Komisioni hetimor “zbardh” tabulatet telefonike

Në e-mailin e gazetës sonë ka mbërritur lista e mesazheve që janë dërguar më 21 janar. E-mailin e ka dërguar vetë komisioni hetimor. Ai është shpërndarë përmes adresës eduard_mavria@berisha.com.

Te dashur lexues,

Ne mbrojtje te transparences dhe demokracise, e ndjejme per detyre te zbardhim tabulatet e bisedave te 21 janarit, duke u paraprire personaliteteve te shquara qe do raportojne ne komisionin hetimor parlamentar

Vini Re: ne keto regjistrime sqarohet mes te tjerat dhe ceshtja e pucit.

———–T-a-b-u-l-a-t-et————-

From: Edi Rama

To: Taulant Balla

Message: Ku je

From: Taulant Balla

To: Edi Rama

Message: po mbledh lule prapa piramides

From: Edi Rama

To: Taulant Balla

Message: Hajde te kafja

From: Taulant Balla

To: Edi Rama

Message: te sjell ca gure?

From: Sali Berisha

To: Lulzim Basha

Message: Ca po ndodh

From: Lulzim Basha

To: Sali Berisha

Message: Nuk e di

From: Shefi policise 1

To: Shefi i policise 2

Message: Na mbyten me gure

From: Ndermarrja e Gjelberimit1

To: Ora News

Message: E dogjen palmen. Puc!

From: Zjarrfikesja

To: Shefi i policise1

Message: Te hap zjarr?

From: Shefi i policise 1

To: Zjarrfikesja

Message: Cfare zjarri do hapesh mor idiot. Hap zorren!

From: Erion Veliaj

To: Edi Rama

Message: U lagem mer lal

From: Nard Ndoka

To: Nard Ndoka

Message: nardnoka

From: Andi Bushati

To: Mero Baze

Message: e shef pocin e kuq te dritarja e Kryeministrit? Me bast qe i bie

From: Mero Baze

To: Andi Bushati

Message: Me cfare do ti biesh, me ate me xham apo me ate pa xham?

From: Ora Neës

To: Ndermarrja e Gjelberimit1

Message: puc puc

From: Silvio Berlusconi

To: Sali Berisha

Message: carissimo! tutto bene?

From: Sali Berisha

To: Silvio Berlusconi

Message: mi hanno scoppiato la labbra

From: Bamir Topi

To: Unknoën number

Message: sa eshte arsenali me gallatasarajin

From: Unknoën number

To: Bamir Topi

Message: Dy me zero. vetem se ka dhune ne stadium. Mos anulohet ndeshja.

From: Bamir Topi

To: Unknoën number

Message: Cfare dhune ore! Dhune eshte ajo? Ver dy per Arsenalin!

From: Erion Veliaj

To: Spartak Ngjela

Message: lali ke nje cader

From: Spartak Ngjela

To: Erion Veliaj

Message: sikur 13 mije te kisha, asnje s’do te te jepja

From: Edi Rama

To: Taulant Balla

Message: do vish te kafja apo jo se s’kam lek me vete. me flliqe me fidelin.

From: Taulant Balla

To: Edi Rama

Message: per dy makiato s’e ben veten fideli

From: Sinan Hoxha

To: Seldi

Message: Ku ma ke lon celsin e Benzit?

From: Sali Berisha

To: Lulzim Basha

Message: Kush ma theu pocin e kuq qe kam ne zyre?!

From: Andi Bushati

To: Mero Baze

Message: e shef pra…cfare nishani!!!

From: Ndermarrja e Gjelberimit1

To: Ora News

Message: Puc zemer

21 janari, Topi e Kreu i SHISH nuk shkojnë në komisionin e mazhorancës

TIRANE- Këshilltari juridik i presidentit deklaroi në një prononcim për median para pak minutash se komisioni hetimor është antikushtetues, dhe se duke thirrur presidentin për të dëshmuar po shkel ligjet. Drejtori i Shërbimit Informativ të Shtetit anulon pjesëmarrjen në komision. Pritet dëshmia e kryeprokurores Ina Rama. Berisha ne mbledhje qeverie: Hetimi per gazetaret, s’ka lidhje me profesionin e tyre. 3-4 gazetaret lidhje direkt me pucin kundra qeverise. Nuk gjykojmë gazetarë për shkrimet.

ANULOHET SEANCA E KOM. HETIMOR ME KREUN E SHIK
Burime zyrtare nga Kuvendi deklarojnë se Kreu i SHISH, Bahri Shaqiri nuk do të dëshmojë sot në komisionin hetimor parlamentar të mazhorancës.

Seanca dëgjimore e parashikuar të niste rreth orës 17:00, me Drejtorin e Shërbimit Informativ të Shtetit është shtyrë “për arsye teknike dhe do të mbahet një ditë tjetër, e cila do të bëhet e ditur në ditët në vijim”,- thuhet në njoftimin e publikuar në faqen zyrtare të Kuvendit.

Sot ishte thirrur te deshmonte edhe kryeprokurorja Ina Rama, por nuk dihet pjesëmarrja e saj.

PRESIDENCA: KOMISIONI HETIMOR ANTIKUSHTETUES
Presidenti Topi konfirmon zyrtarisht se nuk do të paraqitet nesër në komisionin hetimor të ngritur nga mazhoranca për veprimtarinë e institucioneve të tyre para, gjatë dhe pas trazirave të 21 janarit. Këshilltari juridik i presidentit deklaroi në një prononcim për median para pak minutash se komisioni hetimor është antikushtetues, dhe se duke thirrur presidentin për të dëshmuar komisioni po shkel ligjet.

“Presidenti i Republikës ushtron kompetencat e tij në përputhje me Kushtetutën e Republikës së Shqipërisë. Në mbështetje të nenit 92, germës “h” të Kushtetutës, Presidenti është autoriteti që kërkon të dhëna me shkrim, pra informacione nga drejtuesit e institucioneve shtetërore për çështje që kanë bëjnë me veprimtarinë e tyre. Pra, Presidenti ka të drejtën e informimit, por jo detyrimin për të informuar.”- nënvizoi zoti Peci.

Komisioni kërkoi nga Presidenti i Republikës që brenda datës 2 shkurt të dërgojë një informacion për të gjithë veprimtarinë e tij gjatë dhe pas datës 21 janar 2011.

Sipas këshillitarit juridik të presidentit kërkesa e komisionit është hartuar “pa përmendur objektin e saj që në vetvete përmban elementë, që realisht pengojnë kthimin e një përgjigjeje, është e pakuptimtë për aq kohë sa po ky Komision me shkresën e datës 31 janar 2011, thërret Presidentin e Republikës për t’u paraqitur në Komision në orën 17.30 të datës 3 shkurt, me qëllim realizimin e një seance pyetjesh lidhur me objektin e hetimit të këtij Komisioni Hetimor.

Peci nënvizon se Komisioni Hetimor në kërkesën e vet, që Presidenti i Republikës të paraqitet para tyre për të dëshmuar, është në “kapërcim të kompetencave duke shkelur ligjin”.

Duke iu referuar 162 të Kodit të Procedurës Penale që titullohet “Marrja e dëshmisë së Presidentit të Republikës dhe të nëpunësve të shtetit” Peci tha se “Presidenti nuk mund të thirret për t’u paraqitur ashtu siç kërkon Komisioni Hetimor, por jo vetëm kaq. Atij në dallim nga funksionarët e lartë të shtetit, nuk i lejohet të paraqitet para Komisionit, Gjykatës apo dhe Prokurorisë.”

Këshilltari juridik gjithashtu e ka cilësuar të paligjshme kërkesen e komisionit për skedaret telefonike.Peçi tha se "komisioni është në shkelje të hapur me ligjet e vendit." dhe se "Në asnjë rast ai nuk mund të ndërmarrë atributet e prokurorit apo gjykatës” nënvizoi ai.

BERISHA: GAZETARËT PUC QEVERISË, DO HETOHEN
Berisha garanton se do të cojë deri në fund hetimin e tabulateve ndaj 4 gazetarëve në vend, pasi sipas kryeministrit ata kanë drejtuar një puc për rrëzimin e qeverisë më 21 Janar.
Duke folur për kërkesën e komisionit hetimor të mazhorancës për tabulatet e telefonatave të 4 gazetarëve të njohur, kryeministri Sali Berisha siguroi sot në mbledhjen e qeverisë se liria e shtypit nuk do të cenohet porse, ajo që gazetarët bënë nuk kishte lidhje aspak me median.

“Kjo nuk ka asnjë lidhje me gazetarinë e lirë, por unë ju garantoj se tre-katër gazetarët që nuk kanë lidhje aspak me profesionin e tyre janë të implikuar direkt në dhunën dhe puçin ndaj shtetit. Sa te jemi ne në këtë pushtet, një gazetar nuk do të dënohet kurrë për shkrimet dhe publikimet e tij. Por, këto s’kanë lidhje me gazetarinë”, vijoi ai.

Më pas, kryeministri foli shkurtimisht edhe për demonstratën e 21 janarit. “Buxheti afatmesëm parashikon mbështetjen financiare për të gjitha reformat e mëdha të shndërrimit të vendit në Shqipëri evropiane. Një puç dëmton në mënyrë thelbësore imazhin e këtij vendi, por ky puç nuk do të mund të ngadalësojë reformat e kësaj qeverie për ndërtimin e Shqipërisë evropiane”, theksoi Kryeministri.

21 JANARI, KOMISIONI HETIMOR THËRRET INA RAMËN E SHAQIRIN
Prokurorja e Përgjithshme Ina Rama dhe Drejtori i Shërbimit Informativ të Shtetit Bahri Shaqiri do të dëshmojnë sot para komisionit hetimor parlamentar për veprimtarinë e institucioneve të tyre para, gjatë dhe pas trazirave të 21 janarit.

Komisioni hetimor, i ngritur vetëm me votat e mazhorancës, zhvilloi dje një seancë dëgjimore me ministrin e Brendshëm Lulzim Basha. Gjatë fjalës së tij ministri konfirmoi se policia e shtetit nuk do të garantojë mbarëvajtjen e tubimeve të së premtes të paralajmëruar nga opozita në Tiranë, Korcë, Vlorë dhe Lezhë. Ministri Basha pretendoi se këto tubime rrezikojnë sigurinë kombëtare pasi sipas tij në rrugë operative ka të dhëna se ai do të shndërrohet në një zinxhir dhune. Basha tha se tentativa për të marrë pushtetin me dhunë më 21 janar u organizua nga PS e lideri i saj Rama, duke përdorur njerëz të paguar. Duke reaguar për urdhërndalimet e gardistëve tha se “ishin shkatërruese” dhe “do demoralizoheshin ata që mbrojtën shtetin ligjor.”

Në dëshminë e tij dhënë komisionit hetimor më 31 janar kryeministri Berisha deklaroi se organizatorët e grushtit të shtetit, Rama, Ruci e Gjinushi drejtonin “banditët që sulmuan për 5 orë kryeministrinë me anë të telefonit”, prandaj sic tha ai, “Kërkimi i tabulateve ka tronditur pucistët”. Gjithashtu ai sulmoi prokuroren e Përgjithshme dhe Presidentin e Republikës.

DESHMIA E BASHES: PS PAGOI KRIMINELE PER GRUSHT SHTETIN
ORA 18:14- Ministri i Brendshëm Lulzim Basha ka nisur dëshminë e tij në komisionin hetimor parlamentar të mazhorancës sot rreth orës 17:40. Ngjarjet e 21 Janarit Basha i cilësoi si grusht shteti dhe si tentativë për të marrë pushtetin me dhunë nga persona të paguar.

“Qëllimi parësor ishte marrja me forcë e selisë së këshillit të ministrave pas nxjerrjes jashtë loje të forcave të rendit dhe atyre të gardës. Si ministër i Brendshëm kam bërë thirrje për distancimin e PS nga kontigjenti kriminal, të gjithë kujtojmë situatën e krijaur me protestat e vazhdueshme në maj. Në kundërshtim me këtë thirrje ngjarjet duket se kanë ecur në krah të kundërt. Kontigjenti i përdorur nga PS ishte jo vetëm kriminal por edhe pa lidhje organike me PS. Pas ndalimit të personave nga policia i janë gjetur lekë në xhep, prerje ne euro. Grupi që sulmoi ishte i paguar”,- u shpreh Basha gjatë fjalës së tij.

Sipas ministrit të Brendshëm urdhër ndalimi i 6 gardistëve ishte i dëmshëm dhe demoralizonte të gjithë strukturat që në 21 Janar mbrojtën shtetin ligjor. Basha tha më tej se, ra dakort më kryeprokuroren që gardistët të pyetishin por jo të ndaloheshin.

“Urdhër-ndalimet ishin për komandantët e gardës për të gjithë zinxhirin komandues. Duke u ndodhur para një situate të tillë, ku policia kishte përballuar një sulm, nuk mund të mos shprehja habinë. Eleminimi i komandës së gardës do të thotë demoralizim i plotë i të gjitha efektivave. Ky ishte mesazh shkatërrimitar, jo vetëm për ata që na mbrojtën. Armët e përdorur nga garda ishin në dispozicion të prokurorisë. Rashë dakort me kryeprokuroren që gardistët të pyetishin po jo të ndaloheshin.

Basha deklaron më tej se për këtë cështje ka informuar edhe diplomatët, si dhe ka kërkuar një takim me presidentin Topi.

NESER SEANCA DEGJIMORE ME TOPIN
Në datën 3 shkurt ora 17:30 komisioni hetimor ka thirrur për të dëshmuar Presidentin e Republikës, Bamir Topi. Nuk dihet ende nëse presidenti do të marrë pjesë në komision. "Gazeta Shqiptare", shkruante dje, duke iu referuar zyrtarisht burimeve nga presidenca, se presidenti “ka vendosur të refuzojë kërkesën për t’u paraqitur në një seancë dëgjimore para komisionit.

Në datën 4 shkurt, 17:00 ora 17:00 me Drejtorin e Policisë, Hysni Burgaj. Më 4 shkurt, ora 18:00 me Komandantin e Gardës së Republikës, Ndrea Prendi.
Seancat dëgjimore përfundojnë në datën 5 shkurt me Kryetaren e Kuvendit, Jozefina Topalli.
Komisioni Hetimor ka kërkuar që të administrohen tabulatet e telefonave për gazetarët Andi Bushati, Sokol Balla, Filip Çakulli, Mero Baze si dhe për prokurorët Olsi Çela dhe Shkëlqim Hajdari”.
(s.g/m.a/BalkanWeb)

Dritëroi: Të ndalen protestat, Berisha po na kthen diktaturën

Nga Anila Basha

Në më pak se një javë, shkrimtari i madh Dritëro Agolli, komunikon sërish me Gazetën Shqiptare nëpërmjet telefonit. Që poeti të flasë kaq shpesh, do të thotë se është shumë i shqetësuar dhe i keqardhur për gjendjen në Shqipëri. Këtë radhë po e revoltojnë të gjitha: jo vetëm vrasja e tre qytetarëve në demonstratën e 21 janarit, por tani edhe akuzat e Berishës për “puç institucional” edhe kërkesa e Ramës për të vazhduar demostratat e protestat, kur siç thotë ai “ende nuk ka mbaruar zija, për të filluar reflektimi”; por edhe Bashkimi Evropian, i paqartë deri më tani sipas shkrimtarit, për të drejtuar gishtin aty ku është fajtori.
I keqardhur për këtë situatë, Dritëroi sërish kujton vitin 1991, kur në kongresin e 10-të të PPSH, fjalimi i tij u fërshëllye, e shanë, nuk e kuptuan. Në atë kohë, nga podiumi, shkrimtari, 20 vjet më i ri në moshë, u tha delegatëve: “Ju po qani një kufomë, tani u binda më shumë nga të bërtiturat tuaja. Unë nuk do rri këtu me ju ta qaj”. Por e kujton edhe tani, edhe pse situata 20 vite më parë, ishte më e rëndë sesa sot, se ndryshohej sistemi, nuk pati asnjë qytetar të vrarë. Madje, edhe disa policë që kishin shkuar asokohe poshtë shtëpisë së Dritëroit, i kishte çuar ministria e Brendshme për shkak të letrave të shumta kërcënuese që kishin ardhur në adresën e tij. Dhe ndan me ne, komentin e tij për këtë situatë, jo si socialist, por si një shkrimtar. “Unë socialist jam, por këtë radhë do të flas si poet” thotë Dritëroi, duke mos hequr dorë nga forca e tij politike, por duke e kritikuar PS për të ruajtur 20 ditët e zisë.
Dritëro, si po ju duket gjendja? Protesta të reja, akuza për puç institucional nga kryeministri, mungesë reagimi...
Të mos bëhemi gënjeshtarë. Gjendja sot në Shqipëri, është shumë e acaruar. Njerëzit janë tepër të dëshpëruar. Flasin me vete duke ecur rrugës, sepse kanë rënë dy pesha të mëdha mbi supet e tyre. Pesha e gjendjes ekonomike, shumë e vështirë, ngritja e të gjithë llojeve të çmimeve, jo vetëm të çmimeve për të ngrënë, por edhe deri te ilaçet tani së fundmi. Të gjitha këto e bëjnë popullin shumë të dëshpëruar. E bëjnë me një depresion të madh. Unë e shoh këtë edhe në familjen time, që nuk jetojmë aq keq, si bashkëqytetarët tanë në qytete e në fshat. Se ata, janë akoma më keq. Madje edhe fëmijët e vegjël, janë preokupuar për këtë gjë. Edhe kur shkojnë në shkollë sot, nuk më puthin si çdo ditë që e bënin këtë mbesat e mia. Duket sikur janë zëmëruar nga të rriturit që po bëjnë këto gjëra të prapta. Dhe unë vetë, jam tejet i dëshpëruar. Edhe gruaja ime, Sadija, që është më e ndjeshme nga këto gjëra, nuk qan në sytë e mi. Por kur fle në krevat, mbulon kokën e zë qan. Po si është e mundur që një shtet kaq i organizuar sa i yni, që është tani anëtar i NATO-s, por ka përfituar edhe liberalizimin e vizave që mund të shkosh ku të duash në Evropë, ka kaq shumë dëshpërim dhe qytetarët e vet nuk janë të gëzuar? Evropa me ato mundësi që ka pasur, ia ka dhënë Shqipërisë....
Por edhe zgjidhjen Dritëro, sot, shqiptarët po i kërkojnë tek Evropa, për të ulur gjakrat dhe për të mos ndezur më situatën...
Evropa, BE, por edhe institucione të tjera evropiane, nuk e thonë qartë fjalën e tyre për Shqipërinë. Disa thonë që ta zgjidhë vetë Shqipëria. Neve nga ana jonë themi që të na i zgjidhë Evropa. Tani për të parën, që BE nuk thotë qartë se kush i ka fajet që Shqipëria po kalon në këtë fazë. Ja, ju si gazetarë keni dëgjuar gjë për këtë?
Po të isha unë kryetar i OSBE-së, fjala vjen, (e them si imagjinatë) do të thosha se “kryetari i qeverisë duhet të flasë troç për këtë gjë”. Sepse popullin e ka të varfër fare. Se këto gjëra të rritjes ekonomike, gjoja 3 përqind apo shifra të tjera, nga dalin këto, kur populli është duke lypur. Atëherë, unë nëse do isha kryetar i OSBE-së do të thosha: “ti Sali Berisha, ke këtë faj”. Dhe pastaj, do t’i thosha Edi Ramës: “Ti Edi Rama ke këtë faj”. Pra, do t’u flisja të dyve. Mirëpo, përfaqësuesit e Evropës, bëjnë poezi, siç kam bërë unë, që jam poet. Thonë “ligji, ligji, ligji”, dhe mbi të gjitha. Këto janë thënë që në mesjetë. Ti thuaj: “ti i ke fajet dhe mbaj përgjegjësinë” dhe jo të thuash se “Shqipëria ka hyrë në NATO, ka vizat e lira, ju duhet të zbatoni ligjet” dhe të tjera si këto. Domethënë, edhe vetë Evropa, është një ngjalë që s’ke ku ta zësh. Prandaj, këta të Evropës, të mos vijnë si gjithnjë, por të sqarojnë gjendjen tonë kombëtare dhe të thonë: “I dashur Sali Berisha, ti këtë gjë që ke bërë, lëre”. “I dashur Edi Rama: ti ke këto faje”. Por, faje konkrete, jo kështu. “Atëherë lërini këto, ju,- ti thotë Evropa,- nëse nuk bëni këtë, juve do t’ju marrim edhe vizat edhe do t’i propozojmë Amerikës të mos jeni në NATO”. Leqë edhe NATO-n këtu nuk e kemi marrë vesh ç’është, e dimë vetëm si emër. E keni dëgjuar të ndërhyjë gjëkundi?! Unë e di NATO-n si një gjë që nuk është fare. Nuk e di. Mund të jetë edhe nga Turqia.
Por ndërkohë, vendet mike Dritëro, duke qenë Shqipëria anëtare e NATO-s thotë se nuk duhet të na mësojë gjithmonë, shqiptarët duhet të zgjidhin punët e tyre...
Po ne jemi mësuar me pushtime të të huajve. Dhe i kërkojmë përsëri vetë këtë, që të na ndihmojnë të tjerët, se nuk jemi vetë të zotë. Dhe në përgjithësi, ne jemi nën pushtim të të huajve. Sepse presim që ata të na i zgjidhin këto gjëra. Dhe meqë ne nuk jemi të zotët për të organizuar një shtet, i shtrijmë krahët nga Evropa që të na rrregullojë punët në shtëpinë tonë. Ai që është shtet, vë vulën dhe thotë se “unë jam shtet” dhe “unë bëj këtë”.
Por ka një akuzë nga kryeministri për “Puç institucional”...
Shteti ynë, është një shtet që trillon puçe, trillon në përgjithësi, domethënë, është një shtet si telenovela. Pjesa e parë e telenovelës është konsumuar, janë demonstratat e përgjithshme, që janë bërë në vendin tonë. Kulmi i telenovelës ishte ai që u bë më 21 janar, ku u vranë 3 qytetarë. Zgjidhja e telenovelës nuk e dimë si do jetë, por tani po përgatitet që të mbarojë telenovela, sepse duhet zgjidhja, siç mbarojnë këto telenovelat me zgjidhje. Kështu që në këtë mënyrë, populli i ka këmbët në tokë, por mendjen e ka lart dhe është bërë si i çmendur dhe të gjithë fluturojnë nëpër qiell me mendjen e tyre. Do të thotë se është një popull i hutuar krejtësisht deri më sot.
Por duket se nuk jemi te zgjidhja, opozita ka paralajmëruar këtë të premte protesta, jo vetëm në Tiranë, por edhe në rrethe të tjera...
Në këtë gjendje që është dhe që unë e rrëfeva edhe për vrasjen e atyre tre qytetarëve dhe të plagosurve të demostratës, tani duan të fillojnë pjesën e dytë të këtij filmi. Dhe siç kam dëgjuar në televizor, do të fillojnë demonstratat ditën e premte.
Tani mendoj, se këto janë veprime jo të matura, sepse nuk duhet filluar një manifestim tjetër pa mbajtur zinë. Në përgjithësi shqiptarët, e kanë të paktën 20 e ca ditë zinë për këto ngjarje që ndodhën. Pse është zija? Zija nuk është fetare. Është reflektim. Njerëzit duhet të reflektojnë: “More ç’u bë para një jave? U vranë tre vetë, u plagosën kaq të tjerë dhe u bë një gjullurdi e madhe”. Tani, demonstratat që pretendojnë socialistët t’i bëjnë të premten, nuk janë të arsyeshme dhe nuk janë edhe morale, se duhet ta lënë popullin të reflektojë. Unë jam individ edhe dua të reflektoj. Jam një njeri që di të shkruaj ca gjëra, dhe unë akoma nuk kam menduar, sesi ishte kjo punë dhe jo pastaj të ngresh në këmbë një popull që akoma nuk ka menduar për këtë gjë. Prandaj këto paralajmërime të opozitës nuk janë të drejta, sipas meje. Unë e çmoj atë demonstratën e parë, sepse ajo dha një shenjë që nuk do ishin fjalime me letra e hartime, por ajo përfundoi siç e pamë. Tani duhet ta lëmë atë dhe socialistët nuk duhet ta lënë protestën këtë javë të paktën. Ta lënë të qetë këtë javë, që të mendohet, pastaj të bëjnë të tjerat. Demostratat e tjera, janë edhe jashtë rregullit të natyrës. Një bajame fjala vjen, kur vjen marsi, apo prilli çel; nuk mund të çelë në shkurt; Keni parë në shkurt ndonjë bajame të çelë në Shqipëri? Prit njëherë të çelë ajo dhe pastaj reago, aq më tepër që ato pemë që kemi ngrënë tani në dimër, kanë qenë tepër të hidhura. Ta lemë popullin të meditojë dhe gjykojë.
Por ndërkohë, Kuvendi ka kërkuar tabulatet e telefonave të disa krerëve të lartë të shtetit, duke përfshirë edhe gazetarë...
Eshtë antidemokratike të surverjosh gazetarët, siç po bëhet tani ky veprim dhe t’ia regjistrosh celularët atyre gazetarëve, se ç’ka thënë ky gazetar për këtë gjë dhe me kë ka mbajtur lidhje dhe informacione. Gazetari edhe me Mbretin mund të mbajë lidhje dhe t’i telefonojë dhe mbretërit sot nuk janë si mbretërit e dikurshëm si Ahmet Zogu, apo Ivani i Rusisë, apo Car Nikolla. Tani edhe Mbretit mund t’i telefonosh me celular, madje edhe një krimineli për të gjetur ku është ky; edhe një ministri, kryeministri edhe një hamalli mund t’i telefonosh. Dhe tani përpiqen që të gjejnë këta, me cilin ka telefonuar ky gazetar, apo edhe nëse nuk është gazetar, një që merret me gazetari edhe si unë fjala vjen. Prandaj kjo është krejtësisht antidemokratike. Kjo e shpie vendin drejt diktaturës; e shpie si në kohën e Hitlerit, Musolinit. Prandaj kjo fushatë e tillë, është krejtësisht kundër rregullave dhe kushtetutës dhe idealit demokratik.
Edhe kjo, domethënë, një Puç që akuzon Presidentin që nuk foli kundër demonstratës. Presidenti e kishte mirë mesazhin e tij dy ditë më parë. Por që të akuzosh Presidentin për të tilla gjëra antishtet dhe anti të gjithëve, edhe SHISH-it, edhe Prokuroren e Përgjithshme nuk më duket e drejtë. Grushti i shtetit bëhet nga gjeneralët. Dhe këto janë kërcënime për shtetin.
Dhe unë do të them, se mbaj mend në 1991, kur unë fola në kongresin e 10 të PPSH-së. Atëherë, m’u sulën shumë njerëz dhe kishte edhe nga ata që më kërcënonin në atë kohë, qoftë edhe komunistë të vjetër dhe kisha bile, edhe disa miq që më kërcënonin me letra, por unë nuk i vura ndonjë rëndësi këtyre gjërave. Sepse në kthesa historike të mëdha, ndodhin të tilla gjëra. Që atëherë më vunë disa policë, që të më më mbronin. Kështu edhe kjo, nuk është ndonjë frikë e madhe që tremben njerëzit, se, “do na vrasin” dhe shohim institucionet me tela me gjemba. Kjo është një gjë jonormale për Republikën e Shqipërisë. Më duket situata si këto dramat e famshme “Në pritje të Godosë” apo të tjera, “Kështjella” e Kafkës etj...Domethënë të gjitha këto, janë gjëra absurde, aq sa kryeministri thotë se “do më vrisnin mua”, “kishin bërë komplot se do më vriste Topi dhe Rama”. Mirë Edi Rama, por Bamiri të vriste? Bamiri është aq human dhe aq njeri i butë, sa nuk vret dot një mi po ti hyjë në shtëpi dhe jo të vrasë një mi kaq të madh si Saliu.

Prokuroria identifikon gardistët që hapën zjarr

Urdhër-ndalimet e lëshuara për dy nga efektivët e Gardës së Republikës, të cilët nuk kanë asnjë rol drejtues, sipas prokurorisë është bërë në bazë të planit operacional për organizimin e shërbimit, në datën 21 janar. Fatos Bushati dhe Altin Kollçinaku, ndaj të cilëve zyrtarisht ka urdhër ndalimi, sipas të dhënave të prokurorisë kanë qenë me shërbim në pjesën veriore të Kryeministrisë, por nuk ka asnjë të dhënë që i implikon ata në hapjen zjarr ndaj demonstruesve. Vetëm ditën e djeshme, organi i akuzës ka marrë informacione për dy efektivë të tjerë të Gardës, identiteti i të cilëve dyshohet se përkon me gardistët që janë fiksuar nga kamerat duke qëlluar, njëri me automatik të modelit “MP5”, ndërsa tjetri me automatik “AK47”. Momentalisht organi i akuzës ka vendosur të mbajë të fshehtë identitetin e tyre, pasi gjithçka është në proces verifikimi nga prokuroria, e cila po shqyrton çdo të dhënë dhe burim të mundshëm informacioni.

The day after

Artur Zheji
Duke ndjekur pamjet e procesionit përkujtimor të Opozitës, duke parë bodyguardët e shumtë dhe trupgjatë të Ramës, duke dëgjuar heshtjen dhe duke deshifruar heshtjen e komanduar, ndien gjithashtu edhe një zbrazëtirë logjike dhe një ngërç moral, në lidhje me atë që ndodhi fare pak ditë më parë.
Përse duhej të ndodhte? Po sikur të mos ndodhte? Përse të mos shmangej? Janë këto disa pyetje që derdhen vetiu, siç derdhet vetiu lëngu nga një gotë e rrëzuar. Pavarësisht asaj që ndodhi apo nuk ndodhi më 28 janar, mund të bëhet një analizë e shpejtë sesi ndodhi, që më 21 janar t’i jepej jetë një ballafaqimi të zymtë, me të plagosur dhe të vdekur. T’i jepej jetë një sfide të egër dhe luftarake, me bindjen se “Ora erdhi! Pushteti është mbas dere! Mjaft të zgjatësh dorën dhe mund ta kapësh! Një sulm, dy sulme dhe kështjella prej letre e pushtetit të Berishës, do të shkërmoqet?!”
Shumëkush mendoi se ultimatumet ndaj Berishës, pak ditë përpara demonstratës së 21 janarit, kishin një mbështetje, apo buronin nga një nxitje, që shkonte përtej kabinetit të kryebashkiakut apo kryeopozitarit, një mbështetje nxitëse dhe përkrahëse sa e brendshme po aq edhe e jashtme. Mendohej, gjithashtu, se ishte studiuar mirë e qartë klima e përgjithshme nën kornizën e të cilës do të ndërmerrej “revolucioni” që po ndizej. Mendohej se reaksioni zinxhir emocional dhe fryma pasonjëse do të bënte punën e mbetur, që duhej vetëm të fillonte te sheshi “Dëshmorët e Kombit”, përballë Kryeministrisë. Mendohej se shqiptarët do të kapeshin nga virusi i vetëshkatërrimit, si në vitin ‘97 dhe në vitin ‘98. Mendime ogurzeza, por gjithsesi mendime dhe supozime legjitime.
Fatmirësisht ky virus vetëshkatërrimi u konstatua se paskësh rënë në gjumë të thellë ose paskësh vdekur te shqiptarët e shekullit të ri ku kemi hyrë. Ky virus u nxor nga epruveta e kujtesës së 14 viteve më parë, me qëllim ri-përhapjen e epidemisë së vjetër. Shqiptarët duket se e shmangën këtë virus dhe, më mirë akoma, duket se kishin fituar imunitet prej tij. Lajm i mirë ky për shqiptarët. Qartësia e ambasadorit Arvizu në deklarimet e veta, deklaratat e Departamentit të Shtetit me zërin e Tomas Kantrimen, hodhën dritë dhe shpërndanë mjegullën e keqkuptimeve, mbi të cilat u stisën dhe u futën në qarkullim shumë pandehma. Njëra prej tyre ishte pandehma që “fliste” për një klimë jo vetëm kombëtare, por edhe ndërkombëtare që favorizonin rënien e Berishës. Mbi këtë pandehmë, që rezulton e rreme, u krijua me shumë art dhe konspiracion një frymëzim i rremë, nxitës dhe motivues… Se pushteti i ri është afër. Se Berisha i ka ditët të numëruara. Se Berisha është i izoluar. Se imazhi i Kryeministrit i ka kuotat e kredibilitetit në pikën më të ulët. Por tanimë mund të themi se qëndrimi amerikan është i kristaltë dhe pa ekuivok: “Shqipëria është një vend që deri në vitin 2013 ka një axhendë të paracaktuar politike, zgjedhje lokale në maj 2011, zgjedhje politike më 2013.”
Pra, u artikulua më qartë se kurrë ndërkombëtarisht që lëvizja më e ashpër politike e PS-së, me qëllim provokimin e rënies së Qeverisë dhe “dorëzimin” e Berishës, nuk ka asnjë mbështetje ndërkombëtare. Duket qartë se skenari i sulmit politik për përmbysje ka një “kleçkë” të pakapërcyeshme, moskonsultim me aleatët e huaj, një kuturisje emocionale, pra, jashtë kontekstit europian dhe sidomos jashtë kontekstit gjeopolitik aktual. Mendja të shkon menjëherë te ekzistenca e një skenari më të vogël, fshehur nën pelerinën e një skenari më të madh. Me sa duket, në skutën e mendimeve të veta më të fshehta, Edi Rama, krejt në mënyrë gjeniale, nën tymnajën e një sulmi masiv dhe të zhurmshëm politik antiqeveritar, ka përpunuar skenarin e vet të zgjedhjeve lokale, të cilat do të jenë të helmuara nga tri vrasjet, nga urrejtja e skajshme e palëve, e pra politike në mënyrë të skajshme dhe jo qytetare.
Jo, pra, një betejë e pritme për kryeqytetin që është në agoni dhe për qytetet e tjera në lëngatë të thellë, por një betejë vetëm politike, me akuza të ndërsjella me termat agresivë, si “Vrasës” apo “Puçistë”. Rama në këtë rast përdori me mjeshtëri ambiciet e të shumtëve përreth tij, duke fshehur skenarin e vogël real të zgjedhjeve të majit, nën mjegullën e skenarit të madh, të pamundur, të marrjes së Pushtetit politik, me forcën e “popullit”. Humbësit e mëdhenj do të jenë qytetarët, të cilët nuk do të kenë hapësirë dhe rol në Zgjedhjet e pritshme, të cilat do të jenë, mjerisht, jo Zgjedhje për Qytetet, por Zgjedhje e polarizuar Politike.
Ky është “suksesi” i vërtetë që mbërriti Rama me demonstratën e 21 janarit, sigurimin e një beteje të drejtpërdrejtë me Berishën, duke sfumuar dhe zvogëluar rolin e çdo figure tjetër. Me sa duket, Rama mendonte se kjo ishte e domosdoshme: “një betejë e madhe politike kombëtare, për të futur kësisoj edhe një herë lehtësisht në xhep Bashkinë e Tiranës.” Aleatët dhe këshilltarët e tij do të kenë kohë të kuptojnë këtë strategji të Kryetarit, por ata janë tepër inatçorë për ta kuptuar këtë strategji mendjehollë. Por kur ta kuptojnë, do të jenë vonë. Rama do t’i ketë zëvendësuar pa dhimbje me të tjerë. Kjo është politika

Ilva Tare: Tonight ose rikthimi te natyra e saj

Alfred Lela

Mëndafshi i këmishës që mban veshur dhe lëkura e saj kanë një të përbashkët me të dhe Televizionin: puthiten. I ka të kursyera ngjyrat që ka hedhur mbi vete: bluja e bluzës gërshetohet me një gri të çelët të pantallonave; buzëkuqi i trëndafiltë me vathët e vegjël të artë poshtë një kurore të vogël floknaje të kuqe. Ndoshta sepse e di që është ekrani ai që i ka ngjyrat me shumicë e ndaj ajo duhet të kursejë të sajat. Ndoshta sepse e di se i ftuari i saj i parë është një kombinim i ngjyrave të pakta tashmë: të gjitha i janë zbehur; fasada e pallateve të Tiranës, koloriti i teshave të dikurshme të ndërruara tash me klishenë e kostumit blu-a-gri të politikanit; aksioni politik i ngërthyer në mërzinë e kontrastit të së bardhës me të zezën. Krejt si dallimi mes demonstratës së dhunshme të 21 janarit dhe përshpirtjes civile të një jave më vonë. Megjithatë, duket se ata të dy ishin të prerë për natën e parë të njëri-tjetrit: ajo për rikthimin në Televizion dhe ai për rikthimin te politika normale. Kanë qenë mbrëmë në orën 21.00 në ekranin e Ora News në emisionin Tonight: Ilva Tare dhe Edi Rama.

Kur pyet një prej anëtarëve të stafit të Ora-s se pse ky emision; pse edhe një tjetër dreq emisioni për t’ia shtuar luzmës së deritashme në këtë qytet ku bisedat e kafeneve kthehen në debate televizive në mbrëmje, ai të thotë: është ndryshe. Te ndryshe, kjo ndajfolje diskrimnuese mënyre, janë mbërthyer të gjitha platformat e emisioneve televizive në ekranet e Tiranës. Prandaj të mbetet ta shmangësh këtë ndryshe dhe t’i hedhësh së pari një sy studios ku Ilva Tare do të ulet me të ftuarit çdo të premte e të martë për Tonight-in e saj. Është e madhe dhe e bardhë; në qendër ka konturet e një globi ku shtrihet bota me konturet e saj; mbi të një tryezë, që është në fakt një ekran; ngjitur me të profili i hajthëm i zonjës Tare do të qëndrojë më këmbë duke pyetur të ftuarin e ulur përballë. Në këtë kuptim, në organizimin e studios gjërat, në fakt, duken ndryshe.

Por, jo aq ndryshe sa për të të bërë të vetin. Fillimi i talk show-t të Tares i ngul gjilpërën e parë skepticizmit të amullt. Drejtuesja është sharp as a knife (e mprehtë si thikë) do të thoshin amerikanët. Sytë i ka te kamera; të fortë, kërkues, të palëvizshëm, a thua se po luan me të atë lojën e vjetër “kush i ul i pari”. Të tilla i ka edhe pyetjet, pa byk pauzash ndërmjet, me një ton dhe kënd nga i cili as mund të shtosh e as nuk mund të heqësh asgjë. Edhe pyetjet ndjekëse (follow up questions) i ka si goditje në brinjë, duke e trajtuar të ftuarin si kundërshtar në ring, të cilit ia merr për goditje poshtë brezit dredhitë ndaj pyetjeve të saj. E gjithë kjo, në kushte të tjera, do t’i shkaktonte të ftuarit acarime të njëpasnjëshme, por në ndërkohë ajo përkul kokën, zbeh timbrin duke “të arrestuar” me një koketëri së cilës nuk mund t’i ikësh aq lehtë.

Atëherë, po, Ilva Tare duhet të jetë ndryshe. Ndryshe jo në atë kuptimin se theksin e saj e ka përmbytur tonaliteti i anglishtes, të cilën e ka pasur gjuhë të parë gjatë katër viteve të fundit. As diploma e fortë nga London School of Economics; karriera e gjatë në televizione ku ajo ndërmjetësoi një lloj tjetër gazetarie; as përvoja me të ashtuquajturin CNN arab Al Jazeera-n; as në atë se ajo tani është beqare, pas një martese anglo-arabe deri diku të panafakë. Për ta rimarrë asosacionin me këmishën nga kreu i këtij profili, Ilva Tare dhe Televizioni puthiten. Dhe ky, me sa duket, është një rikthim i lëkurës te këmisha.

Nga intervistat e Zef PERGEGES

Persekutimi Gjosho Vasia,

GJOSHO VASIA

Rama rrëfehet në “Tonight” me Ilva Tare

Pak orë pas përfundimit të demonstratës homazh në nder të viktimave të 21 janarit, kryetari i opozitës Edi Rama i pranishëm në emisionin “Tonight” nga gazetarja Ilva Tare deklaroi se kjo nuk ishte një luftë për pushtet dhe një luftë personale, por homazh në nderim të viktimave të pafajshëm. Më tej, Rama shtoi se rruga e protestës do të vijojë, kjo për ti dhënë fund kësaj qeverie dhe për një garanci ndaj qytetarëve që të rizgjedhin.

“Nderimi për këta tre burra te pafajshëm, për ata shqiptarë të zakondshëm në rrugën e kësaj proteste. Nuk erdhën për të marrë zyrën e Saliut, por erdhën për tu bashkuar me të tjerë për një Shqipëri më të mirë, ishte një detyrim më i madh sepse të rinim për të dëgjuar partnerët ndërkombëtarë. Besoj se anullimi i demostratës do të ishte zëvëndësimi i gradës me frikën. Do të ishte pranimi i frikës dhe zhytje nga një errësirë për të cilën duam të dalim sa më parë”.


Ndërsa e konsideroi demonstratën e sotme si një mesazh dhënë njëzëri nga populli shqiptar, kryesocialisti shtoi se kjo demostratë u provokua rëndë, ndaj ndodhi 21 janari.

“Demostrata e 21 janarit u provokua rëndë për ato arsye te cilat dalin në pahë dita ditës. Eshtë i pari i një regjimi kusarie dhe matrapazllëku që e refuzojnë, dhe kjo është më e pakta që mund të thuhet për të, sepse mbi të rëndon vrasja e njerëzve të pafajshëm. Në demostratën e 21 janarit, pati një provokim të përsëritur, dhe arsyet janë duke dashur që të vendosë një gjendje të re me opozitën”.


“Demostruesit kanë pasur një reagim që nuk hyn në kornizën e nje proteste paqësore, se në 21 janar është provokuar rëndë nga qeveria dhe nga duart që çorientuan dhe policinë”.


Ndërsa kryeministri Sali Berisha akuzon kryeprokuroren Ina Rama dhe Edi Ramën për një puç shteti ndër të cilat duhet të paguhet, kreu i PS-së theksoi se në këto kushte po ndodh një grusht shteti i bardhë.
“Ajo që po ndodh është zhvilimi i një grushti shteti pa tanke, pa mjete ushatarake, por që synon kapjen e institucioneve nga qëndra e pushtetit ekzekutiv. Ky puç shteti i bardhë po organizohet dita ditës. Në këto kushte, kur ka një dhunë të përminutëshe të Saliut dhe regjimit të tij për të deligjitimuar Prokurorinë e Përgjithshme, mbase ka qënë një mënyre për ti dhënë një legjitimitet të plotë hetimeve nga ekspertë amerikanë”.


Kryesocialisti Rama siguroi komunitetin ndërkombëtar, por edhe të gjithë popullin shqiptar se e gjithë çfarë kërkohet është një proçes politik i arsyeshëm e të vendosen në tavolinë interesat e vendit.

Kisha e Shna Ndout në Laç, nis pelegrinazhi dimëror

Dita e 17 janarit është një ditë e veçantë për Kishën e Shna Ndout në Laç, pasi ndryshe konsiderohet se dita e shenjtë e kësaj kishe dhe është dita e pelegrinazhit për stinën e dimrit.

Njerëz nga qytete dhe fshatra të ndryshme të Shqipërisë kanë ardhur për t’u lutur në Kishën e Shna Ndout, kishë e cila për të gjithë pelegrinët është e shenjtë.

Ndërkohë që pas 3 muajsh, në stinën e verës fillon pelegrinazhi i 13 të martave, të cilat përkojnë me ditën e 13 qershorit, Ditën e Shënuar të Kishës së Shna Ndout.

Pelegrinë jo vetëm nga Shqipëria por edhe nga jashtë saj vijnë për t’u lutur gjatë pelegrinazhit të 13 të martave të Shna Ndout.

Kisha e Shna Ndout në Laç, renditet ndër 6 vendet më të mëdha të pelegrinazhit në botë।

Mark Marku: Rama foli në anglisht para shqiptarëve

Deputeti demokrat e quan absurd fjalimin në anglisht sot të kryesocialistit gjatë konferencës për shtyp

Politikë

Mark Marku: Rama foli në anglisht para shqiptarëve

Deputeti demokrat e quan absurd fjalimin në anglisht sot të kryesocialistit gjatë konferencës për shtyp

28 janar 2011 18:39

Deputeti demokrat, Mark Marku

“Fjalimi i Ramës në anglisht ishte një gjë absurde dhe paradoksale, pasi ai para tij kishte vetëm dy gazetarë italianë dhe gazetarë shqiptarë.

Dukej më shumë si një fjalim për ndërkombëtarët, sesa ata që kishte përballë dhe shqiptarët”.

Ky ka qenë pohimi i deputetit demokrat, Mark Marku, gjatë një interviste në studion e “ABC News” duke komentuar konferencën që kreu socialist mbajti pas manifestimit homazh të mesditës së sotme.

Sipas tij, opozita përveçse në rrugë siç po e nxjerr kreu i saj Edi Rama, ka vend për ta zhvilluar betejën e saj të ligjshme në parlament, ku ajo ka një numër të konsiderueshëm votash.

“Nuk mund të vendoset dialog me një forcë që përjashton veten”, tha më pas ai, duke iu drejtuar metodave që ka përdorur deri tani opozita.

E duke përmendur pretendimin e vazhdueshëm të opozitës për zgjedhjet e 28 qershorit, ai tha se ato në fakt ishin zgjedhje që i njohur gjithë bota.

“E përse duhet të ndërhyjë komuniteti ndërkombëtar? Që të bëjmë realitet ëndrrat e Partisë Socialiste? Ajo ka si ëndërr zgjedhjet e parakohshme”, tha më pas Marku.

A ishte 21 janari një grusht shteti?

Piro Misha

Sipas kryeministrit të vendit, në 21 janar në Tiranë ka patur një tentativë për grusht shteti. Sipas tij, kjo tentativë vazhdon, duke përfshirë, veç opozitës, prokuroren e përgjithshme dhe SHISH-in. Ministra, deputetë, nëpunës dhe mediat afër qeverisë, e trajtojnë këtë tashmë si fakt të mirëqënë. Po a qe vërtet kështu? Përgjigja e kësaj pyetje ka mjaft rëndësi, sepse akuza për grusht shteti duket se s’është thjesht pjesë e arsenalit të zakonshëm propagandistik të përdorur jo rrallë për të kërcënuar e trembur kundërshtarin, apo për t’i dhënë zemër e mobilizuar të vetët. Kjo akuzë ka përligjur refuzimin e kryeministrit për t’iu bindur urdhër ndalimit të lëshuar nga prokuroria për gjashtë krerët e gardës të akuzuar për vrasje. Me të është përligjur përdorimi i armëve të zjarrit dhe vrasja me to e tre demonstruesve, duke paralajmëruar madje, se në raste të tilla është e ligjshme të vriten jo tre, por dhe tridhjetë e më shumë vetë! Në këtë kontekst, kryeministri kërcënoi publikisht liderin e opozitës se do të ndëshkohej ‘në mënyrë ekzemplare e fatale”, nëse provonte dhe një herë të rrethonte kryeministrinë. Sërish në emër të pandehmës së një grushti shteti në vazhdim, kryeministri mblodhi gjeneralët e ushtrisë, duke kërcënuar me një fjalor vërtet rrëqethës se ‘do t’i shtypte kokën’ të gjithë atyre që do provonin ta përsërisnin një tentativë të tillë. Gjithnjë në emër të saj, policia ka kryer në orët e ditët pas ngjarjes një sërë veprimesh që në çfarëdo kushti do të ishin të dënueshme, siç është përdorimi abuziv i dhunës me të ndaluarit.
Sidoqoftë, pyetja e parë që shtrohet është, përse kësaj here kryeministri akuzoi për grusht shteti dhe jo më për ‘rebelim për të rrëzuar pushtetin’, siç ka bërë, për shembull, për atë që ndodhi më 1997! Sepse dihet që fjala grusht (apo puç) shteti ka një konotacion teorik e praktik të përcaktuar qartë: një grusht shteti nënkupton përpjekjen e befasishme për të rrëzuar e marrë pushtetin e shtetin nga forca e segmente të caktuara brenda vetë shtetit, sidomos ushtrisë. Në tekstin e tij tashmë të mirënjohur, “Një doracak për një grusht shteti", politologu dhe historiani i njohur amerikan Edward Lutwak, shpjegon se “Grusht shteti kemi atëhere kur një segment i vogël, por i rëndësishëm i aparatit shtetëror (zakonisht ushtria por jo vetëm ajo) përdoret për të përmbysur qeverinë, duke marrë kontrollin e saj.”Atëhere natyrshëm, del pyetja: Ç’ka parasysh Berisha kur akuzon për grusht shteti, po qe se s’e përdor këtë term në mënyrë figurative, apo siç përdorej vend e pavend fjala puçist gjatë viteve të diktaturës, për të akuzuar e dënuar çdo armik të mundshëm? Dhe duke vazhduar më tej në të njëjtën linjë: a është në kontakt kryeministri i vendit me kryetarin e shtetit? Ligji përcakton qartë masat që duhen marrë kur rendi kushtetues e siguria kombëtare janë të kanosura. Përse ai s’ka kërkuar mbledhjen urgjente të Këshillit Kombëtar të Sigurisë? Në kushtet e një grushti shteti në vazhdim, pranohet qoftë dhe shpallja e gjëndjes së jashtëzakonshme. Atëhere, përse s’e kërkon këtë masë, përderisa vendi, sipas tij, përballet me një rrezik të tillë? Përse s’arreston autorët e komplotit? Kudo në botën demokratike, nëse verifikohet e provohet se ndodh grusht shteti, autorët e një krimi kaq të rëndë, meritojnë ndëshkim të plot ligjor. Ç’do të thotë ai vallë, kur paralajmëron të mos e provojnë sërish. Kur bëhet fjalë për tentativë të mirëfilltë grusht shteti, një herë mjafton e tepron. Po kur premton se do t’i amnistojë të gjithë, sigurisht përveç Ramës, çka parasysh? Sepse, me ç’dimë, tagrin për të ndëshkuar e amnistuar e ka tjetërkush dhe jo kryeministri.
Po ka dhe diçka tjetër që të bie në sy. Nëse ai është i bindur se ka qenë tentativë për grusht shteti, përse në vendimin e Kuvendit të Shqipërisë të seancës të mbledhur me urgjencë në darkën e 23 janart, fjala grusht shteti s’përmendet asgjëkundi. Aty bëhet fjalë për krijimin e një Komisioni parlamentar hetimor për të hetuar “Veprimtarinë e institucioneve shtetërore për zbulimin, identifikimin, përballimin, neutralizimin, pengimin dhe ndëshkimin e veprimit të organizuar kriminal për dhunimin e institucioneve dhe përmbysjen e rendit kushtetues në datën 21 janar 2011.”
S’ka asnjë dyshim se në 21 janar në Tiranë ndodhi diçka tepër e rëndë. Pamë veprime të dhunshme që kishim vite pa i parë, të cilat në çdo rast e rrethanë janë të dënueshme. Në vartësi të optikës me të cilën njerëz të ndryshëm i shohin ngjarjet, faji i vihet njërës apo tjetrës palë si shkaktare të dhunës, por sidoqoftë ligji është fare i qartë se kush janë veprimet e ndëshkueshme për raste të tilla. Ka të tjerë që e fajësojnë opozitën jo vetëm që s’qe në gjendje të kontrollonte turmën e demonstruesve, por dhe për gjuhën nxitëse të përdorur përpara demonstratës. Dhe s’ka dyshim se dinamika e përgjegjësitë e asaj që ndodhi duhen gjykuar me gjakftohtësi e përgjegjësi, për t’i dhënë gjithkujt atë që meriton sipas ligjit (e vetëm ligjit). Por ama, s’ke si të mos shtrosh pyetjen, a mjaftojnë veprimet e dy tre qind vetëve që godasin policinë me gurë, çadra apo shkopinj, që të shpallet se paskemi patur një tentativë për grusht shteti? Sepse atëhere natyrshëm lind pyetja, po 14 shtatori i disa viteve më parë ç’ishte, kur turma me armë në dorë, e prirë nga ata që sot janë në pushtet, hyri dhe shkatërroi jo pak institucione, përfshirë kryeministrinë, ndërkohë që personi që sot mban vendin e zevendësministrit të mbrojtjes, doli në ekranin e televizionit shtetëror për të shpallur ngadhënjimtar marrjen e shtetit?
Sigurisht, s’përjashtohet që kryeministri të ketë të dhëna të tjera veç atyre që ka bërë publike dhe nëse ai arrin të sjellë prova bindëse se vërtet ka patur plane për një tentativë të tillë, unë i pari do isha në krah të qeverisë në mbrojtje të rendit kushtetues. Por atëhere pyetja shtrohet, përse s’i çon këto prova në institucionet e duhura të cilave kushtetuta iu jep të drejtën të hetojnë e ndëshkojnë autorët. Sepse në asnjë vend demokratik, kryeministri s’mund të jetë njëkohësisht prokuror, gjykatës dhe ekzekutiv. Thelbi i demokracisë qëndron pikërisht në ndarjen dhe pavarësinë e këtyre roleve. Përndryshe kemi hyrë në një rrugë ku vija ndarëse mes shtetit ligjor dhe atij antiligjor, hollohet mjaft, duke rrezikuar të këputet.
Në mbasditen e 21 janarit në mes të Tiranës u vranë tre njerëz. Të cilët, së paku nga sa u pa në televizione, në çastin kur u vranë s’po bënin asgjë të paligjshme, që të përligjte vrasjen e tyre me plumb. U plagosën, po me plumba, shumë të tjerë. Dhe nga të gjitha të dhënat e deritanishme, tregohet me gisht Garda e Republikës. Sigurisht, do të jenë hetimet ato që do provojnë të vërtetën, e cila duhet të dalë me çdo kusht, por le të jemi të qartë: nëse s’i shkohet deri në fund kësaj historie jo vetëm që do të krijohet një precedent me pasoja të paparashikueshme, por drejtësia në Shqipëri, edhe kështu mjaft e kontestueshme, ka për të marrë goditjen fatale. Në një shoqëri demokratike jeta e njeriut është mbi gjithçka tjetër.
Fatkeqësisht, përvoja e viteve të tranzicionit na ka mësuar se në politikën shqiptare ka shumë papërgjegjshmëri. Është kjo papërgjegjshmëri që e ka shndërruar politikën në një sherr pafund. Është kjo papërgjegjshmëri që e ka katandisur demokracinë e brishtë shqiptare në një shfaqje të deformuar ku mbizotëron logjika e më të fortit, duke demonstruar orë e çast muskujt në një garë ku mbizotëron logjika atavike sipas së cilës kush bërtet e kërcëllin më fortë dhëmbët, e tregon se është i zoti të rreshtojë më shumë trima pas vetes, shpallet fitimtar.
S’besoj të ketë shumë shqiptarë, me përjashtim të ca kokave të nxehta, që të mos jenë dakord me thirrjen që i bëhet këto ditë politikanëve shqiptarë për të ulur tonet. Unë do t’i bëja thirrje të kafshojnë gjuhën përpara se të hapin gojën të flasin, sepse siç thotë urtësia popullore, fjala të vret. Prova për këtë kemi plot. Duke nisur nga seanca e turpshme e fundit parlamentare. A s’ishte ajo një paralajmërim i tragjedisë që ndodhi? Dhe s’ka dyshim se tash e tutje politikanëve tanë u duhet kërkuar me forcë që të heqin dorë njëherë e mirë nga retorika e forcës, duke u treguar të përgjegjshëm për atë që thonë. Duke i kërkuar kryeministrit që të sillet e flasë siç i ka hije një kryeministri, pa shpërthime të papranushme si ai i seancës së fundit parlamentare; duke i kërkuar kryetares së Parlamentit që të kuptojë se cili është roli i saj institucional, duke mos i hedhur më orë e çast benzinë zjarrit; duke i kërkuar opozitës që të përdorë një gjuhë të përgjegjshme e të moderuar.
Por s’duhet harruar se ngjarjet e 21 janarit grisën përfundimisht në sy të të gjithëve fasadën e normalitetit të jetës sonë politike e institucionale. Dhe për t’u kthyer në normalitet, s’mjafton thjesht t’i hedhim ca ujë zjarrit. Duhen kërkuar rrënjët e thella të krizës, arsyet e atyre deformimeve jo të pakta që karakterizojnë sot jetën shqiptare, për t’i hapur rrugë vërtet një zgjidhjeje të qartë, të besueshme e afatgjatë politike.