithë kohën i vetëdijshëm se nëse do ta hidhja këtë hap, duhet të kisha bindjen më të plotë jo vetëm tek garancia plotë e sigurisë teknike, por edhe tek përfitimi që shoqëria jonë, vendi ynë, kombi ynë meritonte të nxirrte nga ky kontribut fantastik për mbarë njerëzimin. Më vinte sot përmes dritares thirrja e përsëritur e protestuesve, “E duam Shqipërinë si gjithë Europa!”, dhe lejomëni t’jua them sot, hapur, në sy, se për këtë jam përpjekur tërë këto ditë e netë diskutimesh.

Këtë u kam përsëritur papushim miqve tanë të mëdhenj amerikanë dhe europianë, duke u thënë: Na ndihmoni t’i tregojmë Europës se ne jemi pjesë e saj dhe jo një kosh plehrash në mes të Europës! Na ndihmoni të dalim më të pastër e më të fortë nga kjo histori që edhe ne t’ju ndihmojmë me çfarë kemi mundësi!Na ndihmoni të kontribuojmë për të mirën e njerëzimit, duke kontribuar edhe ju për të mirën e njerëzve tanë!Dua t’i pyes ata që me plot të drejtë thërrisnin sot, “E duam Shqipërinë si gjithë Europa”, a e dinë që në Shqipëri ka 31 zona të rrezikshme mbetjesh kimike të trashëguara nga e kaluara, të cilat nuk plasin po vrasin ngadalë?

Janë zona që dihen prej vitesh, të shenjuara në listën e zezë të planetit, po Shqipëria e varfër, ashtu si çdo vend i varfër në këtë botë, nuk mund të lerë pa paguar rrogat e pensionet për të pastruar mbetje të tilla që kushtojnë qimet e kokës. Një nënë e re nga një pikë e tillë në Elbasan më çonte një mesazh, “O kryeministër, në fshatin tonë ka fëmijë me tumor çdo vit kurse ti do me na i vra krejt fëmijët”. Ky ishte njëri nga mesazhet që u lexova partnerëve tanë gjatë diskutimeve dhe në fund, të gjithë ranë dakord se Shqipëria e meritonte me patjetër që ekspertët më të mirë të botës, bashkë me teknologjinë më të shkëlqyer për mbetjet kimike, të mos shkuleshin nga Shqipëria me të mbaruar punë me mbetjet e Asadit - po të vazhdonin punën në Patos-Marinzë, Ballsh, Fier, Elbasan, Rubik, Laç, Berat, Lushnjë, Bajzë, Rrëshen, Fushë Arrëz, Prrenjas, Burrel, e me radhë të tjera, për të mbaruar punë njëherë e mirë, edhe me mbetjet e rrezikshme të pesëdhjetë vjetëve komunizëm, plus njëzet vjet barbarizëm mjedisor.

U kërkova edhe pastrimin e mbetjeve të mëdha inerte në gryka lumenjsh, nëpër rrugët kombëtare e nëpër plazhe dhe pak nga pak, u mirëkuptuam. Po ashtu më në fund u mirëkuptuam edhe për kushtin e panegociueshëm të tërheqjes nga Shqipëria, të të gjitha mbetjeve që do të prodhonte faza e dytë e shkatërrimit të armëve kimike siriane. Sepse o miq, në Shqipëri nuk do të na mbërrinin bombat e famshme të cilat çmontohen në Siri, po lëndët kimike të nxjerra prej tyre (pra jo fishekët po baruti).

Ndërsa djegia dhe varrosja e mbetjeve pas trajtimit të lëndëve që do të vinin këtu, të bëheshin gjetkë, në vende të tjera. Kështu mbi tokën e Shqipërisë nuk do të mbetej më absolutisht asnjë thërrime lëndë kimike. Siç po mundohem t’jua rrëfej të vërtetën me përpikmëri ndaj fakteve dhe besnikëri absolute ndaj jush, në gjithë këtë proces unë ju kam përfaqësuar ju dhe Shqipërinë, me respektin më të madh për Shtetet e Bashkuara po edhe përunjësinë më të plotë për interesin tonë kombëtar e publik. E me besnikëri ju rrëfej se ashtu siç ju ka munduar juve, të gjithëve, përditë e më shumë, pyetja po pse vetëm Shqipëria(?), më ka munduar edhe mua.

Po në asnjë mënyrë jo sepse kam dyshuar ndonjë çast tek shfrytëzimi imperialist, siç për turpin e Shqipërisë kanë vënë kujën larteposhtë nëpër ekrane e gazeta, disa personazhe si ata të Kinostudios Shqipëria e Re kur luftonin nëpër filma kundër bazave sovietike; Jo, kjo pyetje më ka munduar sepse Shqipëria që na kanë lënë është lehtësisht e atakueshme si një vend i varfër dhe i mbushur me plehra, e prandaj, edhe përfshirja e Shqipërisë si stacioni i vetëm më është dukur pengesa më e madhe. Fakti është se tërë atë lumë poshtërues që u derdh nëpër media ndërkombëtare për ne si një vend plehrash, e prodhoi pikërisht e vërteta se duke qenë vërtet e mbushur me plehra, Shqipëria kishte një kosto të caktuar nga publiciteti negativ i një operacioni të tillë.

E kam ndarë me shumë sinqeritet me partnerët këtë pyetje. Me të njëjtin shqetësim si ju, jam përpjekur të shpjegoj se kjo pyetje e mundimshme kërkonte më shumë se sa përgjigjen e njohur, plotësisht të vërtetët e legjitime, që Shtetet e Bashkuara e shohin Shqipërinë si një aleat shumë besnik; e në fund të fundit s’po kërkojnë asgjë nga Shqipëria përveç një pike mbështetjeje në tokë – një bazë ushtarake tërësisht të izolur në dispozicion të tyre ku lëndët vijnë, asgjësohen dhe ikin për t’u djegur e varrosur gjetkë. Jashtë Shqipërisë.Por as rritja e përgjithshme e tensionit këtu në vend, me ushqimin 24 orë në 24 të një pjese të medias ( e cila nuk u mjaftua me pasqyrimin e protestës qytetare, po u bë llogorja e hedhjes së një helmi pabesisht çoroditës për qytetarët ) dhe as afati që praktikisht skadon sot për një angazhim se Qeveria e Shqipërisë do konsiderojë rrugën e miratimit ligjor të këtij operacioni, nuk na dhanë më shumë mundësi e kohë për të ezauruar këtë aspekt shumë delikat.

E këtu tani, u vjen natyrshëm radha paraardhësit tim si edhe atyre që shkruan kapitullin më të turpshëm të marrëdhënieve shqiptaro – amerikane, duke e çarë dje, për herë të parë në dy dekada politikën shqiptare në raport me Shtetet e Bashkuara, dhe duke e kthyer parlamentin në një skenë skizofrenie politike ku partneri ynë më i madh u trajtua njësoj si të ishte Asadi; Dhe ku mbeti pa u thënë vetëm që Asadi do që të shfarosë sirianët, kurse Presidenti Obama do që të shfarosë shqiptarët. Unë e di sa ju dhemb zonja e zotërinj opozitarë jo thjesht humbja e 23 qershorit, po ende më thellë, sa ju dhemb humbja e pushtetit mbi paratë e shqiptarëve dhe goditjet e njëpasnjëshme që po merr bota e ulët e krimeve ekonomike, të cilën e ndërtuar si një mallkim damkosës në trupin e Shqipërisë.

Por që dhimbja juaj të ishte kaq e madhe, sa të kapeshit pas Asadit dhe bombave të tij, për të qëlluar me histeri edhe Amerikën përveçse qeverinë e mua personalisht, këtë vërtet nuk ma tha asnjëherë imagjinata. Ashtu siç nuk e mendoja dot se ju, që hodhët verbërisht në erë një copë Shqipërie, duke vrarë 26 shqiptarëve të pafajshëm dhe përvëluar qindra familje, do të guxonit të shkonit aq larg sa të bëni thirrje që të mos na përsëritet Gërdeci! Po pse, Shtetet e Bashkuara e shkaktuan Gërdecin, o “derra të kënaqun” migjenianë që sot luani rolin e “Sokratëve të përvuejtun” për këtë popull të cilin e latë rrugëve, mes plehrave, borxheve e përbuzjes së botës?

Po pse, biznes për djalin tim dhe për biznesmenët e panginjur të oborrit tuaj, është ky operacion humanitar o ju që në Gërdec, i çmontonit armët me nëna të dëshpëruara e Lula të vocërr të varfërisë që e mbollët si sëmundje rreth Tiranës e në çdo cep të Shqipërisë?
Po pse, çfarë janë Kombet e Bashkuara, çeta juaj e zullumqarëve që vazhdon rend pas një të marri, i cili, pasi e ktheu Shqipërinë në një kosh plehrash importi, nxjerr Lulin e vet të vocërr të zullumeve të mëdha për të kërkuar referendum popullor kundër Amerikës?
Nguleni në kokë sot dhe deri kur nuk do ta lini plakun në vetminë e vet, se referendumin popullor kundër plehrave Shqipëria e bëri në 23 qershor. Ku e keni vendimin që thatë se ishte marrë pas shpinës së shqiptarëve dhe do shpallej sot, të premten?
Asnjë vendim s’është marrë, sepse asnjë vendim nuk mund të merrte Shqipëria pa ata 1 milionë të cilët e bënë njëherë referendumin kundër plehrave dhe pa ato gra e burra që janë përfaqësuesit e 1 milionë shqiptarëve në parlamentin e vendit.

Në këtë pikë dua t’ju them tani gjithë shqiptarëve, të mos lejojnë askënd të tallet me ta përmes krahasimit të shëmtuar mes plehrave që e mbytën Shqipërinë për biznes deri në 23 qershor, dhe lëndëve kimike të një lufte të njerëzimit kundër armiqve të tij të betuar.
Ju fola në fillim për pjesën e vështirë të rreshtimit krah për krah me të fortët e botës, si shqiptarë dhe si anëtarë të NATO-s.
Teksa po shkoj drejt mbylljes, dua t’ju pyes: A nuk mendoni se pikërisht Shqipëria, po po, kjo Shqipëria jonë e vogël dhe e drobitur nga shumë padrejtësi e fatkeqësi, nuk mundet dot të ishte as e para, as e dyta dhe as tjetra me radhë që të refuzonte përfshirjen në këtë operacion, po duhet të qëndronte, deri në fund, e të përpiqej besnikërisht për krijimin e kushteve më optimale që do të mundësonin përfshirjen e saj(?) – sipas mundësive e nevojave të saj? E pra, unë s’kam dilema për këtë dhe këtë bëra, në emrin tuaj e të Shqipërisë.

Ne vërtet jemi të vegjël e të varfër, po ju siguroj se nuk bëhemi as më të mëdhenj as më të pasur, duke u ngutur të sillemi si të mëdhenj pa qenë të tillë dhe duke thirrur, “Shqipëri etnike pa armë kimike!”; As duke u kuturisur të krahasohemi kot më kot me të tjerë, më të mëdhenj e më të fortë se ne, të cilët për arsye krejt të tjera mbajnë qëndrime të tjera nga tonat.

Të dashur të rinj protestues, protesta juaj në rrjetet sociale dhe në rrugët e Tiranës apo Shqipërisë, ka qenë e vetmja dallandyshe shprese në qiellin e mbushur me tymin e zi të urrejtjes, mllefeve, gënjeshtrave, delireve, frikërave që shpërthyen në mesin tonë.
Edhe pse ju ka përfshirë në protestë mbingarkesa në shpirt prej gjithë kësaj propagande histerike, unë ndjehem shumë mirë për ju; ndjehem mirë sidomos për shumë prindër që deri dje i frikeshin protestës ndërsa sot dalin në rrugë me gjithë fëmijët e tyre, të pashqetësuar nga forca speciale e gryka pushkësh në dritaret e kryeministrisë; ndjehem mirë për këtë erë të freskët demokratike që solli 23 qershori. Kam plotësisht respekt për kurajon tuaj dhe njoh jo pak ndër ju që ishin përditë bashkë me mua deri në 23 qershor, në rrugën e paharrueshme të përpjekjes për Rilindjen që të ecim më shpejt drejt Shqipërisë që duam.

Asnjë problem, nothing personal siç më shkruante dje mikja ime Elsa Lila përpara se të hidhte videon e vet në youtube. Sot nuk është dita për t’ju ndryshuar mendjen, e di këtë dhe nuk ju’a kërkoj.

Sot është dita për t’ju thënë bravo sepse pavarësisht se nuk jemi dakord në një gjë kaq të rëndësishme, jemi në një tjetër, gjithmonë shumë të rëndësishme, që Shqipëria siç ka nevojë për qeveritarë të mirë, ka nevojë edhe për protestues të mirë. Por sot është dita që unë t’ju them vetëm këtë: Shtetet e Bashkuara nuk vrasin njerëz, po janë vrarë e vriten, më shumë se të gjithë të tjerët, në fronte lufte për të mirën e njerëzimit.
Pa Shtetet e Bashkuara bota s’do e kishte mundur dot as Hitlerin e as Perandorinë Komuniste dhe Europa e Shqipëria kushedi si do kishin qenë sot. Pa Shtetet e Bashkuara shqiptarët nuk do ishin kurrë të lirë e të pavarur në dy shtete siç janë sot. Pa Shtetet e Bashkuara sot me siguri nuk do kishte në Shqipëri protesta për armët kimike, po kushedi s’do kishte pasur fare protesta në njëzet e tre vjetët e fundit dhe burgjet mund të ishin ende plot me të burgosur politikë.
Protestuesit gezojne Kështu që le t’i ndajmë gjërat miq. Lërini në marrinë e tyre ata që duan ta bëjnë përsëri lëmsh mendjen e këtij populli duke nxitur një antiamerikanizëm që na turpëron si komb, si vend, si shoqëri, si shqiptarë e si qytetarë; ata që duan t’ju helmojnë e çorodisin përditë me shpifje, gënjeshtra e mllefe gjithëfarë, siç kanë bërë me vite këtyre anëve; ata që duan t’ju ngopin me lugën bosh të injorancës e të ligësisë së tyre të njohur ndaj këtij vendi. E për t’i ndarë gjërat duke ndarë edhe gjënë për të cilën ju protestoni, ka vetëm një pikë ku unë u ndala pa mundur ta kapërcej dot në diskutimet me partnerët tanë: Pamundësia për t’u përfshirë brenda afatit të përcaktuar, edhe të një a dy vendeve të tjera në zinxhirin e operacionit të shkatërrimit të armëve kimike – jo thjesht financiarisht apo me ekspertizë sepse të tilla ka, por flas për pjesëmarrje direkte.

Nëse disa vende të tjera do të kishin përparuar në kohë për t’u bërë pjesë e operacionit, unë do të isha gati sot t’ju thosha ja plani ynë, ja marrëveshja me partnerët, ja sa pak do rrezikojmë dhe sa shumë do të fitojmë moralisht si komb po edhe fizikisht si vend, duke u bërë pjesë.
E askush s’do thoshte as pse vetëm Shqipëria dhe as që ky operacion kërkon një vend të varfër e të ndotur si Shqipëria e sotme. Por fatkeqësisht, ky element kaq i rëndësishëm për ju njësoj si për mua, sot mungon.
Dhe prandaj, me besnikërinë e plotë ndaj Shqipërisë dhe respektin më të madh ndaj miqve e partnerëve tanë të pazëvendësueshëm, ata e kanë marrë vendimin tim e mësojeni tani edhe ju: Shqipëria e ka të pamundur të përfshihet në këtë operacion."


Ndërsa pritej që qeveria shqiptare të bënte publike vendimin e saj nëse kishte pranuar apo jo të marrë përsipër shkatërrimin e armëve kimike të Sirisë në vendin tonë, protestat e qytetarëve arritën kulmin mëngjesin e sotëm, në Tiranë dhe në shumë qytete të vendit.

Protestuesve që kanë qëndruar në bulevardin para Kryeministrisë gjatë gjithë natës, iu bashkuan në mëngjes grupe qytetarësh, studentësh, nxënësish dhe aktivistë të mbrojtjes së mjedisit, të cilët protestuan kundër shkatërrimit të armëve kimike të Sirisë në territorin shqiptar. Shumica e qytetarëve u organizuan përmes rrjeteve sociale, si "Facebook" e "Tëitter".

Mësohet se të gjitha gjimnazet e Tiranës nuk po zhvillojnë mësim gjatë ditës së sotme, pasi nxënësit kanë dalë në sheshe për të protestuar. Nxënësit e gjimnazeve të Tiranës thonë se po u bëhet presion të kthehen në shkollë, pasi kanë lënë orët e mësimit pa leje për t’ju drejtuar protestës. 

Në Bulevardin përpara kryeministrisë i janë bashkuar protestës edhe pjesëtarë të Komunitetit Mysliman. Organizatorët e protestës thonë se sot në sheshin kryesor para kryeministrisë pritet të mblidhen rreth 40 mijë persona.
“Jemi këtu për të pritur një jo. Në Shqipëri nuk duhet të futet asnjë gram sarin apo helme të tjera”,- deklaroi një ndër organizatorët e protestës.

POLICIA, RENEA DHE FNSH KALOJNE NE GATISHMERINE NR.1

Ora 16:45- Në pritje të vendimit forcat RENEA, FNSH dhe Policia kaluan në gatishmërinë nr.1 pas orës 17:00. Forcat RENEA e FNSH janë mbledhur në repart prej orës 15:00. Në repart janë mbledhur edhe Forcat e Policisë

protesat ne vend
Si asnjëherë më parë, manifestimet e protestës kanë gjetur mbështetje jo të vogël popullore në qytetet kryesore të vendit. Protestat kanë rinisur në Elbasan, Korçë, Durrës, Sarandë, Vlorë, Lezhë, Kukës, Shkodër, Gjirokastër, Krujë, Pogradec, Ersekë, Peshkopi dhe Berat. 

Protestuesit në të gjitha qytetet shprehen se presin përgjigje negative nga kryeministri. Ndërkohë në Gjirokastër, nxënësit e shkollave kanë protestuar përpara bashkisë dhe kanë tentuar të futen në ambientet e institucionit. Policia ka ndërhyrë menjëherë duke shmangur incidente të mundshme. Në Durrës, qytetarët kanë bllokuar hyrjen e portit, në shenjë proteste ndaj asgjësimit të armëve kimike në vendin tonë. Të pranishme në Portin e Durrësit janë forcat e sigurisë së portit, dhe forcat e rendit. Disa prej protestuesve kanë marshuar rrugëve të qytetit, duke mbërritur përpara Bashkisë së Durrësit, nga ku edhe do presin vendimin e kryeministrit Rama në orën 17:00.


-Besimtarë myslimanë kanë kryer ritin e faljes në sheshin e protestës para godinës së kryeministrisë. Pasi kanë dëgjuar zërin e Hoxhës nga xhamia që ndodhet disa dhjetra metra poshtë vendit ku zhvillohet protesta, protestues të besimit mysliman kanë kryer ritin e faljes ndërsa nuk janë ndarë sytë kureshtarë të pjesmarrësve të tjerë.

DOKLE: PROTESTAT, MËSIM I MADH PËR RAMËN, BERISHËN DHE ARVIZUN
Ora 13:20 -
Deputeti socialist, Namik Dokle deklaron se protestat e qytetarëve kundër armëve kimike janë një mësim i madh për kryeministrin Rama, ish-shefin e qeverisë Berisha dhe ambasadorin amerikan Arvizu. Përmes faqes së tij zyrtare në rrjetin social “Facebook”, Dokle shkruan se “kryeministri Rama sado i votuar të jetë nuk mund të vendosë për popullin pa e pyetur atë”.

“Protestat e mijëra qytetarëve me thirrjen emocionuese “Shqipëri e pastër” janë një mësim i madh për të gjithë, por më shumë për ata… 1. Për Edi Ramën…një kryeministër, sado i votuar të jetë, nuk mund të vendosë për jetën e popullit, pa pyetur vetë popullin. 2. Për Sali Berishën…nëse del “në shesh” për të futur hundët në një kauzë të madhe për pisllëqe “të vogla”, populli të përzë nga sheshi ashtu siç të përzuri nga pushteti. 3. Për Aleksandër Arvizun…slogani aq i bukur “Vepro tani” duhet respektuar edhe atëherë kur populli e përdor edhe për diçka që ty nuk të pëlqen…sa për atë tjetrin, “Lulin e vogël’ nuk ja vlen të konsumosh as edhe një milimetër në “Facebook” !!!

META: ËSHTË SPEKULUAR, DO RESPEKTOHET ZËRI I QYTETARËVE
Ora 12:55 -
Kryetari i Kuvendit, Ilir Meta deklaroi sërish sot se vendimi për çështjen e armëve kimike do të jetë transparent dhe në përputhje me interesat e qytetarëve. Në një deklaratë për mediat, kryeparlamentari Meta dënoi spekulimet që sipas tij, janë bërë lidhur me këtë çështje, ndërsa shtoi se zëri i qytetarëve do të respektohet.

“Nuk ka asnjë vendim për armët kimike. Rama ka thënë që do të jetë transparent dhe do të hedhë çdo hap në përputhje me interesat e popullit”,- deklaroi Meta.

protestaBLUSHI: SHPRESOJME QE QEVERIA TI THOTE STOP ARMEVE KIMIKE
Ora 12:40
-Deputeti socialist Ben Blushi ka reaguar nga qyteti i Elbasanit mbi qëndrimin që do të bëjë publik kryeministri Edi Rama sot pasdite. Ben Blushi shprehet se shpreson që Rama do të marrë vendimin e duhur sot duke i thënë Jo asgjësimit të armëve kimike në vendin tonë.

“Shpresoj që qeveria të marrë vendimin e duhur. Shpresojmë që qeveria t’i thotë stop armëve kimike”.

TAHIRI: MOMENT HISTORIK QË NA NXORRI CA MËSIME NË KOKË. JEMI VEND I VOGËL PËR BARRA KAQ TË MËDHA
Ora 11:00-Ministri i Brendshëm Sajmir Tahiri ka reaguar mbi çështjen e armëve kimike duke theksuar se Shqipëria është një vend që nuk i ka kapacitetet të përballojë përgjegjësi kaq të mëdha. Tahiri akuzoi Berishën se kërkon të ringjallet në pushtet përmes armëve kimike, ndërsa shtoi se kryeministri do të japë përgjgijen e duhur për armët kimike.
Tahiri nuk mund të mos e vecojë faktin se dita e sotme shënon një moment historik për vendin.

“Vendi mund të ketë shpatulla të vogla për të mbajtur një barrë kaq të madhe. Por opozita e Sali Berishës i ka shpatullat shumë më të vogla për tu ringjallur nëpërmjet Asadit.

Jemi shoqërisht të papërgatitur për ti dhënë vendit mundësinë të mbajë përgjegjësi së bashku me partnerët ndërkombëtare.

Ndërkohë, Fatmir Mediu bën thirrje të mos përsëritet Gërdeci!!!

Ndërkohe Sali Berisha, njeriu që nuk dinte ku binte Gerdeci, madje që nuk dinte as që kishte një baxhanak që i vdiq ne Gerdec, dika me siguri qe Edi Rama ka marr vendim per te thene PO!!!

Ky është një moment kritik në historinë e një vendi. Por nje moment qe na nxorri te gjitheve ca mesime ne koke. E per me teper, te gjitheve te papergatitur e shume larg pritshmerise per vendin qe duam e enderrojme.

Jam absolutisht i bindur se Kryeministri Rama do marri vendimin e duhur, per popullin dhe vendin e vet.

Jemi qeveria qe fitoi per popullin, dhe e tille do jemi deri ne fund. Pavaresisht se kemi dhe opozitën qe populli nuk përton ta marre me shkelma përsëri, siç bëri dhe dje”.

PROTESTA KA VIJUAR GJATË GJITHË NATËS PËRBALLË KRYEMINISTRISËprotestuesit zgjohen
Ora 05:00- Përfaqësues të shoqërisë civile, gjimnazistë e studentë, kanë vijuar përgjatë gjithë natës protestën e tyre kundër armëve kimike të Sirisë në Bulevardin "Dëshmorët e Kombit” përballë Kryeministrisë, ndërsa mëngjesin e sotëm kësaj proteste i janë bashkuar edhe më shumë qytetarë.

Ata janë shprehur se do të qëndrojnë përballë kryeministrisë deri në momentin që Kryeministri i vendit do t’i përgjigjet pozitivisht kërkesës së tyre për t'i thënë jo sjelljes së armëve kimike në Shqipëri.

Protesta kundër ardhjes dhe demontimit të armëve kimike të Sirisë në Shqipëri, një protestë paqësore, zanafillën e saj e ka në fillim të kësaj jave, por vetëm dje ajo mori përmasa më të mëdha, duke u shtrirë edhe në disa qytete të tjera të vendit, ndërsa mëgjesin e sotëm vihet re një shtim i numrit të protestuesve.

Policia e Tiranës ka monitoruar situatën përgjatë gjithë kohës, duke garantuar rendin dhe sigurinë. Burime zyrtare të Policisë së Kryeqytetit bëjnë të ditur se efektivët e Policisë së Qarkut Tiranë janë të angazhuar maksimalisht për të mbarëvajtur rrjedhën e protestës, ndërsa shtojnë se janë marrë masa për të bërë dhe ndërrimin gradual të efektivëve, duke garantuar siguri maksimale për qytetarë e Tiranës. Efektivët janë pjesë të gjashtë komisariateve në kryeqytet.

Ditët e fundit, debati për mundësinë e asgjësimit të armëve kimike siriane në vendin tonë ka përfshirë përveç politikës, edhe grupime të ndryshme të shoqërisë civile, mes të cilëve edhe të rinj studentë dhe shkollarë. Çështja e armëve kimike të regjimit të Bashar Assasd-it në Siri, ka krijuar një ndjeshmëri të lartë tek qytetarët shqiptarë.

No comments: