Ish-kryeministri Sali Berisha ka ashpërsuar akuzat ndaj ish- aleatit Ilir Meta, për të cilin mbrëmë në emisionin “Fakt” të gazetarit Çim Peka në UTV News tregoi se i kishte kërkuar indirekt që të bëhej president i vendit. Sipas tij, nuk mund ta pranonte një gjë të tillë, pasi kreu i shtetit i takonte PD-së. Berisha foli edhe për opozitën e re, si po e drejton atë Lulzim Basha, roli i tij në politikë dhe premtimi se nuk do të kthehet më kurrë në krye të PD-së
.
A ka kërkuar z. Meta që të bëhej president dhe a ka tentuar t’ju bëjë presion, qoftë dhe me largimin nga mazhoranca, lidhur me zgjedhjen e Presidentit të Republikës?
Tek unë nuk ka bërë kërkesë që të jetë, direkt; indirekt ka pasur. Natyrisht, në qoftë se kanë qenë mesazherët e tij, kanë marrë një “Jo” kategorike. Më parë unë do të shkoja në zgjedhje; nuk kisha unë autoritet që t’i jepja postin e presidentit një aleati, të cilit i kisha dhënë në atë periudhë, në atë koalicion, të paktën 40% si pushtet numerik, (po shprehemi kështu, se këta socialistët e masin me para, unë nuk e kam matur ashtu pushtetin), si pushtet numerik 40% më të madh se atë që ka sot në katër deputetë.
Dhe kurrsesi presidenti nuk do të dalë nga LSI-ja dhe nuk e shikonit z. Meta si President të Republikës?
Nuk është problemi këtu. Nuk e shikoja PD-në në asnjë moment që të lëshonte postin e Presidentit.
Nëse do i ktheheshit fushatës, a do ta bënit ndryshe në aspektin me kundërshtarët?
Problemi është se në zgjedhjet e fundit, është e vërtetë se si PD nuk kemi bërë fushatë kundër LSI-së, por LSI-ja ishte pjesë qenësore e qeverisë. Unë nuk arrita ta zbërthej se në çfarë mënyre do të bëja unë fushatë kundër qeverisë, i cili deri një muaj parë kishte qenë në qeveri. E favorizoi kjo? Edhe mund ta ketë favorizuar, por në politikë ka ca rregulla. Se sa i besueshëm do të isha unë për shqiptarët nëse do të sulmoja LSI-në, atë nuk e di. Unë e di se edhe në krahun e PD-së ka individë që thonë ‘nuk u sulmua’, por tani shkaqet e humbjes do t’i analizojë PD-ja me hollësi. Unë dhashë dorëheqjen, dhe një nga arsyet, ose një nga qëllimet e dorëheqjes ishte që t’i jap mundësi PD-së të bëjë një analizë të thelluar të humbjes së zgjedhjeve.
Z.Berisha deklarata e dorëheqjes suaj ka bërë xhiron e rrjeteve sociale, jeni shprehur para militantëve të PD, më besoni mua për humbjen, përgjegjësia është vetëm e Sali Berishës. A i qëndroni kësaj deklarate?
I qëndroj. Ka një gjë këtu, padiskutim ai që ishte udhëheqësi kryesor, ai ka përgjegjësinë kryesore. Pse çfarë të thoja përgjegjësinë e keni ju. JO. Përgjegjësinë e kisha unë , unë drejtova fushatën, unë përcaktova paketën e premtimeve dhe bëra një nga fushatat më intensive të jetës sime. Kjo është e vërteta.
A mendoni se partia që ju keni drejtuar dhe tani drejtohet nga z.Basha ka gjashtë muaj që ka humbur zgjedhjet dhe akoma nuk ka filluar një analizë dhe nuk di se çfarë e çoi në këtë humbje?
Mendoj se partia duhet të fillojë sa më shpejt analizën dhe zgjedhjet, kjo është e domosdoshme. Mendoj, nga ana tjetër, se partia u përball me një situatë kryekëput anormale. Me një situatë në të cilën çdo ditë prodhohen zhvillime negative dhe energji negative. Çdo ditë, një makineri e tërë funksionon në funksion të gënjeshtrës për qytetarët, nga më të thjeshtat: tek vizita zyrtare në 10 “Downing Street”, që ishte një shëtitje thjesht si kërkesë për të vizituar se si funksionon kryeministria britanike dhe iu servirej shqiptarëve si vizitë zyrtare
Si e keni ndjekur garën e PD-së? Ka pasur akuza nga mediat e majta se keni ndikuar në garë në favor të z. Basha. A ishte paracaktuar kryetari i partisë?
Së pari, a ishte i paracaktuar kryetari i partisë? Në mënyrën më absolute, kur kam dhënë dorëheqjen nuk e kam ditur kurrë se cili do të garonte. Unë mund ta bëja edhe këtë, por mendova në radhë të parë të bëja detyrën time dhe detyra ime ishte të jepja dorëheqjen dhe të hapja rrugën. Së dyti, të dy kandidatët, qoftë z. Lulzim Basha, qoftë i ndjeri Sokol Olldashi, të cilët më kanë pyetur: ‘A na thua të garojmë?’, kanë marrë një përgjigje të njëjtë: ‘Nuk ju them PO, as JO’, - sepse nuk doja të investoja, - ‘vendimin merreni vetë krejtësisht pa mua’. Kjo ka qenë përgjigjja ime për të dy.
Ka gati 4-5 muaj që pas 23 vitesh nuk është Sali Berisha lider i PD por është z. Basha, cili është gjykimi juaj për perfomancën e tij në krye të PD. Keni patur një pritshmëri me të madhe apo ka kaluar pritshmëritë tuaja?
Në tërësi, drejtimi politik nuk është natyrisht ai që ishte, sepse unë kam pasur shëmbëlltyrën time, ai ka të vetën, por gjykoj se kjo duhet të jetë dhe kështu duhet të jetë. Ai është një lider i ri që do të përcaktojë të gjithë shëmbëlltyrën e lidershipit të ri
Megjithëse keni ikur nga drejtimi i opozitës, ju jeni mjaft aktiv. A ka hequr dorë Sali Berisha ndaj idesë për t’u rikthyer sërish i pari i PD-së?
Së pari, t’i marrim gjërat siç janë. Sali Berisha ka dhënë dorëheqje nga kryetari i PD-së. Kjo është dorëheqje e parevokueshme e imja, ky ka qenë vendim.
E parevokueshme, që do të thotë, në asnjë rrethanë ju nuk ktheheni më?
Jo, nuk kthehem më. Kryetar i PD-së nuk kthehem më. Unë kam dhënë dorëheqjen time. S’kam dhënë dorëheqje nga asgjë tjetër, ‘full-stop’. Unë jam 24 orë në 24 orë i angazhuar dhe i përkushtuar në politikë dhe këtë e kam thënë ditën e parë kur kam dhënë dorëheqjen, këtë e them sot dhe do ta them deri në orën e fundit kur do të merrem me politikë. Ky jam unë. Tani po të më pyesësh a merrem me politikë? Ndoshta nga kohërat që jam marrë më shumë. Natyrisht, nuk drejtoj PD-në, por politikë nga mëngjesi deri në darkë.
Ka pasur një lider të fortë Izraeli, Ariel Sharon, i cili në çdo zgjedhje e falte partinë dhe në garë e fitonte vetë. U shprehët se në asnjë rrethanë nuk ktheheni më kryetar i PD-së, por vetëm nga kjo keni hequr dorë; po nga gjërat e tjera?
Nga asgjë tjetër, dhe do të ishte gjëja më e pandershme për njeri të mendojë gjë tjetër. Zotëri, unë drejtova një forcë politike 23 vjet, me të gjitha bilancet; unë dhashë dorëheqjen për të respektuar një parim, një vendim timin, por edhe një parim të madh të demokracisë, por mbi të gjitha të dinjitetit njerëzor. Dinjiteti është i pari dhe jam i bindur se demokratëve iu lashë një trashëgimi që e meritonin. Pastaj të tjerat janë dhe më vjen keq ta them, por e kam nisur këtë rrugë para Partisë Demokratike, kur nuk kam ditur se do të jem i zoti një ditë të merrem me politikë, por e kam nisur dhe e kam nisur me një platformë, nuk e kam nisur me copëza. Cilido që dëshiron t’u rikthehet atyre shkrimeve, në një kohë kur Shqipëria ishte diktaturë dhe ekzekutonte njerëz në kufi, do të gjejë që aty ka një platformë parimesh, për të cilat unë kisha vendosur të luftoja. Të mendojë kush se unë tërhiqem prej tyre sot? Kurrë!
Ju sëbashku me kryetarin e PD z.Basha jeni bashkuar edhe si politikan, por edhe si qytetar një proteste para zyrës së Edi Ramës për të ndalur ardhjen e armëve kimike në Tiranë, të cilët duket se ishte një nder që amerikanët ia kishin kërkuar Shqipërisë?
Nuk kishte të bënte në mënyrë absolute me miqtë tanë amerikan, kategorike. Kishte të bënte me një keq menaxhim absolute të një njeriu, që kush tjetër si ai nuk mund të vepronte. Kaq.
Keni pritur në këtë zyrë z.Moore për një kohë jo të shkurtër krahasuar me vizitën që ka bërë tek z.Rama vetëm 6 minuta. Z.Berisha sot me këtë informacion që keni me këtë transparencë aq sa është e mundur, a do të mbanit të njëjtin qëndrim për refuzimin e armëve kimike?
Tani, nuk duhet të pyetet tjetri po të ishe sikur të ishe, sepse ai e ka shumë të vështirë të thotë, por një gjë të siguroj, që miqësia dhe luajaliteti im ndaj atij vendi, nuk mund të cenohej, kjo është ajo që mund të them unë, cili do të ishte vendimi në atë kohë? Gjykuar nga ai moment do të ishte Jo, por nuk mund ta them në mënyrën më përfundimtarë këtë, sepse duhet të jesh në funksion dhe të bësh të gjithë vlerësimet dhe të përcaktosh taktikën, të përcaktosh qëndrimin. Të jap dy shembujt. Njëherë u tha 10 vjet. Tani del që ajo bëhet me 60 apo 90 ditë. Unë një gjë them të sigurt, që PO-ja do të ishte PO dhe Jo-ja do të ishte Jo, që në fillim.
Pra në rast se ju do të jepnit fjalën ju do të shkonit deri në fund?
Absolutisht nuk mund të tradhtoja kurrë.
Edhe kundër atij vullkani protestash?
Do të bëja zgjedhjet e mia unë pastaj. Ka shumë mënyra. Edi Rama duhet të jepte dorëheqjen. Në qoftë se gaboi. Politikani është politikan. Në qoftë se qytetarët e mi do të ngriheshin me forcë dhe do të thoshin se ne nuk ta pranojmë këtë, unë do tu thosha për nderin tuaj dhe nderin tim do të jap dorëheqjen.
Në 23 vite karrierë aktive politike, si kryetar opozitë, më vonë si president, si kryeministër, a keni ndonjë peng se keni prishur ndonjë marrëveshje me SHBA?
Nuk di absolutisht as edhe një të vetme. Kemi rifilluar marrëdhëniet më të ngushta në aerodromin e Gjadrit, që i botonin gazetat. Po në negociata, por jo në publik, mund të ketë pasur ndonjë kërkesë që e kam konsideruar të pamundur dhe ju kam thënë jo, por në mënyrë absolute nuk ka pasur asnjë keqkuptim se ju kam shpjeguar pse-në.
Po nuk i keni ikur fjalës?
Fjalës së dhënë! Asnjëherë, kurrë.
Se dhe ju e dini që ka pasur analiza të pafund që ’97 lidhet me një ftohje me SHBA?
Ftohje ka patur, por jo se i kam ikur fjalës. Jo. Asnjëherë dhe nuk mund të gjendet ndonjë rast. Sa më serioz mund të kemi qene dakord mund të mos kemi qene dakord për gjera të ndryshme. P.sh. Nuk kemi rënë dakord për numrin e zonave që do të përsëriten zgjedhjet etj, por jo fjalës. Nuk ju kam thënë kurrë atyre se do ti bëj gjithë zgjedhjet dhe njëherë po bëj 1/3. Jo. Unë kam pasur fjalën fjalë.
Kryetari i parlamentit ju akuzoi se nuk po e fshihni kënaqësinë që Shqipëria nuk e mori statusin, madje ju tha se po bëheni më holandez sesa z.Basha. Ka bërë një akuzim tjetër ndaj jush, ku është shprehur se “anëtarësimi i Shqipërisë në Konferencën Islamike nga z.Berisha i ka bërë skeptik holandezët dhe se shqiptarët shikohen si myslimanë dhe e kemi të pamundur ta marrim statusin”. Madje ju ka ftuar ta vizitoni Holandën bashkë me z. Meta, për t’i bindur se nuk jemi islamikë. Cili është komenti juaj?
Komenti im është ky: Do t’i them z.Meta se, njeriu i parë që më ka përgëzuar për atë akt, është Papa Gjon Pali i II dhe se ai akt, është një shpikje shumë e gabuar e atyre, të cilët tre muaj rresht punuan çdo ditë kundër integrimit dhe tani duan të lajnë duart me deklarata të tilla. Unë mund të them kaq: Procesi i integrimit është një proces që kalon dhe ka si kusht sinekuanon, standardet europiane, të cilat nuk janë identike, por të përafërta, janë vlera demokratike. Në qoftë se z.Meta mendon se është standard rrëzimi i neneve të Kushtetutës me vendime të qeverisë ‘Rama-Meta’, se është standard rrëzimi i ligjeve të vendit me vendimet e qeverisë ‘Rama-Meta’, se është standard rrëzimi i vendimeve të gjykatave me vendimet e qeverisë ‘Rama-Meta’, se është standard të rrafshosh shtëpinë e vjehrrit të kundërshtarit politik, që është me leje, që është e ndërtuar në një pronë private, që është e mbrojtur nga një vendim gjykate, që është edhe në Hipotekë, unë i them z.Meta se këtë s’e bën kurrë një njeri normal, as të parën, as të dytën, as të tretën. Unë i them z.Meta se këto nuk i përtyp kush në Europë pse i përtyp ai me tavën e ngjalave me Edi Ramën. Unë i them se këtë s’e bën kush, sepse nëse ti e bën atë akt një muaj resht, ty s’të mbetet gjë tjetër veçse vetëm t’i vësh një pritë kryetarit të opozitës dhe ta eliminosh atë, kjo është më e rënda pas asaj. I them të gjitha këto me shpresë se do të gjykojnë pak më ndryshe, sepse po vazhduan kështu, unë të garantoj se as shtatorin e 2014-ës, as shtatorin e 2015-ës dhe as shtatorin e 2016-ës status nuk mund të ketë. Nuk mund të ketë status.
Zoti Berisha a keni frikë se Shqipëria mund të projektojë një tronditje ekonomike si ajo e ’97?
Kjo që po bën qeveria është absolutisht lule ’97-ta çdo të jetë kjo pas dy vitesh. Çfarë patëm në ‘97, patëm anën më negative se qytetarët humbën, por sektori publik nuk pati asnjë qindarkë të humbur. Lexo pak është një shkrim themelor nga studiues britanik, të cilin parlamenti britanik e ka adaptuar si dokument zyrtarë ne këtë shkrim, kjo quhet piramidëri, identike thotë ai me atë të gangsterëve shqiptarë të vitit ‘97. Kjo që po bën qeveria është një piramidë në sektorin privat, qeveria po shndërron financat publike në një piramidë të tmerrshme, nga e cila do të vuajë çdo shqiptarë në qoftë se e toleron.
Kjo është paketë që votohet në parlament?
Votohet në parlament, por lëvizja qytetare mbarë popullore, është pastaj një parlament në vete-vete ajo.
Ju po paralajmëroni protesta kundër rrënimit të ekonomisë nga kryeministri Rama?
Absolutisht mbështes çdo protestë, demonstratë, grevë, për t’u ndaluar shndërrimi i financave publike të Shqipërisë në një piramidë që do t’i kushtojë çdo qytetari shqiptar, dhe unë kam besim të madh, që shqiptarët kanë tashmë vetëdijen e nevojshme për tregun për të ndaluar këtë rrokullisje të madhe që iu ofron ky ekip.
(GSH/BalkanWeb)
No comments:
Post a Comment