Saturday, February 19, 2011
Frikë nga monstra që pollën vetë
Përshkallëzimi i vazhdueshëm i nismave të opozitës tani duket se ka marrë një kuptim. Thirrjet për mosbindje civile, pjesëmarrja e kushtëzuar në Parlament, protestat e dhunshme, të gjitha këto aksione, pra, është thënë shpesh se kanë një qëllim të vetëm: arritjen e zgjedhjeve të parakohshme. Por, deklaratave të mëparshme, atyre për zgjedhje “sa më shpejt”, madje për zgjedhje “pa Saliun kryeministër”, opozita ka filluar t’u japë, ditëve të fundit, një kuptim të ri. Shumë nga përfaqësuesit e saj, në ambiente informale e madje edhe në takime me të huajt, kur detyrohen të shpjegojnë radikalizmin e vazhdueshëm, e lidhin këtë me zgjedhjet e parakohshme që duhet të mbahen maksimumi para qershorit të 2012-ës? Po përse një datë e tillë? Pse po del tani, gjithnjë e më me forcë, ky limit kohor, si kufiri i fundit për garën e përshpejtuar elektorale?
Argumenti që japin opozitarët është i thjeshtë. Në mesin e vitit të ardhshëm ky Parlament do të duhet të zgjedhë Presidentin e ri. Dihet tashmë se për herë të parë kjo zgjedhje do të bëhet jo më me 84, por me 71 vota, që kjo mazhorancë ende sot i ka. Pra, me një fjalë, përpos një presioni të madh ndërkombëtar, që nuk duket në horizont, pasardhësi i Bamir Topit, pas diçka më shumë se një viti, do të jetë një pd-ist i flaktë, një ushtar i Berishës. Dhe ky president i ri do të zgjidhet pa asnjë kompromis, pa pasur nevojë për asnjë lëshim. Pakti i vetëm me të do të jetë ai me Kryeministrin: Unë të çoj në krye të shtetit, ti më jep atë që unë kërkoj nga ai post. Dhe gjithnjë sipas opozitarëve që vazhdojnë me këtë logjikë, pas këtij çasti, rrezikojnë të bien njëra pas tjetrës disa institucione. Së pari, Prokuroria. Së dyti, Shërbimi Informativ. Së treti, Gjykata e Lartë edhe ajo Kushtetuese. Ndaj pyetja që shtrojnë ata e që po e përdorin gjithnjë e më shpesh edhe si argument me ndërkombëtarët, është e thjeshtë: Pas atyre që Berisha po bën sot me këto institucione të pavarura, a mund të kemi garanci për nesër? Nëse një gjë e tillë ndodh, nëse PD-ja vendos në krye të shtetit një militant të sajin, kush mund të sigurojë që edhe emrat që ai do të propozojë në drejtimin e këtyre institucioneve nuk do të përzgjidhen vetëm sipas kritereve të militantizmit? Dhe kryepyetja që pason është: A mund të hyhet në zgjedhje me këto kushte, pra me gjykata, prokurori dhe ShISh të gjunjëzuar? A nuk kemi ne opozitarët të drejtë të kërkojmë një garë të re elektorale, para qershorit të 2012?
E shtruar kështu, kjo pyetje duket sikur ka kuptim. Në pamje të parë ajo të duket sikur krijon një shqetësim. Sepse ky sistem që kemi krijon qetësi për të gjitha palët vetëm përmes balancimit e kontrollit mes pushteteve dhe jo përmes vartësisë së tyre. Aq më e vërtetë bëhet kjo, kur fjala është për Berishën dhe për sjelljen proverbiale që ai ka ndaj pushteteve të tjera.
Por, përtej kësaj pamjeje sipërfaqësore, argumenti më i ri që po fillon të ngrejë kokë tek opozita nuk qëndron. Nuk qëndron as për arsye reale, as për arsye morale.
Së pari, sepse askush nuk mund ta mbështesë kërkesën e tij mbi një hipotezë, pra mbi atë se pas 2012-s, Berisha do t’i zaptojë gjithë krerët e institucioneve, duke vënë edhe në Presidencë edhe në ShISh edhe në Prokurori militantë të tij. Argument absurd, mund të thotë dikush. Historia ka treguar që Berisha do dhe kërkon vetëm këtë. Por nëse u kthehemi argumenteve historikë edhe ato janë në disfavor të kësaj frike opozitare. Sepse Berisha vërtet ka emëruar edhe Alfred Moisiun, edhe Theodhori Sollakun, edhe Bamir Topin, edhe Ina Ramën, por shumë shpejt ai ka bërë pothuajse gjithçka për t’i kthyer ata në armiq. Pra, frika në marrëdhëniet e Berishës së dytë me institucionet e pavarura nuk është ajo e akaparimit të tyre përmes vasalëve, por ajo e zaptimit të tyre përmes luftës dhe trysnisë që ai ushtron ndaj atyre që i ka shpallur armiq. Por, edhe sikur këto argumente të ishin të diskutueshëm, një i tretë, moralisht i pakundërshtueshëm, nuk i jep të drejtë socialistëve të ankohen sot dhe ta shndërrojnë atë në kauzë për zgjedhje të parakohshme. Ata vendosën vetë, me votat e tyre, me bekimin e turpshëm të Edi Ramës, të bënin ndryshimet kushtetuese të 21 prillit 2008. Pikërisht ato ndryshime, që do i japin mundësinë, në qershor të 2012, një mazhorance të vetme të zgjedhë Presidentin e Republikës e për pasojë edhe institucionet që varen prej tij. Ndaj, ata sot kanë më pak të drejtë se kushdo, që një rregull që ia kanë imponuar vetë sistemit, ta përdorin si armë për të luftuar sistemin. Ndoshta socialistët sot, ashtu siç ndodh rëndom, më shumë se gjithçkaje, i frikësohen asaj që kishin ideuar e planifikuar vetë me këtë ndryshim kushtetues. Pikërisht për këtë ata nuk kanë moral të kundërshtojnë. Nëse një skenar si ai që ata po parashtrojnë me frikë ndodh, kjo do të ishte keq për të gjithë shqiptarët. Por, nëse kjo e keqe na ngjan vërtet, ajo do të shërbente vetëm për një gjë, për të penalizuar, së pari, ata që dhanë viston për lindjen e saj./MAPOONLINE
PS hyn në zgjedhje, ja kandidatët për bashkitë e mëdha
Socialistët do të jenë pjesë e garës së ardhshme për zgjedhjet e pushtetit vendor. Partia Socialiste ka larguar çdo dyshim për mospjesëmarrje në to, dhe ditët e fundit ka nisur veprimin konkret, jo vetëm për përgatitjen e strukturave, por edhe për përzgjedhjen e kandidatëve. I mandatuar nga Asambleja Kombëtare si sekretar për Pushtetin Vendor, deputeti Bashkim Fino ka nisur dhe po vazhdon një sërë takimesh me deputetët e secilit qark, nga ku po merr edhe kandidatët për kandidat për njësitë e qeverisjes vendore. Ndonëse procesi nuk ka ecur me të njëjtin ritëm për të gjitha qarqet, një pjesë e mirë e tyre kanë paraqitur emra konkretë, të cilët gjatë ditëve në vijim do të diskutohen edhe një herë me Asambletë e PS-së në rrethe dhe më pas do t’i kalojnë kryesisë për përzgjedhjen finale. Procesi, siç mësohet, ndryshe nga disa bashki, ka qenë më i lehtë për komunat, ku thuajse në shumicën dërmuese kanë dalë kandidatët për kandidatë.
Rikonfirmohen
Padyshim që Tirana do të jetë qyteti ku do të përqendrohen forcat dhe energjitë më të mëdha të dy kampeve politike. Kush fiton Tiranën, ka fituar pothuaj zgjedhjet, është fjalia që ka një vit që qarkullon në kryeqytet, por si për të bërë më të nxehtë betejën elektorale, as PD e as PS nuk kanë shpallur dy emrat. Edi Rama nuk ka vendosur ende rikandidimin dhe deri në minutën e fundit mund të ndodhë gjithçka.
Një nga qytet ku gara për zgjedhjet vendore pritet me shumë interes dhe kjo për shkak se raportet e votave mes dy kampeve në zgjedhjet e shkuara nuk sigurojnë një fitues paraprak është bashkia e dytë më e madhe në vend, pra Bashkia e Durrësit. Kalimi i LSI-së në qeverisje bashkë me PD-në ka eliminuar diferencat mes dy kampeve në këtë qytet, por kjo nuk ka penguar socialistët që të rikandidojnë sërish kryetarin aktual Vangjush Dako. Emri i Dakos është i vetmi që flitet në strukturat lokale të partisë, por që duket se konfirmohet edhe nga deputetët e këtij qarku, të cilët e kanë servirur atë te sekretari për pushtetin vendor Bashkim Fino si kandidaturë të vetme. I pyetur për një rikandidim të mundshëm të tij në zgjedhjet e 8 Majit, Dako është shprehur se “rikandidimi im është çështje e strukturave dhe forumeve të PS-së, pasi ato do të vendosin për emrat konkretë, por nëse kjo gjë ndodh, atëherë unë deklaroj se jam i gatshëm të garoj për të qenë përsëri në krye të Bashkisë së Durrësit”. Ashtu si Durrësi, edhe në Bashkinë e Elbasanit, PS do të rikandidojë me kreun aktual Qazim Sejdini. Edhe pse deri më tani në të gjitha bashkitë dhe komunat e tjera nuk ka asgjë të zyrtarizuar, rasti i Sejdinit konsiderohet nga deputetët e këtij qarku si i sigurt dhe i vetëm. Një gjë të tillë e ka rikonfirmuar edhe kryetari i PS-së së rrethit Astrit Halili, i cili u shpreh dje se “ka qenë PS e Elbasanit ajo që i kërkoi Sejdinit që të rikandidojë. Nuk është thjesht një dëshirë e z. Sejdini, por kërkesë e PS që të përfaqësohet me atë”. Ndërkohë që për bashkitë e tjera të vogla të këtij qarku ende nuk është mbyllur asgjë, pasi deputetët socialistë nuk kanë deklaruar ende në qendër emrat që ata mendojnë se do mund të përfaqësonin PS-në në këto zgjedhje. Një tjetër bashki ku PS duket se nuk ka kandidaturë tjetër përveç kreut aktual është edhe ajo e Vlorës. Kështu, deputetët e këtij qarku në bashkëpunim edhe me degën e PS-së për këtë qytet dhe rreth, kanë propozuar në takimin e zhvilluar disa ditë më parë me Bashkim Finon, emrin e kryetarit aktual të baskisë, Shpëtim Gjika. Megjithatë, në rastin e Vlorës procesi i përzgjedhjes së kandidaturës së Gjikës nuk ka kënaqur të gjithë deputetët, pasi një pjesë e tyre nuk e kanë pranuar këtë lloj “emërimi” nga lart, duke kërkuar që kandidaturat të votoheshin më parë nga baza. I vetëm në këtë garë paraprake është edhe kryetari i tanishëm i Bashkisë së Korçës, Niko Peleshi. Deputetët e këtij qarku dhe degët e partisë në bazë nuk kanë sjellë emër tjetër në qendër, përveç atij të Peleshit.
Të tjerët
Ndryshe nga kolegët e tjerë në bashkitë Elbasan, Vlorë, Korçë dhe Durrës, kreu aktual i Bashkisë së Fierit nuk është i vetmi kandidat për kandidat për zgjedhjet e ardhshme vendore për Partinë Socialiste. Kështu, deputetët e këtij qarku dhe degët e PS-së për këtë qytet dhe rreth kanë evidentuar krahas tij dhe emrin e Arjon Muçajt. Të dy emrat i janë bërë të ditur edhe sekretarit të pushtetit vendor, Bashkim Fino. Në të njëjta pozita duket se gjendet edhe kreu aktual i Bashkisë së Beratit, Fadil Nasufi, i cili për të rikandiduar duhet të mundë në Asamblenë e Rrethit dhe më pas në kryesinë e PS-së në qendër, konkurrencën e kreut lokal të partisë, Selman Hodaj, dhe dy kandidatëve të tjerë Pelivan Shatri dhe Stavri Cecës. Në të njëjtat pozita gjendet edhe kreu aktual i Bashkisë Gjirokastër, Flamur Bime, i cili gjendet në balotazh me pedagogen Elvira Shapllo. Ndonëse zyrtarisht nuk janë bërë publike emrat e kandidatëve për Bashkinë e Shkodrës, në strukturat drejtuese të PS-së janë disa emra që përfliten se do jenë kandidatë që do përballen në zgjedhjet e ardhshme për pushtetin vendor. Në ambientet socialiste të Shkodrës deri më tani flitet për emrin e kryetares së PS-së së qytetit, Keti Bazhdari, dhe kryetarit të PS-së së Rrethit, Genc Uruçi. Por megjithatë, mësohet se këta nuk do jenë të vetëm, pasi edhe deputetët e këtij qarku bëjnë të ditur se nuk i kanë mbyllur ende listat për kandidatë për Bashkinë Shkodër dhe për rrjedhojë nuk i kanë paraqitur as në qendër. Pritet që ky proces të përfundojë javën e ardhshme, ashtu siç është mbyllur për pjesën dërmuese të komunave të këtij qarku. Tre kandidatura janë paraqitur në qendër edhe për Bashkinë e Lushnjës dhe konkretisht Gentian Nushi, Bujar Çela dhe deputeti Fatos Tushe./MAPOONLINE
Protestat e PS-së, e kthejnë të premten në ditë ankthi dhe stresi për qytetarët
Dita e premte në Tiranë është kthyer në një ditë ankthi dhe stresi për qytetarët.
Rrugët janë më të boshatisura se zakonisht, lokalet dhe bizneset mbyllen më herët, pasi ndihet në rrugë frika nga dhuna e protestave të opozitës.
E premtja nuk është dita e fundit e lodhjes së përjavshme, por fillimi i stresit të çdo banori.
Që prej 21 janarit, qytetarët e shohin të premten si një ditë ankthi dhe stresi, ku evitohen daljet nëpër rrugë, që në pjesën më të madhe të ditës janë bosh.
Bizneset mbyllen dhe lokalet janë bosh, por edhe shkollat mbyllen më herët.
DIKTATORI I MALLKUAR
E hënë, 18 shkurt 1991.
Kishte nisur një mbledhje e Komisionit Nismëtar të PD-së. Hyn Azem Hajdari: "Studentët e pedagogët mbyllën derën e Pallatit të Kulturës në Qytetin e "Studentëve". Janë futur në grevë urie. Ju vazhdoni mbledhjen. Unë do të shkoj tek studentët!" Dy orë më vonë u ngjita në Qytetin e "Studentëve". Ishte krijur Komisioni Drejtues i grevës. Bënin pjesë: Arben Lika, Arian Manahasa, Blendi Gonxhe, Mesila Dode, Ndue Lugja, Ilir Dizdari, Ridvan Peshkëpia etj…Gjallëri e madhe. Veç studentëve kishte edhe qytetarë. Një radhë e gjatë. Kishte kërkesa për vetëngujim. Çudia më e madhe e këtij fundshekulli! Ndoshta e paparë. Sakrificë 723 jetë të rinjsh! Dhe përse? Për të hequr emrin e diktatorit nga universiteti?!
U ktheva në shtëpi. Ndjeja një trysni. Vendosa të shfletoj skedat. (Në atë mot në Tiranë, nuk kishte më shumë se 5-6 kompjutera.) Fillimisht pa ndonjë qëllim. Shënimet i lexoja jo duke ndjekur kronologjinë e ngjarjeve, por të kundërtën e tyre. Një frazë e nënvizuar: Disa ditë më parë u përurua nga studentët "Sheshi i Demokracisë"… Sheshi? Diçka më ngacmoi kujtesën. Një shesh i largët. U ktheva në kohë. Sheshi "Tjenanmen" në Pekin! Pranvera kineze '89. Mijëra studentë ato ditë qershori manifestuan për demokraci të vërtetë... Kundër tyre ushtria mbi tankse. Zjarr!... 3 mijë të vrarë… U trondit bota. Qindra reportazhe. Kronika. Deklarata nga aktorët politikë.
Fransua Miteran, President i Francës: "Një regjim që për të mbijetuar qëllon mbi të rinjtë, nuk ka të ardhme". Theçer, Kryeministre e Anglisë: "Të qëllosh si i verbër kundër popullit! A nuk flet kjo për diferencat midis shoqërisë demokratike perëndimore dhe shoqërisë socialiste".
Ora 22:00.
Bie telefoni...Alo...Kemi mbledhjen e Komisionit Nismëtar... Ju presim...Po pse? Partia Demokratike kishte propozuar një referndum mes studentëve dhe pedagogëve për heqjen e emrit të diktatorit nga universiteti. Referendumi do të ishte i vlefshëm, nëse 70 përqind votonin pro. Ndërkohë, partitë politike kishin kërkuar një takim me Presidentin Ramiz Alia. Berisha, Azemi, Eduardi dhe Preçi ishin nisur që në ora 21:00. Po kalonte ora 1… Disa humbën durimin dhe u larguan për në shtëpi. Unë me Frrok Çupin, kryeredaktorin e "RD"-së, vendosëm të presim tek dera e Presidiumit. U hap porta. Takuam Eduard Selamin:
-Nuk ka perëndi që e kupton Ramiz Alinë! Vetë e pranoi në fillim idenë e një referendumi për heqjen e emrit të Enver Hoxhës nga universiteti. Por e dini si e përfundoi takimin? Nuk ka bazë ligjore për një veprim të tillë?!
U vendos të shkonim për të biseduar me përfaqësinë e studentëve dhe të pedagogëve. Ndërkohë, ora kishte arritur 02:00. Për shumë kohë më mbeti e regjistruar në mendjen time pamja e kordinatorëve, e shkallëve dhe sallave, ku kishin zënë vend studentët. Shumica flinin përtokë, duke shtruar në çimento nga një batanie. Disa rrinin ende mbi karrige. Të tjerë luanin me letra.
U futëm në një dhomë të veçantë. U ulëm. Mes nesh ishte Ylli Vejsiu, Përparim Dervishi, Blendi Goxhe, Ridvan Peshkëpia. Për disa çaste ra qetësia. Një qetësi mbytëse. Përfaqësuesit e studentëve dhe të pedagogëve, edhe pse të lodhur e të cfilitur edhe pse të pagjumë, mendjen e kishin të kthjellët. Të gjithë kishin një mendim: "Nuk është koha për kompromise! Nuk dalim nga ngujimi pa lexuar vendimin e qeverisë: Universitetit të Tiranës t'i hiqet emri i Enver Hoxhës! Ky është postulati i studentëve. Çdo alternativë tjetër është e pavlefshme". U larguam. Tek dera takova djalin e motrës, studentin e Arteve Artjan Myrtezai!
- E mor dajë! Mos doni të na shisni?!...
E martë, 19 shkurt. Ora 23:00.
Bie dera..."Ju presin në selinë e Partisë Demokratike". Nga ora 21:00 përsëri Presidenti në tavolinën e rrumbullaktë me përfaqësuesit e partive. Orë të tëra bisedimesh. Orë të tëra duke pritur! Shumica ishin skeptikë. Por përsëri kishim një fije shprese: Jeta e të rinjve vlente më shumë se sa idiomat politike!
Ora 01:30.
Në sallë hynë të dërguarit e PD-së. Dukeshin të lodhur. Të dërrmuar. E mori fjalën Sali Berisha:
-E çuditshme! Ramiz Alia mendon ta zgjidhë problemin me një formulë që ka për autorësi ministrin e Arsimit, Skënder Gjinushi! Edhe pse kemi të bëjmë me një formulë politike jashtë realitetit, nuk mendoj të bëhemi ne sebep si parti për ta hedhur poshtë. (Ishte ky mendim i të gjithëve). Nuk do të ishte keq të shkojmë tek studentët së bashku me Skënder Gjinushin, i cili po na pret përjashta.
Ora 02:00.
Përsëri midis përfaqësuesve të studentëve. Biseda ishte e ashpër. Studentët ishin të acaruar. U lexua formula. Universiteti do të ndahej në katër pjesë. Asnjë universitet i ri nuk do të mbante emrin e Enver Hoxhës. Do të nënshkruhej një kontratë midis përfaqësuesve të studentëve dhe ministrit të Arsimit.
Jo. Jo. Dhe Jo! Pa lëshuar një deklaratë qeveria ku të shkruajë se ka vendosur t'i hiqet emri i Enver Hoxhës Universitetit të Tiranës, ne nuk heqim dorë nga greva e urisë, thanë studentët. Folën disa anëtarë të Komisionit Nismtar të Partisë Demokratike. Askush nuk u bind. Më në fund u vendos:
- Përfaqësuesit e Partisë Demokratike le të largohen. Do të bisedojmë vetëm me ministrin e Arsimit.
Duke zbritur sallën, ndërsa gjarpëronim midis këmbëve të studentëve që flinin në çimenton e ftohtë, në errësirë u dëgjua një zë: "Këta janë mjeshtra: E shndëruan politikën në ekuacione e formula matematike! Lum kombi që e ka ministrin e Arsimit profesor Matematike, me shkollë franceze?!"
E mërkurë 20 shkurt
Që në mëngjes herët në Tiranë u dha kushtrimi. Mijëra punëtorë, nxënës, pensionistë, fëmijë, studentë morën rrugën drejt Sheshit të "Demokracisë". Përmasat e sheshit nuk mund të mbanin brenda një kryeqytet të tërë. Në shërbim të popullit u vunë taracat, dritaret e godinave. Ballkoni i një godine u shndërrua në tribunë. Folën shumë. Një zë i kthjellët u shpërnda në eter. Kush flet? Ç'është ky zë i njohur. Pa dëgjoni: Po flet Rajmonda Bulku!... Po çfarë tha se nuk e dëgjova mirë?... U bën thirrje grave, nënave tiranase që të shkojnë e të manifestojnë tek Sheshi "Skënderbe"!
Turma u elektrizua dhe u derdh tatëpjetë drejt rrugës së "Elbasanit"…Mbi 100 mijë vetë. Tek Liceu njerëzve u dalin. Përpara rreshta policësh me skafandra dhe armë. Një zjarrfikëse lëshoi me presion ujë me ngjyrë të kuqe. Disa gra rrëzohen për tokë nga presioni i ujit. Populli u irritua. Qentë e policisë u vërsulën njerëzve, ndërsa zbrazën kallashnikovë mbi kokat e protestuesve, të cilët qëllojnë me gur dhe sende të forta policinë dhe forcat speciale. Turma çan përpara drejt Sheshit "Skënderbej"…Ndalesa e dytë para TVSH-së. Krisma armësh. Ushtarë e policë në "roje". Populli që therriste: "Ushtria është me ne!" Një makinë që "villte" ujë me ngjyrë mbi turmat…
Ora 11:00.
Pesëmbëdhjetë gra e vajza, të prira nga Afërdita Havari, ngjitën shkallët e Presidiumit. Kërkuan takim me Presidentin. Do ta njoftojmë, tha sekretari. Kaluan minutat. Gratë prisnin. Fluturuan 50 minuta. Presidenti nuk po dukej. Mos u mërzisni, qetësonte sekretari. Ai do të vijë nga çasti në çast… Në kufijtë e pritjes prej një ore u hap dera dhe u duk Lumturi Rexha, kryetare e Gruas me dy-tre të tjerë… Po këta çfarë duan?! Ne, në emër të nënave tiranase, kërkuam takim me Presidentin e jo me shoqen Lumturi!.. Presidenti është i zënë. Ka punë. Situata...
Ora 12.30
Ndërkohë turma mbushi Sheshin "Skënderbe". U ngjita në verandën e hotel "Tirana". Përpara shtrihej sheshi, si një ekran gjigand televizioni. Turma që shtyhej. Në krye të turmës printe grupi i të persekutuarve politikë: Albert Risilia, Ardian Heta, Hyget Borova, Sanije Vojka, Astrit Hatellari, Vera Rada, Lida Bezhani, Lindita Hamiti, Liliana Llapaj, Indrit Sukaj, Ilir Çumani, Gëzim Vojka, Hysen Hamiti, Gjolek Aliu, Arben Beli, Arben Rama, Seit Mici, Hajredin Fratari, Xhemal Zhuri, Luigj Bytyçi, Maksim Çali, Durim Hoxha, Hajrije Hasanaj, Ismete Rushiti, Zyhra Izeti, Agron Spaho, Dorant Vojka dhe shumë e shumë të tjerë.
...Policë që mbronin. Ushtarë me qen për dore që vraponin. Dy makina amfibe që hidhnin ujë mbi turma…Krisma. Automatikë…Një pjesë e turmës ngjiti shkallët drejt bustit…Policët i shtynë…Dy tre ngjitje e zbrite dhe busti u rrethua nga turma… Astrit Hatellari me dy djem të rinj mbajnë në duar një litar...Një makinë "IFA" e drejtuar nga Adrian Heta i afrohet monumentit. Litari përfundon rreth qafës së diktatorit. Makina e tërheq. Disa lëkundje dhe... litari këputet... Në makinë u gjet një kavo çeliku. E vendosin rreth bustit dhe gishtave të dorës...Makina tërheq...Turma shtyn...
Ora 14:05.
…Disa lëkundje dhe busti i Enver Hoxhës u rrëzua për tokë. Qëndroi ai në Sheshin "Skënderbej" 858 ditë. Nuk e ruajtën dot bustin as policët, as sampistët, as dekreti special për mbrojtjen e monumenteve... Trupi i diktatorit në bronz u "pushtua" nga turma. Makina e tërhoqi zvarr. Afër godinës ku kanë Selinë të Përdjekurit Politikë, monumenti i Enverit u nda në dy pjesë…Dikush thirri: "Drejt rrugës së "Kavajës"…Turma ecte. Busti zvarritej…Qëndroi para selisë së Partisë Demokratike, karshi selisë së Kishës Ordhodokse…Pa kuptuar "mbinë" ushtarë të Gardës…Qëllonin në ajër…Agim Buxheli filmonte, duke qëndruar mbi murin rrethues së godinës…Turma u largua…Busti mbeti në mes të rrugës…U afrova…Trupit i mungonte koka... Koka në Stamboll, trupi në Janinë…Të vranë Ali Pasha, o Ali të shtrinë…Me motivet e kësaj kënge, mora rrugën tek studentët e ngujuar në grevë urie…
…Në hyrje të godinës, koka prej bronzi e diktatorit…Rreth qafës një litar. Përpjekje për ta ngjitur kokën në katin e dytë…Shumë bronz i derdhur. I rëndë…Nga dritaria e katit të dytë "oshëtiu" një thirrje: "Nuk e vlen që koka e diktatorit të ngjitet lart dhe të futet në sallën e grevës së urisë! Uleni!"…Dhe bronzi u përplas në çimento…Lëshoi një tingull të zgjatur…Rënkimi i fundit i kokës së Enveri!...Një realitet i rrethuar nga një mallkim mistik për rracën e diktatorëve…
Ora 21:00.
Studentët janë larguar nga Kinoklubi. Në salla, në korridore ka rënë qetësi…Në hyrje të godinës një kokë gjigante…Në vetmi…Mes mbetjeve të grevës…Në të njëjtën ditë kishin rënë nga piedistali bustet e diktatorit të mallkuar në Durrës dhe Korçë…
Friday, February 18, 2011
Volonte, akuzon opozitën si pengesë për zgjidhjen e ngërçit
Hashim Thaçi dhe Behgjet Pacolli, si Odes Baysultanov dhe Ramzan Kadyrov
A e dini se çfarë kanë të përbashkët Presidenti i ardhshëm i Kosovës, Behgjet Pacolli dhe Presidenti filorus i Çeçenisë, Ramzan Kadyrov? Të dy janë njerëz shumë të pasur, të cilët janë pasuruar falë bashkëpunimit me Moskën,
dhe bizneset e tyre kryesore i kanë në Rusi ose ish-republikat sovjetike të Azisë Qendrore, që gjithsesi mbeten në rrezen e influencës së Moskës. Kadyrov kur u bë President i Çeçenisë, pas vrasjes së të atit, Ahmed Kadyrov, i cili kishte qenë President më parë, vazhdoi ta shtojë pasurinë që kishte filluar të krijonte i ati. Behgjet Pacolli, pasiqë krijoi pasuri falë biznesit me Rusinë dhe me despotët e ish-republikave sovjetike të Azisë Qendrore, hyri në politikë me aspiratën për t’ u bërë President i Kosovës. Të dy, si Kadyrovi dhe Pacolli kanë kontakte të nivelit më të lartë, prej një kohe të gjatë me qendrën ruse të pushtetit, Kremlinin.
A është ekzagjerim që Behgjet Pacolli të etiketohet si Ramzan Kadyrovi i Kosovës? Behgjet Pacolli betohet e stërbetohet se ai është shqiptar i mirë, se ka hyrë në politikë për të bërë më të mirën për Kosovën, se ai dëshiron që pasurinë dhe lidhjet e tij të biznisit t’ i verë në shërbim të Kosovës. Natyrisht se Pacolli do të gjykohet sipas veprimeve që bën dhe ai mund të rezultojë një shqiptar i mirë, një njeri që do të bëjë aq të mira për Kosovën sa do ta meritojë një monument në qendër të Prishtinës. Tekefundit le të eksperimentojmë edhe Pacollin si kryetar të Kosovës, mund të thotë shumëkush në Kosovë, se edhe ata që mund të vihen në vend të tij nuk është se janë premtues. Kjo është e vërtetë, por mënyra se si e ka vënë pasurinë Pacolli, background rus i interesave të tij të biznisit, fakti që ai graviton në orbitën e biznisit rus në Rusi dhe rreth saj, si dhe fakti që ai në një moment delikat gjatë Luftës së Kosovës bëri proxenet-in e Kremlinit, do të thotë ndërmjetësin e tij politik, e bëjnë eksperimentin “Pacolli” me rrezik tejet të lartë.
Pacolli është një nouveau riche që hyn në politikë, por ai nuk është një nuoveau riche çfarëdo, ai është një nouveau riche i llojit kremlinian, një specie kjo së cilës i përkasin edhe despotët ish-aparatçikë sovjetikë të shteteve të reja të Azisë Qendrore. A mund të pritet që Pacolli në politikë të veprojë si i shkëputur nga gravitacioni i botës së biznisit të tij? Fakti që Pacolli në kohën e Luftës së Kosovës bëri një përpjekje për negocim me proveniencë nga Moska dhe që ishte llogaritur qartësisht për të penguar fushatën e NATO kundër Serbisë, është një tregues se Pacolli ka hyrë në politikë me një agjendë të fshehtë afatgjatë, në këtë linjë. Shkurt Pacolli ka hyrë në politikë për të bërë në Kosovë për Serbinë, diçka të ngjashme me atë që bënë në Çeçeni për Rusinë, Kadyrovët, at dhe bir.
Natyrisht se Rusia dhe Serbia nuk presin nga Pacolli që ai, në cilësinë e kryetarit të Kosovës të firmojë dokumente që do ta rikycin politikisht Kosovën nën Serbi. Ajo që presin Rusia dhe Serbia nga Pacolli-kryetar i Kosovës është që të krijojë kushtet e përshtatshme që Kosova e mbetur (ajo pjesë që Serbia nuk e kontrollon pas coptimit) të blihet me paratë ruse, për llogari të Serbisë. Këtu fjalën e kam që nga ekonomia tek politika. Madje për t’ u kamufluar ky proces, në bisedimet mes Kosovës dhe Serbisë, ku tashmë si përfaqësues i Kosovës do të ulet në tryezë edhe Pacolli, ky i fundit do të bëjë deklarime të forta, do të inskenohet edhe ndonjë incident mes tij dhe President serb Tadiç, që Pacolli të krijojë reputacionin e njeriut që ballafaqohet me serbët ashtu sikur pritet nga kryetari i Kosovës.
Shumëkush mund të thotë se nëse Pacolli ka një agjendë të tillë, atëherë amerikanët nuk do ta lejonin Hashim Thaçin, që të bënte aleancë me Pacollin dhe të pranonte që Pacolli të bëhej President i Kosovës. Logjika të thotë se kështu duhet të ishte, por nuk duhet harruar që në Washington ka pasur gjithherë një linjë të fortë kundër angazhimit ushtarak amerikan në Kosovë, ndër njerëzit më aktivë të së cilës kanë qenë personalitete të tilla me influencë në politikëbërje dhe në optikën gjeopolitike amerikane si Henry Kissinger. Gjenerali Wesley Clark, komandanti i fushatës ajrore të NATO-s kundër Serbisë në 1999, shkruan në kujtimet e veta për presionin që pati ai dhe administrate e Clinton për ndërprerjen e bombardimeve nga ana e njerëzve shumë të fuqishëm në Washington. Kjo linjë kundër Kosovës në Washington është aktive edhe sot, dhe ajo mund të përdorë metoda të ndryshme për të arritur qëllimin e saj. Mjaft që kjo linjë kundër Kosovës në Washington, të influencojë që në Washington të minimizohet rreziku që vjen nga emërimi i Pacollit në postin e kryetarit të Kosovës, dhe qëllimi arrihet.
Ramzan Kadyrovi, pasi erdhi në pushtet në Çeçeni, si kukull e Rusisë, në vitin 2007, emëroi kryeministër kushëririn e vet, Odes Baysultanov, i cili vazhdon të jetë ende kryeministër i Çeçenisë. Në Kosovë po përsëritet precedenti çeçen, por në trajtë karikature. Në Kosovë, “Ramzan Kadyrov” (Behgjet Pacolli) i kërkoi “Odes Baysultanovit” (Hashim Thaçit), që ta bëjë President. Në Kosovë është pra “Odes Baysultanov” ai që po e bën President “Ramzan Kadyrovin”! Thaçi natyrisht që e di mirë se cka po bën, ai nuk është një politikan fillestar, tashmë, se ka qenë në Konferencën e Ramboullet që para 12 vitesh. Thaçi është i ri, dhe nesër ka për të qenë dëshmitar i asaj që mund ndodhë me Kosovën si rezultat i zgjedhjes së Pacollit president, dhe që jo domosdoshmërisht ka për t’ u zbuluar krejt në kohën kur Pacolli do të jetë president. Kështu që Thaçi nuk mund të thotë se: Nuk e parashikova atë që do të ndodhte, kur i mundësova Pacollit që të zgjidhet President.
Pacolli ka një aleat të madh në Kosovë që është dëshpërimi i shqiptarëve të Kosovës, i ardhur nga varfëria dhe mungesa e shpresës, cka do t’ i pengojë që të perceptojnë atë që bën Pacolli. Kjo do të bëjë që Pacolli-kryetar i Kosovës ta ketë më të lehtë për të implementuar agjendën e tij, duke u sjellë në Kosovë si një Mesia, si kryeministri biznesmen i Libanit, Rafic Hariri, pas luftës civile. Kur Pacolli të bëhet President, Kosova do të bëhet ashtu si Libani në kohën që Rafic Hariri ishte kryeministri i tij, dhe Libani u identifikua me kompaninë e Hariri, “Solidere”, për çka Libani u quajt një company-run-country. Edhe Kosova do të bëhet një company-run-country, ku kompania e Pacollit, Mabetex do të jetë ekuivalenti i asaj të Hariri në Liban. Pacolli do të kanalizojë në Kosovë me anë të kompanive të tij miliardat e eurove ruse, prejardhja e të cilave do të kamuflohet lehtësisht falë të infrastrukturës së ndërlikuar që ka krijuar biznesi rus në Europën Perëndimore dhe në ish-republikat sovjetike të Azisë Qendrore. Shqiptarët e Kosovës do ta mirëpresin këtë dhe për një periudhë do t’ u duket se jeta e tyre ndryshoi. Shumë njerëz në Kosovë mund të thonë se mjafton që ne të jetojmë më mirë, të ketë punë, rryma elektrike të mos mungojë, të rriten pagat, pa nuk ka rëndësi nëse jetojmë në një company-run-country. E pra, lajmi i keq është se nuk kanë për të jetuar më mirë. Pacolli nuk do ta ndërtojë Kosovën për shqiptarët dhe minoritetet, ashtu që të gjithë të jetojnë më mirë atje, Pacolli do ta blerë Kosovën për Serbinë, me para ruse. Pacolli do të lehtësojë edhe kalimin tek biznesi rus të kompanive publike tashmë të shitura, duke u rishitur.
Po EULEX-i çka do të bëjë gjatë kohës që ndodhin këto gjëra, mund të pyesë shumëkush? EULEX-i do të jetë i paralizuar nga fakti si biznesi rus bën lobin të fortë në qendrat evropiane të vendimmarrjes, për çka po shprehet gjithëherë e më tepër alarm në vendet mëdha evropiane. Kur është fjala për Kosovën, kuptohet, lobingu në kryeqytetet evropiane nuk është dhe aq i vështirë.
Kur të ketë përfunduar blerja e Kosovës, në masën e parashikuar, atëherë shqiptarët do të jenë të tepërt atje. Kështu që do të inskenohet skenari të cilin rusët e quajtën çeçenizim, do të thotë që konflikti çeçeno-rus të projektohej në Çeçeni, midis vetë çeçenëve, ashtu që ata të asgjësonin njëri-tjetrin. Në Kosovë ky skenar mund të quhet Shqiptarizim dhe do të zbatohet duke shkallëzuar konfliktin mes shqiptarëve, në të gjitha llojet e mundshme, politik, religjioz, regjional. Çdo premisë për konflikt do të eksploitohet që prej ekzistencës së radikalëve islamikë në Kosovë, tek konflikti mes Drenicës dhe Prishtinës i krijuar pas vitit 1999, konflikti mes enveristëve të dikurshëm dhe titoistëve etj. Paaftësia e shoqërisë shqiptare të Kosovës për t’ u çliruar nga premisat konfliktuale ka për të rezultuar shumë konvenues për ata që do të çeçenizojnë Kosovën.
Në rrethanat kur KFOR është duke u zvogëluar shumë dhe nuk do të jetë në gjendje që të sigurojë rendin në Kosovë, natyrisht se do të ndërhyjë Serbia kinse për të siguruar enklavat dhe zonat e trashëgimisë kulturore serbe, të përhapura gjithandej Kosovës, aq sa e bëjnë hartën e saj të ngjajë si një copë djathi zviceran, me shumë vrima. Në fakt Serbia do të ndërhyjë për t’ i dhënë dorën e fundit spastrimit etnik të Kosovës nga shqiptarët. Perëndimi natyrisht se nuk mund të ndërhyjë kur shqiptarët vriten mesveti. Pacolli zemërgjerë do t’ u ofrojë shqiptarëve të Kosovës punë dhe jetesë të mirë në ish-republikat sovjetike muslimane të Azisë Qendrore.
Ndoshta nuk ka për të ndodhur asgjë nga këto dhe Pacolli, në mos ka për t’ i bërë të mira Kosovës, së paku nuk ka për t’ i bërë më keq se ai që mund të jetë në vend të tij. Ndoshta, por unë mendoj se Pacolli-President është një eksperiment me rrezik tepër, por tepër të lartë ama. Këtë më mirë se cdo gjë na e bën të qartë vetë libri i Pacollit i botuar kohët e fundit, qartësisht me rastin e agjendës së tij presidenciale. Në këtë libër të ndërtuar si një intervistë e gjatë që Pacolli u jep dy këshilltarëve të vet nga Tirana, çka e bën librin tejet argëtues, në një kuptim të caktuar, për ata që njohin detaje, Pacolli vetëm sa pohon të gjitha dyshimet që shpreha unë më lart. Ai i ka vënë dy këshilltarët e vet nga Tirana, që të bëjnë pyetje të cilat do t’ i japin atij mundësinë që të bëjë një apologji për dyshimet që ekzistojnë rreth tij, e pas të gjitha gjasave edhe të elaborojnë përgjigjet e tij, në trajtën që paraqitet në libër. Por mënyra se si janë ndërtuar pyetjet dhe përgjigjet, vetëm sa zbulojnë se ata që pyesin dhe ai që përgjigjet, janë të vetëdijshëm se këtu ka diçka të mbrapshtë që nuk shkon fare.
kastriotmyftaraj@sot.com.al
Me sy nga Lindja e Mesme
Keta tanet i mbajne syte nga Lindja e Mesme me deshiren per ta bere Shqiperine vater lufte dhe tensioni. Ndersa bota e qyteteruar, Europa dhe Shtetet e Bashkuara, i mbajne syte andej me synimin qe lufta e Lindjes se Mesme te mos dale nga kontrolli. Keta tanet ketu qe bene thirrje per ta bere "Shqiperine si Tunizia", i perkasin periudhes se luftes guerrilase dhe sundimit te gjate komunist; ndersa ata ne boten e qyteteruar punojne me synimin e kundert: qe edhe Lindja e Mesme te arrije sistemin demokratik si ne Perendim dhe, sigurisht, si ne Shqiperi. Ndarja e botes ka mberritur ne nje forme te thikte: Ata qe jane per dhunen dhe kthimin prapa e shikojne Lindjen e Mesme si nje shprese per shperthimin e dhunes; ndersa ata qe synojne Demokracine e vezhgojne Lindjen e Mesme me shpresen se edhe kjo pjese e botes mund t'i bashkohet Perendimit si demokraci dhe si e drejte. Cfare po ndodh ne Lindjen e Mesme dhe cfare po tentojne ish- komunistet ne Shqiperi?! Dje, vija gjatesore e demonstrimeve ne Lindjen e Mesme arriti ne tre mije e njeqind e shtatedhjetepese milje, ose pese mije e kater qind kilometra, qe nga Teherani deri ne Tangia te Marokut. Kur shpertheu Zemerimi kunder regjimit despotik shumevjecar ne Tunizi, lideret e opozites Socialiste (ish- komuniste) beri thirrje per ta perhapur Zemerimin edhe ne Shqiperi. "Pse nuk e bejme Shqiperine si Tunizia?!"- therriti nje nga ish-ministrat e Enver Hoxhes qe sot eshte aleat ne Levizjen Socialiste per Marrjen e Pushtetit me Dhune. Pas kesaj, levizja e Zemerimit u perhap me gjere ne Lindjen e Mesme, por nuk kishte asnje gjase qe te lidhej me Shqiperine. Shqiperia e ka kaluar epoken e diktaturave dhe te pushtetit despotik. Tunizia kishte nje President 38 vjet ne pushtet, ndersa Shqiperia e kishte pasur 50 vjet pushtetin e Enver Hoxhes qe ka leshuar rrenje te lideret e rinj komuniste qe kerkojne pushtetin me dhune. Ne Lindjen e Mesme po rrezojne pushtetin alias Enver Hoxha; ndersa ne Shqiperi lideret alias Emver Hoxha po tentojne te rrezojne sistemin demokratik duke e veshur me idene alias Lindja e Mesme. Ketu eshte paradoksi dhe e verteta thelbesore. Ne Egjipt ra pushteti 30 vjecar i Hosni Mubarak, gje qe shkaktoi interesimin mbare botes dhe te Perendimit vecanerisht. Europa dhe Shetetet e Bashkuara e quajten nje dite zgjimi dhe rilindjeje per egjiptianet. Pas Egjiptit nisi "Dita e Zemerimit" edhe ne hapesirat e tjera te Lindjes se Mesme. Ne Jemen po luftojne per te shtaten dite shesheve te qytetit, ne Bahrein rinia ka dale ne rruge dhe kerkon permbysjen e monarkise si dhe te qeverise prej me shume se tre dekada. Pardje nisen demonstratat edhe ne Banghazi te Libise qe konsiderohej porta e mbyllur perjetesisht per te Drejten. Regjimi i kolonelit Gedaf ka kapur majat e 41 vjeteve, pak me poshte se pushteti i Enver Hoxhes ne Shqiperi, sigurisht. Edhe ne Iran ka nisur lufta kunder regjimit, por ketu parlamenti po kerkon denimin me vdekje per udheheqesin e opozites. Ja, kjo po ndodh ne Lindjen e Mesme. Shtabi qe udheheq dhunen ne Shqiperi sipas modelit te Lindjes se mesme, e mban nje sy atje me qellim qe ta perserise ne vendin tone, ketu afer brigjeve te Europes. Me 21 Janar 2001 e praktikuan dhunen, por nuk mund te merrnin pushtetin. Sepse pushteti ne Demokraci nuk mund te merret me dhune- ja per kete arsye. Ndersa bota e perparuar i mban syte nga Lindja e Mesme me qellim qe te vendoset sistemi demokratik, keta tanet i mbajne syte nga Lindja e Mesme me qellim qe te permbyset sistemi demokratik. Sistemi demokratik ne Shqiperi nisi rrugen qe ne dhjetor te vitit 1990 kur studentet dhe populli i Shqiperise rrezuan diktaturen gjysme shekullore te baballareve te lidereve te sotem te opozites. Tani demokracia ne Shqiperi eshte instaluar si politike, si parlamentarizem, si ligj dhe si orientim. Shqiperia eshte anetare me te drejta te plota ne NATO; ajo dergon paqeruajtes (dhe jo dhune-marres) ne vendet e Lindjes se Mesme, ajo eshte pjese e koalicionit te qyteterimit me te perparuar te Botes. Shqiperia ndodhet ne hapat me te suksesshem per anetaresimin ne Bashkimin Europian dhe ka fituar te drejten e ndritur qe qytetaret e vet te levizin lirisht ne vendet e zones Shengen... Lindja e Mesme po enderron qe ndonje dite te mberrije ne nje maje demokracie dhe sistemi si ne Shqiperi, ndersa shtabi i Partise Socialiste (ish-komuniste) po enderron ta ktheje Shqiperine "si Tunizia"... Ja ky eshte ndryshimi thelbesor. Ndryshimi se Perendimi po veren me kujdesin me te madh qe Shqiperia te mos rrezikohet ne rrugen e saj te drejte. Rreziku nuk vjen nga Lindja e Mesme, por nga disa njerez qe adhurojne dhunen alias Lindja e Mesme, ketu brenda vendit. Ambasada e Shteteve te Bashkuara te Amerikes ne Tirane, dje leshoi nje lajmerim per qytetaret qe te kene kujdes para demonstrates qe zhvillon sot shtabi i PS. Sot nuk dihet ku do te jete demonstrata, sot nuk eshte e sigurt se nuk do te shpertheje dhuna; sot nuk ka asnje garanci se mund te kete paqe ne rruge... Keshtu ben thirrje Perendimi. Perendimi ka kuptuar sa i rrezikshem eshte Edi Rama dhe duhet ruajtur prej tij si prej minave. Ndersa ne Lindjen e Mesme Perendimi perkrah zhvillimin e levizjeve per Demokraci. Te dy palet i mbajne syte nga Lindja e Mesme; por ne drejtime te kundert: Njerezit e dhunes- per dhune; Perendimi per te zhvilluar demokracine.
Padia civile: Demonstratat, PS prishi imazhin e vendit
Ambasada e SHBA: Ruhuni nga protesta
Protesta e opozites e paralajmeruar me 18 shkurt ka detyruar ambasaden amerikane t'u beje thirrje shtetasve te saj qe ndodhen ne Shqiperi te bejne kujdes. Paralajmerimi eshte bere paraditen e djeshme dhe ne oret e pasdites u pasua edhe nga nje i dyte, per tubimin e se dieles, njoftuar nga Partia Demokratike. Me ane te nje deklarate leshuar diten e djeshme, ambasada e SHBA-se u ka bere thirrje shtetasve amerikane qe ndodhen ne Tirane te shmangin udhetimet e panevojshme me date 18 shkurt e me tej. Ne deklaraten e saj, ambasada amerikane shprehet se "kemi informacione qe protestat e opozites te zgjasin disa dite rresht". Kurse vijohet: "Ne i njoftojme qytetaret e SHBA, se edhe demonstratat qe jane njoftuar si paqesore mund te kthehen ne dhune dhe te paparashikueshme. Ju duhet t'i shmangni ato nese eshte e mundshme". Ne njoftimin e leshuar dje nga ambasada e SHBA-se, evidentohej fakti se demonstratat e kaluara kane prekur te gjitha arteriet kryesore hyrese te kryeqytetit dhe kane nderprere ne menyre te konsiderueshme rrjedhen e trafikut. Ambasada e SHBA ka keshilluar personelin te shmange zonat ku ndodhin demonstrata dhe te kufizojne te gjitha udhetimet e panevojshme gjate protestave. "Demonstratat ne nje qytet kane potencial qe te cojne ne mitingje te tjera publike apo demonstrata ne te gjithe vendin. U bejme thirrje qytetareve amerikane te jeni vigjilente dhe te vetedijshem per vendndodhjen tuaj dhe degjoni se cfare raportojne mediat lokale te lajmeve ne lidhje me te gjitha tubimet publike. Qytetareve te SHBA-se po i kerkojme te ushtrojne kujdes te forte, nese ata gjenden prane demonstruesve", thuhen ne deklaraten e ambasades amerikane leshuar diten e djeshme. Paralajmerimi i dyte, vinte per 20 shkurtin, per koncertin festiv qe do te zhvilloje diten e diel Forumi Rinor i Partise Demokratike. Ne nje njoftim zyrtar ambasada e SHBA, kerkon nga qytetaret e saj qe te shmangin zonat ku do te zhvillohet ky miting ne qender te qytetit. Ndersa paralajmeron bazuar ne proceduren qe po ndjek qe prej 21 janarit, se tubimet ne Tirane mund te jene te dhunshme, edhe pse fillimisht deklarohen si paqesore. "Partia Demokratike e Shqiperise ka lajmeruar zhvillimin e nje mitingu te dielen ne 20 shkurt 2011. Ambasada nuk ka informacion specifik per vendin apo zonen ku do te zhvillohet mitingu. Me pare mitingjet publike kane prekur te gjitha arteriet e qytetit dhe zakonisht perreth Parlamentit, Kryeministrise dhe bulevardit, "Deshmoret e Kombit". Personeli i Ambasades se SHBA eshte keshilluar qe te shmang cdo kalim ne zonen e demonstratave dhe te limitojne cdo udhetim gjate kohes se zhvillimit te protestes", thuhet ne njoftimin e Ambasades se SHBA-se qe per shkak te procedures rutine, ne pjesen me te madhe eshte perseritje e atij per kujdes nga 18 shkurti. Nderkohe edhe disa ambasada te vendeve te Bashkimit Evropian, ashtu si heret e kaluara qe nga 21 janari, u kane bere thirrje shtetasve te tyre te qendrojne larg vendeve ku do te grumbullohen demonstruesit me 18 shkurt, ndersa theksojne se qytetaret e vendeve te tyre duhet te shmangin levizjet e panevojshme ne Tirane deri ne perfundim te demonstratave, qe sipas informacioneve mund te vazhdojne disa dite. Keto ambasada kane leshuar deklarata vigjilente edhe ne demonstratat e meparshme te zhvilluara nga opozita. Ambasadat Ambasada britanike e ajo italiane u kane bere thirrje diten e djeshme shtetasve te tyre qe ndodhen ne Shqiperi, te kene kujdes me 18 shkurt pasi demonstratat e PS edhe pse jane paralajmeruar paqesore mund te rezultojne si ajo e 21 janarit. Apeli "Demonstratat ne nje qytet kane potencial qe te cojne ne mitingje te tjera publike apo demonstrata ne te gjithe vendin. U bejme thirrje qytetareve amerikane, te jeni vigjilent dhe te vetedijshem per vendbanimin tuaj, degjoni se cfare raportojne mediat lokale te lajmeve ne lidhje me te gjitha tubimet publike".
Thursday, February 17, 2011
Zbulohen detajet, nesër jo demonstratë, por protestë pa afat
Tubimi i kaluar i PS Foto: Getty Images
Tiranë, 17 Shkurt 2011 NOA/ Ervin Tirana – Tubimi i nesërm i Partisë Socialiste do të mbledhë njerëzit jo për një demonstratë por për një protestë, konfirmojnë për agjencinë NOA, burime nga partia më e madhe e opozitës.
Protesta, pritet të vazhdojë deri në mbrëmje. Plani është që kjo protestë të vijojë me numër të reduktuar gjatë gjithë natës, por kjo ende nuk është saktësuar nga drejtuesi i PS.
Sakaq, protesta ka si plan që të vijojë për disa ditë me radhë pa afat, por pengesë kryesore e socialistëve del data 20 shkurt kur mazhoranca ka paralajmëruar një tubim festiv.
Të njëjtat burime nga PS i thanë NOA-s se strategjia që do të ndiqet do të lidhet shumë me ecurinë e protestës por e rëndësishme është edhe se sa do të jenë njerëzit të disponueshëm të qëndrojnë gjatë, përjashtuar ata persona që mund të mbështeten financiarisht përmes bisnesmenëve të majtë.
Burimet pranë Partisë Socialiste i thanë sot agjencisë NOA se mitingu protestë do të nisë zyrtarisht në orën 16.00 në bulevardin “Dëshmorët e Kombit” pranë Kryeministrisë.
Atje do të ngrihet një podium ku do të qëndrojë lideri i PS, Edi Rama dhe drejtues të disa partive të tjera që bëjnë pjesë në Opozitën e Bashkuar.
Gjithashtu në podium dhe pranë tij do të jenë familjarë të viktimave të 21 janarit.
Para se protestuesit të mblidhen në bulevard pranë Kryeministrisë, do të nisë grumbullimi i tyre nga Rruga e Durrësit, Rruga e Kavajës, vendi i quajtur Zogu i Zi ose Sheshi Rilindja, Rruga e Elbasanit, Bulevardi Zogu i Parë.
Gjatë përshkimit të rrugëve të mësipërme deri në bulevard, protestuesit (organizatorët që i prijnë nga Tirana dhe rrethet), janë porositur që të mos lëshojnë thirrje por të lëvizin në heshtje drejt bulevardit, duke mbajtur në duar pankarta me thirrje për largim të qeverisë “Berisha” dhe zgjedhje të parakohshme.
Ndërkohë, Partia Socialiste përmes kryetarit të degës Tiranë, Besnik Bare, ka dërguar në Policinë e Tiranës sot, një kërkesë zyrtare. Përmes saj i kërkohet forcave të rendit të marrin përsipër mbikëqyrjen dhe sigurimin e rrugëve të lira për protestues në akset e mësipërme duke nisur nga ora 14.00 dhe në vazhdim. Po ashtu është kërkuar dhe marrja përsipër e ruajtjes së rendit dhe mbajtjes hapur të bulevardit në dispozicion të protestuesve, nga ora 16.00 deri në 20.00.
Mbetet të shohim mbrëmjen e nesërme sesi do të precipitojë protesta e opozitës.
Le Shqipërinë, zhvendoset në Spanjë
Këngëtarja, Ingrid Gjoni, që prej pak javësh i mungon Tiranës, duket se nuk ka ndër mend të kthehet në vendin e saj. Pas qëndrimit në Zyrih, këngëtarja është nisur drejt Milanos, për një koncert, ndërsa destinacioni i fundit ishte Spanja. Dhe kjo, jo si një qëndrim disa ditor për ndonjë koncert, por shumë më tepër.
Këngëtarja ka vendosur që për disa kohë të jetojë larg Shqipërisë dhe vendi i saj i jetesës së re, do të jetë pikërisht vendi turistik i Europës. “Do të jetoj për disa kohë atje. Kam nevojë të shkëputem për momentin nga Tirana”, tregon ajo. Nuk dihet nëse kjo shkëputje e Gjonit ka lidhje me aktivitetin e saj muzikor, apo jetën private. Këngëtarja nuk jep komente, por rrëfen se ndihet plotësisht e lumtur në këto pushime që i ka kushtuar vetes./vip.shqiperia
Kosovapress: Një ruse do bëhet First Lady në Kosovë?
Përfaqësuesit e institucioneve të larta shtatore dhe pretendentet e këtyre posteve, në vendet demokratike, gjatë veprimtarisë së tyre politike dhe punës institucionale mbështeten fuqishëm edhe nga bashkëshortet e tyre.
Kjo praktikë në vitet e fundit ka filluar të funksionojë edhe në Kosovë, por i vetmi që nuk është parë kurrë me bashkëshorten e tij, as gjatë fushatës zgjedhore, e as në aktivitete tjera, është kandidati për president të Kosovës, Behgjet Pacoilli, duke mos u dhënë mundësinë qytetarëve të Kosovës të mësojnë se kush do të jetë zonja e parë e Republikës së Kosovës.
Madje as në shkrimet e shumta për biografin e tij nuk shkruan se kush është bashkëshortja e tij. Rasti i rrallë që Pacolli kishte përmendur bashkëshorten e tij, por pa emër, është njoftimi që ditë më parë ka bërë në "Facebook" për lindjen e djali të tij Diarit.
"Miq të nderuar, ju njoftoj se në familjen time këto ditë kemi momente gëzimi, Zoti na ka gëzuar, im shoqe ka lindur edhe një djalë, e kemi pagëzuar Diar, i lindur më 26. 01. 2011 në ora 17:56 min, 4.8 kg, 55cm i gjatë", ka shkruar Pacolli në profilin e tij, njofton Kosovapress.
Krejt çka Kosovapress ka mundur të mësojë për bashkëshorten e Pacollit, është një interviste e Begjet Pacollit që i ka dhënë revistës kroate "Nacional" në vitin 2007, në të cilën tregon se bashkëshortja e tij është Maria Pacolli, lindur në St. Petersburg të Rusisë, e cila tani është 33-vjeçare. Madje aty është e botuar edhe një foto e saj bashkë me Pacollin.
Edhe për kundër insistimeve të shumta për të marrë informacione rreth biografisë së Behgjet Pacollit, zëdhënësi i AKR-së, Arbër Geci, nuk u tregua i gatshëm për dy ditë të përgjigjet për Kosovapress, me arsyetimin se ishte i zënë. Fjalia e vetme që në një rast ka thënë Geci, ishte se nuk mund të flas për këtë çështje pa biseduar me presidentin.
"Nuk mund të ju përgjigjem ne lidhje me këtë pa u konsultuar me presidentin Behgjet Pacolli", tha Geci.
Ish-këshilltari për informim i ish-presidentit Fatmir Sjediu, Xhavit Baqiri ka thënë për Kosovapress se në Kushtetutën Republikës së Kosovës e përcaktohet qartë që presidenti është faktor i uniteti i popullit të Kosovës.
"Nuk dua të paragjykoj në askënd, secili kandidat për këtë postë të rëndësishëm do të duhej të kishte absolutisht biografi të qartë të pastër dhe të mos të ketë asnjë shifër më të vogël. Kushdo qoftë që zgjidhet president i Republikës së Kosovës të ketë atë, rol dhe të jetë një faktor i rëndësishëm unifikues edhe në kuadër të skenës politike, por edhe qytetare, të ketë një kontakt edhe me shoqërinë civile", tha Beqiri.
Ai ka shtuar se do të ishte absolutisht e nevojshme që secili kandidat të bëjë të qartë gjithçka që do t'i interesonte qytetarëve të Kosovës, pasi që posti i presidentit është një post i rëndësishëm.
Në librin biografik "Nga sfida në sfidë jeta, Behgjet Pacolli", ai shkruan se ka katër fëmijë, tri vajza e një djalë, duke përfshi edhe dy vajzat nga martesa e parë, ndërsa fëmija i pestë i ka lindur në janar të vitit 2011. Por, nga ajo që dihet është se Pacolli për disa vite ka qenë i martuar edhe me shqiptaro-italianen Ana Oksa. Po ashtu në libër shkruan se ka një familje të lumtur me gruan e tij të quajtur Masha.
Nëse Behgjet Pacolli merr miratimin e Kuvendit të Kosovës për president të vendit, ish-zonja e parë e Kosovës pas Fanë Rugovës, Nezahete Sejdiut dhe bashkëshortës së u. d. të presidentit të tanishëm Jakup Krasniqi, Sevdije Krasniqi, do të jetë 33 vjeçarja Maria Pacolli, siç thotë në intervistë, apo Masha siç shkruan në libër.
Numerologjia e karrierës politike të Erion Veliajt
Nga Kastriot MYFTARAJ
Erion Veliaj, në rrethe shumë të ngushta ka filluar të shprehë mendimin se një fatalitet numerologjik e bën atë të jetë pasardhësi i Edi Ramës në krye të PS. Sipas kalkulusit të Erion Veliajt, ai gjendet në raport me Edi Ramën, ashtu siç ishte Edi Rama
Koincidencat numerologjike e inkurajojnë edhe më tepër Erionin. Fatos Nano i fitoi zgjedhjet parlamentare në vitin 1997, gjashtë vite pasi u bë kryetar i PS. Sipas kësaj, del se Edi Rama, duhet t’ i fitojë zgjedhjet në 2011, se në këtë vit mbushen gjashtë vite qëkurse ai është bërë kryetar. Pastaj, Edi Rama do të bëhet kryeministër ashtu si Nano në 1997, dhe PS do të rrijë tetë vite në pushtet deri në 2019, kur PS-së i mbaron mandati i dytë parlamentar, ashtu si në 2005. Më tutje, në kalkulusin e Erionit, Edi Ramës i duhet që të japë dorëheqjen nga posti i kryetarit të PS-së pas humbjes së zgjedhjeve të vitit 2019, çka do ta çojë Erionin në karrigen e kryetarit të PS-së. Nëse zgjedhjet parlamentare nuk mbahen në vitin 2011, por në 2012, Erioni mendon se përsëri nuk është keq, se pas dy mandatesh të PS-së në pushtet, në 2020, Erioni do të jetë 41 vjeç, pra fiks sa ç’ ishte Rama në 2005. Madje, meqënëse Rama ka lindur në korrik dhe Erioni në dhjetor, ky i fundit mendon se ka më tepër hapësirë për kombinacione numerologjike me moshën e vet.
Për Erionin problemi kryesor është se PS duhet t’ i humbë patjetër zgjedhjet e treta parlamentare në radhë pas zgjedhjeve të ardhshme, duke e llogaritur të sigurt që zgjedhjet e ardhshme parlamentare i fiton PS. Nëse PS fiton tre zgjedhje parlamentare rresht, Erionit i prishet krejt llogaria, kurdo që të mbahen zgjedhjet e para parlamentare, këtë vit, vitin tjetër, apo në 2013. Se kështu i bie që Edi Rama të qëndrojë kryeministër deri në 2023, 2024, apo 2025, kur Erioni do të jetë përkatësisht 44, 45, 46 vjeç. Këtu prishet jo vetëm numerologjia, por edhe çdo shans i arsyeshëm për t’ u bërë pasardhës i Edi Ramës, se ndërkombëtarët, për shkak të postulatit të tyre të shkëputjes së liderëve nga periudha e politikës konfliktuale, e cila tashmë u duk se përfshin jo vetëm vitet 1997-1998 por edhe vitin 2011, zëvendësuesin e ardhshëm të Edi Ramës, kurdo që të vijë do ta kërkojnë të tillë që të mos i ketë më tepër se 40-41 vjeç, sa Edi Rama në 2005. Erioni e di mirë këtë gjë.
Erioni, me të ardhur në Shqipëri në vitin 2002, punoi fort që PS e drejtuar nga Nano t’ i humbte zgjedhjet parlamentare të radhës, në vitin 2005, ku PS kërkonte fitoren e tretë radhazi. Atëherë Erioni bëri virusin politik kundër qeverisë socialiste të Nanos. Tashmë Erioni ka një agjendë afatgjatë për të bërë virusin politik kundër qeverisë së ardhshme socialiste, në mënyrë që të mos e lejojë PS-në të fitojë tre zgjedhje parlamentare radhazi. Kështu largohet Rama nga drejtimi i PS-së dhe i hapet rruga Erionit dhe jo ndonjë tjetri.
Për Erionin, problemi imediat është se ku do ta kalojë ai periudhën midis zgjedhjeve të ardhshme parlamentare dhe zgjedhjeve parlamentare të treta në radhë, që prej zgjedhjeve të ardhshme. Erionit do t’ i bënte shumë komoditet sikur këtë periudhë ta kalonte në krye të Bashkisë së Tiranës, se kështu do të krijonte bazën e vet personale të fuqisë, ashtu si Edi Rama në vitet 2000-2005. Prandaj Erioni lobon, siç i pëlqen të shprehet, tek plaku Soros që ky të ndërhyjë tek Edi Rama që ai të kandidojë Erionin në zgjedhjet e ardhshme vendore, si kandidat për kryetar të Bashkisë së Tiranës. Por këtu Erioni ka numerologjinë kundër se kur Edi Rama kandidoi për kryetar Bashkie në vitin 2000, ai ishte 36 vjeç, ndërsa Erioni në 2011 nuk i ka më tepër se 32 vjeç, madje edhe këtë moshë e mbush në dhjetor, ndërsa zgjedhjet, në çdo rast, janë më herët.
Nëse Erioni i qëndron numerologjisë së tij, ai mund të kandidojë për kryetar të Bashkisë së Tiranës në vitin 2015, kur do të jetë 36 vjeç. Po ku do të qëndrojë Erioni deri në 2015? Nëse i qëndrojmë kalkulusit të Erionit ai duhet të presë në ndonjë karrige ministri. Por këtu ngatërrohet disi llogaria për Erionin se Edi Rama u bë ministër në vitin 1998, në moshën 34 vjeç. Erioni do të arrijë moshën 34 vjeç në vitin 2013. Në vitin 2013 i takon që të mbahen zgjedhjet e rregullta parlamentare, çka do të thotë se Erioni i sjell mbrapshti PS-së. Por gjërat rregullohen lehtë nëse PS vjen në pushtet në 2011 apo në 2012, mjaft që Erioni të pranojë që të mos bëhet ministër deri në vitin 2013.
Këtu Erioni është në dilemë mes kalkulusit të vet numerologjik dhe politikës reale, se nëse ai nuk bëhet ministër që me dorën e parë, nëse ka zgjedhje të parakohshme, atëherë me siguri që do t’ i thonë që më mirë të presë vitin 2015 kur do të kandidojë për kryetar të Bashkisë. Kështu që kalkulusi numerologjik i Erionit është në konflikt interesi me interesin e PS-së për zgjedhje të parakohshme.
Erion Veliajt nuk i del mirë llogaria vetëm në një gjë, në Horoskopin Kinez, që është pasioni i tij që nga koha kur ishte në Amerikë për studime dhe ku pati një shok dhome kinez. Që nga koha që Erioni shkoi në Amerikë dhe në vazhdim kur u kthye në Shqipëri në krye të “Mjaft”, atij i eci mirë me Horoskopin kinez. Që atëherë, Horoskopi kinez u bë pasioni i tij sekret, të cilin e ndan me fare pak njerëz të besuar.
Erioni ka lindur në 1979 që është Viti i Deles, sipas Horoskopit Kinez. Gjërat filluan të ngatërrohen në vitin 2009, i cili sipas Horoskopit kinez ishte viti i kaut. Në këtë vit Erioni doli në zgjedhjet parlamentare si kryetar partie, dhe megjithëse socialistët kanë bindjen se nëse hapen kutitë e votimit do të zbulohet se e majta ka më shumë vota, asnjëri prej tyre nuk beson se partia e Erionit ka më tepër vota në kuti se rezultati zyrtar. Si duket kombinimi i kaut me delen rezulton fatkeq në gjithçka tjetër përveç atyre party me meshkuj të veshur si femra, që Erioni u detyrua që ta pranonte botërisht se kishin ndodhur vërtet tek “Mjaft”.
Horoskopi kinez nuk paralajmëron asgjë të mirë as në duelin Veliaj-Rama. Sipas horoskopit kinez, Fatos Nano dhe Edi Rama kishin lindur në të njëjtën shenjë në horoskopin kinez, në Vitin e Dragonit, se si viti 1952 kur ka lindur Nano, ashtu dhe viti 1964 kur ka lindur Rama, është Viti i Dragonit sipas horoskopit kinez. Pra, dueli Nano-Rama ishte një duel dragonësh, i cili u nda në vitin 2005, që sipas Horoskopit kinez ishte viti i Gjelit të Kuq. Një ndër dy dragonët e PS-së do të bënte gjelin e vetëm që do të këndonte në parti dhe si i tillë mbeti Rama.
Në rastin Rama-Veliaj, lufta mes deles dhe dragonit nuk është e vështirë që të parashikohet. Viti 2011, sipas Horoskopit kinez është Viti i Lepurit. Kur ka një konflikt mes Dragonit dhe Deles, i pari nuk ka kundërshtim që delja të bëjë edhe lepurin, rol që Erioni mund ta bëjë edhe në pozicionin që është sot. Për fatin e keq të Erionit, viti 2019 do të jetë Viti i Derrit sipas horoskopit kinez. Sipas supersticioneve të Erionit, të gjitha gjasat janë se karriera politike e Erion Veliajt ka marrë fund. Tekefundit, a mund të imagjinohet një Erion Veliaj kryetar i Bashkisë së Tiranës, i cili me Lëvizjen “Mjaft” lufton kryeministrin Edi Rama? Edi Rama ka më shumë fantazi se Erioni dhe në çdo rast di sit a bëjë qesharak. E shumta që mund të arrijë Erioni është që të bëhet deputet i PS-së, dhe këtu do të jetë i lumtur nëse kur të arrijë moshën që ka Edi Rama sot, pra 46 vjeç, nuk do të jetë ish-deputet, por ende deputet. Edhe në këtë rast Horoskopi kinez nuk paralajmëron ndonjë gjë të mirë se viti 2025, kur Erioni do të jetë 46 vjeç, është viti i Gjarprit sipas Horoskopit kinez, dhe kombinimi i Deles me Gjarprin nuk është aspak inkurajues për delen.
Horoskopi kinez në këtë rast ndoshta thjesht paralajmëron, në një koincidencë ironike, se PS në prag të zgjedhjeve të vitit 2019, 2020, 2021, edhe sikur Erioni të ketë sukses, fakti që Erioni do të punojë fort në prapaskenë për humbjen e zgjedhjeve nga kjo parti, aq më tepër edhe për shkak se socialistët do të kenë në kujtesën historike të tyre atë që bëri Erioni për dy vjet e ca para zgjedhjeve të vitit 2005, në mos do ta dëbojnë fare nga partia, së paku as që do ta shkojnë ndërmend që ta bëjnë kryetar të PS-së.
Të gjitha këto duket se do të sjellin tek Erionin sëmundjen e hershme të politikanëve të rinj të PS-së, të cilët kanë më tepër ambicje se mbështetje në parti, pra bashkëpunimin sekret me PD, siç bëri Ilir Meta dikur. Kështu që Erioni pritet të përfundojë si një Ilir Metë i ri, në version të shfiguruar, se Ilir Meta pas bashkëpunimit të parë me Berishën, në vitet 1992-1996, u bë zëvendëskryeministër dhe kryeministër, ndërsa Erioni nuk pritet që ta ketë këtë fat. Kështu që Erion Veliaj do ta mbyllë karrierën politike, ose ashtu siç e filloi tek “Mjaft”, duke luftuar për rrëzimin e PS-së nga pushteti, ose si Ylli Manjani, si zëvendësministër në një qeveri të ardhshme të PD, kur kjo parti të rikthehet në pushtet. Ndoshta Erioni do të jetë zëvendësministër për komunitetin LGBT në Ministrinë e Punës, Çështjeve Sociale dhe Shanseve të Barabarta, dhe do të krenohet që e mbylli karrierën duke siguruar një shtesë në emrin e gjatë të kësaj ministrie. Natyrisht nëse Erioni nuk e kalon kohën gjyqeve, me pasionin e madh që ka për të bërë padi në gjykatë, me ç’ rast duket se së shpejti gjykata e Tiranës do të duhet që të krijojë seksionin gjyqësor të posaçëm me emrin “Veliaj”. Kështu Erioni do t’ u kushtojë shumë taksapaguesve shqiptarë për të cilët bën sikur rri natën pa gjumë, natyrisht me ndihmën e muzikës. Ndonëse Erioni nuk ka qenë kurrë në jetën e vet taksapagues se edhe ato paratë me të cilat ai paguan ndonjë taksë vendore, në fakt i paguan me para të marra nga ndërkombëtarët, të cilat i kontabilizohen shtetit shqiptar si asistencë teknike.
kastriotmyftaraj@sot.com.al
8 maji, Uollfarth: Partitë të përmbushin detyrat
Topalli-Dokle, debatet në seancë jashtë kamerave
Pse e bëni sot dhe për më tepër pse vetëm për njërin nga deputetët?! Ju digjet xhani për drejtësinë?! Aspak! Por si gjithmonë po përdorni demagogjinë! Po bëni lojën e të ndershmit”, deklaroi deputeti Namik Dokle. Por gjatë fjalës së tij ai është ndërprerë disa herë nga kryetarja e Kuvendit, Jozefina Topalli, e cila pretendonte se Dokle po shkelte hapur rregulloren e Kuvendit. Më pas seanca ka pasur edhe momente tensioni, duke u ndërprerë për rreth 15 minuta pas protestave të socialistëve. “Gazeta Shqiptare” boton sot të plotë replikat Dokle-Topalli të bëra pa praninë e kamerave.
JOZEFINA TOPALLI
Z.Dokle, mbaroi koha! Faleminderit! Z.Patosi ju lutem fjala juaj për të mbrojtur kërkesën tuaj!
NAMIK DOKLE
Po flas në emër të grupit parlamentar të Partisë Socialiste. Më jepni fjalën ju lutem!
JOZEFINA TOPALLI
Z.Dokle, ju lutem zbatoni rregulloren! Z.Patozi keni të drejtën tuaj deri në 5 minuta. Rregullorja është rregullore.
NAMIK DOKLE
Pa lexoje njëherë rregulloren...
JOZEFINA TOPALLI
Neni 27, pika 4 e rregullores thotë: “Kuvendi vendos me votim të hapur, pasi dëgjon për jo më shumë se 5 minuta një folës pro dhe një folës kundër ndryshimeve të paraqitura”. Z.Dokle, ju folët 5 minuta. Ju lutem z.Patozi keni të drejtën e 5 minutave tuaja për të mbrojtur kërkesën tuaj.
NAMIK DOKLE
O zonjë, lexoje mirë rregulloren!
JOZEFINA TOPALLI
Rregullorja është rregullore për Namik Doklen, për Astrit Patozin, për mua dhe për secilin prej jush. Rregullorja respektohet pikë për pikë. Gërmë për gërmë.
NAMIK DOKLE
Kur kam qenë kryetar Kuvendi, kurrë nuk ju kam ndërprerë fjalën sa herë keni folur në emër të grupit...kurrë. 100 herë e kërkonte fjalën Berisha. Kurrë s’i kam ndërprerë fjalën, as atij, as juve.
JOZEFINA TOPALLI
Unë po të lexoj rregulloren Z.Dokle, që ju keni qenë ish-kryetar Parlamenti. Ju e dini sa e rëndësishme është rregullorja. Faleminderit z.Dokle. Ju shfrytëzuat të drejtën tuaj për 5 minuta për të folur për rendin e ditës.
NAMIK DOKLE
Unë nuk lëviz prej këtu pa mbaruar fjalën.
JOZEFINA TOPALLI
Z.Dokle. ju keni qenë kryetar parlamenti. Nuk ka gjë më të rëndësishme sesa rregullorja. Respektoni rregulloren. Ju lutem lëruni të tjerëve të drejtën e fjalës.
NAMIK DOKLE
Ti fut në kalendar një nismë antikushtetuese për kufizim imuniteti për të futur deputetët në burg. Tani ti nuk na jep ne të drejtën e fjalës. Çfarë Parlamenti është ky? Çfarë demokracie është kjo zonja Topalli?
JOZEFINA TOPALLI
Rregullorja në nenin 27 thotë që “Kuvendi vendos me votim të hapur, pasi dëgjon për jo më shumë se 5 minuta një folës pro dhe një folës kundër ndryshimeve të paraqitura”.
NAMIK DOKLE
Leri moj këto broçkulla ti. Mos më trego mua rregulloren
JOZEFINA TOPALLI
Në bazë të nenit 64, pika 2 ju tërheq vëmendjen z.Dokle. Ju lutem mos bllokoni foltoren. Ju lutem respektoni rregulloren që është e qartë, e prerë. Ju lutem zini vendin tuaj dhe leni vendin kryetarin e grupit parlamentar të marrë fjalën e tij dhe të mbrojë kërkesën e tij. Z.Dokle, ju falenderoj. Thatë shpjegimet tuaja. Ju keni të drejtë të jeni kundër ndryshimit të kalendarit dhe kryetari i grupit ka të drejtë të bëjë kërkesën e tij.
NAMIK DOKLE
O zonjë, je në terezi ti apo jo? Nuk lëviz unë prej këtu. Më jep fjalën...
JOZEFINA TOPALLI
Z.Dokle, në bazë të nenit 64, pika 2, ju tani keni vërejtje.
NAMIK DOKLE
Po më tremb tani?
JOZEFINA TOPALLI
Z.Dokle, një ish-kryetar parlamenti gjënë më të shëmtuar që mund të bëjë është që të tentojë të bllokojë seancë, të shkelë rregulloren dhe të mos pranojë respektimin e rregullores. Z.Dokle, respektoni nenin 27, pikën 4.
NAMIK DOKLE
A je në terezi ti apo jo? Më jep fjalën moj ti zonjë. Ti paske rrëshqit fare.
JOZEFINA TOPALLI
Z.Dokle, keni vërejtje për herë të tretë dhe këto regjistrohen në procesverbal. Z.Dokle respektoni rregulloren. Mos tentoni të bllokoni Parlamentin dhe rendin e ditës së sotme. Do jenë seanca plenare që do votojë. Faleminderit z.Dokle. Unë mbas seancës plenare do mbledh Byronë për z.Dokle për shkelje të rregullores dhe tentativë për bllokim të seancës plenare, bazuar në nenin 65, pika 4 të rregullores.
NAMIK DOKLE
Moj zonjë, unë kam dhënë dorëheqjen nga kryetar Kuvendi për mbrojtjen e parlamentarizmit dhe respektimin e Kushtetutës dhe t’i më flet mua këtu si mësuese filloreje e edukatore kopshti e më tregon mua se do mbledhësh Byronë. Po kush je ti moj zonjë?
JOZEFINA TOPALLI
Po do mbledh Byronë për të gjykuar, për këtë sjellje të pahijshme, fyese që kërkon të bllokojë seancën plenare të Kuvendit nga z.Namik Dokle. Ju lutem z.Dokle lironi foltoren, respektoni nenin 27 të rregullores dhe rregulloren në tërësi. Z.Dokle, ti po bllokon Parlamentin në një mënyrë të pashembullt për një ish kryetar Parlamenti. Uluni dhe zini vendin e mos bllokoni Parlamentin. E paparë në historinë e një parlamentarizmi që një ish kryetar Parlamenti të bllokojë Parlamenti, të shkelë rregulloren, të shkelë Kushtetutën dhe të mos lejojë kolegët që të marrin fjalën.
NAMIK DOKLE
Mos më fol mua ti sikur të dhimbset parlamentarizmi ty, se keni vrarë katër qytetarë mes bulevardit.
JOZEFINA TOPALLI
Z.Dokle, parlamenti është gjëja më e shtrenjtë për çdo deputet.
NAMIK DOKLE
Më jep o zonjë fjalën, se nuk ulem unë pa mbaruar fjalën time.
JOZEFINA TOPALLI
Z.Dokle, shumë njerëzisht ju kërkoj që pasi të pini ujin, të zini dhe vendin tuaj.
Xhaxhai i Aleks Nikës: Dyshimet e mia për vrasjen
Shekulli Online
Marku ngjan si një statujë e mbushur me dhimbje, nga e cila duket se s'do nxjerrësh asnjë fjalë. I heshtur dhe i vrarë nga çfarë ka ndodhur më 21 janar dhe pas tij, e ka të vështirë të bindet nëse duhet të flasë fort, apo duhet të jetë i matur për të respektuar më shumë kujtimin e nipit të tij, djalit të vetëm që ka lënë në shtëpi katër motra dhe dy vajza. Ka disa brenga të cilat kërkon t'i sqarojë. Ato kanë të bëjnë me Aleksin, me familjen Nika, me Sali Berishën dhe njerëzit e tij që po rivrasin sipas tij Aleksin me mungesën e respektit për ikjen e tij.
A e dinit ku ishte Aleksi më 21 Janar.?
S'kam pas nevojë të pyes. E dija pa më thënë as ai vetë se do ishte në Bulevard. Aleksi ishte një socialist. Nuk ka pas nevojë të më thoshte ku ishte. E dija që ishte në bulevard. Nuk e dija që nuk do të kthehej më gjallë. Dhe kjo më bën të ndjehem se jetoj kot, pa asnjë motiv nëse drejtësia nuk vihet në vend.
Si mësuat për vdekjen e tij?
Si gjithë të tjerët. Fillimisht nga televizioni, që ishte plagosur. Pastaj pashë Prec Zogaj në televizion që bëri thirrje për ndihmë në Spitalin Ushtarak. Duke qenë se është një mik i familjes sonë, u prekëm dyfish kur dikush tentoi të shpifë dhe për apelin e tij të dhimshëm nga Spitali Ushtarak. Më tej si gjithë të tjerët jetuam me shpresën e pakët se Aleksi do t'ia dilte mbanë. Por nuk mundi siç e patë.
Duket që e përjetoni shumë rëndë ikjen e tij. A do ta këshillonit të mos vinte në protestë më 21 janar?
Aleksi nuk ishte djalë që mund ta ndalje për të shkuar në një protestë. Ajo ishte një protestë e ligjshme, ishte një demonstratë e ligjshme dhe kushtetuese. Askush nuk ka tejkaluar të drejtën që t'i merrej jeta. Gjithçka që ka ndodhur me katër qytetarët e vrarë dhe dhjetëra të tjerë të plagosur është antikushtetuese dhe duhet të marrë dënimin kapital. Askush të mos mendojë se gjaku i tyre do bëhet ujë. Unë jam vetë jurist dhe kam punuar në administratën e lartë të shtetit shqiptar. Ashtu si unë dhjetëra qindra juristë në këtë vend e dinë mirë kur mund të përdoret arma dhe po aq mirë se nuk mund të merret jeta e një njeriu të pafajshëm në bulevard për arsye politike. Pikërisht duke ditur se jetojmë në një shoqëri të lirë dhe demokratike, duke ditur të drejtat tona qytetare, nuk do të kisha këshilluar të mos shkonte, pasi nuk shikoja asnjë rrezik nga një demonstratë e qytetareve kundër qeverisë, pasi kane parë me sytë e tyre se si zv.kryeministri i vendit bën pazare për miliona euro kur në shtëpitë e mijëra shqiptarëve nuk ka as ushqim mjaftueshëm. Do të më dukej krim ta kisha këshilluar të ndalej, duke e ditur që jemi shoqëri demokratike dhe më duket krim i shumëfishtë tani përdhosja e vdekjes së tij nga ata që e vranë .
A njihej Aleksi si socialist në Lezhë?.
- Po. Gjithkush që e njihte e dinte që ishte dhe socialist. Ishte një qytetar normal. Kishte një shtëpi të mrekullueshme, të ndërtuar me punë të ndershme dhe një biznes të vogël të qëndrueshëm ku kish punësuar motrat dhe familjen e vet. Nuk ishte njeri që vuante për bukën e gojës. Nuk kishe nevojë të paguhej për të ardhur në miting siç kërkon ta përdhosë kujtimin e tij Lulëzim Basha. Nuk kish nevojë për asgjë, përveç drejtësisë për të cilën doli në rrugë.
A mendoni se është vrarë aksidentalisht apo ka pas goditje selektive ndaj tij?
Nuk e them dot me plot gojën pa përfunduar çdo hetim dhe gjykim. Por di të them se vrasja e Aleksit ndryshon paksa nga tri vrasjet e tjera. Skaneri të krijon dyshime se është qëlluar me snajper me një goditje selektive .
Unë nuk mund të them se dikush porositi vrasjen e tij, por po pres me shpirt në dhëmbë të mbarojë hetimi dhe çështja t'i kalojë gjykatës. Kam një dyshim se segmente të caktuara në Lezhë, të lidhura me pushtetin, nëse e kanë identifikuar në bulevard mund ta kenë seleksionuar për ta vrarë. Por kjo është e gjitha, dyshim i imi. Po presim drejtësinë.
-Ka pas probleme në Lezhë Aleksi?
- Jo. Aleksi nuk ka pasur asnjë problem. Ai ishte një djalë që e respektonte gjithë Lezha dhe ata që e njihnin. Por të tjerë, biles nga ata që kanë hapur zjarr nga brenda gardhit të kryeministrisë kanë pas disa probleme në Lezhë, kanë pas disa interesa financiare në zaptime tokash dhe përdorim të pushtetit. Lus Zotin të mos bashkohen këto gjëra, pasi do të ishte një krim i mafies politike.
- Kur flisni për vrasjen e Aleksit në familje flisni për një vrasje aksidentale apo politike?
Është një vrasje për arsye politike e urdhëruar nga njerëzit më të fuqishëm të pushtetit. Në zyrë ka qenë kryeministri Sali Berisha dhe Ministri i brendshëm Lulëzim Basha. Unë e njoh Komandantin e Gardës Ndrea Prendin dhe kam besim se ai e di mirë që njeriu nuk vritet me duar në xhepa në bulevard. Ai duhet të ruajë autoritetin e tij dhe të Gardës jo duke fshehur gardistët, por duke dëshmuar para drejtësisë kush i urdhëroi.
Garda por dhe çdo formacion tjetër ushtarak e ka të ndaluar të përdorë armën në publik. Ne pamë në kamera policë që gjuanin tek piramida jashtë kryeministrisë. Ne pamë policë që qëllonin drejt mbi turmën. Ligji për përdorimin e armëve u shkel publikisht para syve të miliona shqiptarëve. Dhe kjo për një arsye të thjeshtë. Disa nga ata që kanë vrarë shihet qartë që janë militantë që mbrojnë pasuritë dhe pushtetin e tyre të dyshimtë. Ndaj ne duam të dimë kush dha urdhër. Ne e duam këtë përgjigje. Po presim në qetësi, por jo aq të qetë. Po presim në gjakftohtësi, por jo aq të ftohtë. Po presim një fjalë nga drejtësia. Po presim një shenjë. Diçka duhet të na thonë. Lus Zotin të mos vazhdojnë më disa fytyra të urryera politike të vazhdojnë e të thonë se ishin rrugaçë, kokëpalarë dhe banditë. Lus Zotin për fëmijët e tyre, jo për ata të Aleksit se ata ngelën pa babë. Të gjithë duhet ta kuptojnë se ne nuk mund të lëmë të rivrasin ata që i vranë. Një herë i vranë tinëzisht me plumb dhe tash po i vrasin përditë me fjalë. Duhet ta dijnë se jemi gjallë.
E keni fjalën për fjalorin e kryeministrit?
Edhe për fjalët e tij. Unë e njoh atë. Kam jetuar vite të tëra komshi me të. Ai po na e vret djalin për së dyti. Unë besoj se ai më njeh. Nëse do t'i kishte ndodhur ajo që i ndodhi Aleksit, djalit të tij, ne nuk do silleshim ashtu si po sillet ai me djalin tonë. Nuk do ta fyenim, nuk do ta përdhosnim, por do ta respektonim dhe do ta ngushëllonim. Ai po thotë gjëra të rënda. Po thotë se vramë 3 apo 4 por mund të vrisnim dhe 300 se ishte puç. Pastaj tërhiqet nga fjala puç. Pastaj fyen përsëri të vdekurit. Ka një kufi. Nuk ka vetëm ai fëmijë, ka pas dhe Aleksi. Nuk ka vetëm ai mbesa, kam dhe unë që tani i kam jetime për shkak të tij. Ai s'mund të na përdhosë edhe të vdekur. Është mirë t'i hapë rrugë drejtësisë, pasi e drejta vonon por nuk harron. Dikush do ta vendosë atë. Ne duam ta vendosin gjykatat e lira. Nëse Berisha kërkon rrugë të tjera keq për atë. Desha t'u them dy fjalë dhe atyre të tjerëve rrotull tij. Nëse do t'u kishte ndodhur atyre kjo fatkeqësi, edhe sikur viktima të kish faj ne do të shkonim t'i ngushëllonim dhe nuk do të qeshnim si Jozefina, nuk do fyenim gjakun e tyre. Ajo nuk di të sillet as si nënë, as si motër as si femër. Desha t'i them Sokol Olldashit, se Aleksi nuk kish nevoje te punësohej në polici bashkiake, se kishte biznesin e tij, ku mund të merrte dhe Olldashin polic kur të ikë nga pushteti, me kusht që të mos pinte më.
Ata u sollën si shtazë me vdekjen e Aleksit. Tentuan të prishnin me lidhjet e tyre të pista dhe funeralin e Aleksit. Kësaj nuk ja arritën, por tradhtuan veten se kanë gisht tek kjo plagë që na kanë hap..
Kanë tentuar t'ju prishin funeralin?
-Po. Kanë manipuluar me një njeri të tyre të sjellë aty me kamerë amatore për të inskenuar diçka të turpshme. Nuk ia arritën. Ne e falënderojmë nga zemra Edi Ramen, dhe ata që respektuan kujtimin e Aleksit. Motrat e Aleksit, dhe babai i tij kanë shprehur falënderimet publikisht të nesërmen e varrimit. Ata që sajuan skenën u fshehën si minj dhe mbyllën telefonat që atë ditë. Por ne na kanë rëndu, pasi kane dash të na përdorin edhe pasi na vranë. Edi Rama do të jetë pjesë e familjes sonë, pasi respektoi atë që bëri Aleksi. Nga te tjerët pres drejtësi. Pres të mos pengojnë zbardhjen e krimit.
-Meqë hymë te politika, a shikoni rrezik që politika dhe diplomacia të ndërhyjë në hetim?
Po shikojmë që ka presione. Ka disa herë dhe deklarata që të bëjnë pesimistë. Pashë dhe ambasadorin amerikan në krah të një kryepolici duke e lavdëruar për profesionalizëm. Unë nuk e di ç'profesionalizëm ishte ai, por di të them se ata shkelën çdo ligj dhe vranë katër njerëz të pafajshëm. Unë di që në SHBA e kanë të shenjtë ligjin.. As deklaratat e tij për të bërë barazim situatën e demonstruesve me gjakun e derdhur nga pushteti, nuk më duken normale, por kjo është punë e tij. Nuk mund të vihet në plan të parë shkelja e ligjit mbi tubimin dhe të lihet në harresë terrori shteteror që derdhi gjak. Por thashë, kjo është punë e atij zotërisë. Në fund të fundit, djalin tonë nuk e vrau ai, por pushteti im dhe unë ja kërkoj qeverisë shqiptare drejtësinë ose gjakun. Gjakun e Aleksit as e falim dhe as nuk do ta lëmë të humbasë. Ne ja kërkojmë shtetit tonë. Ne presim që atë të zbardhë Prokuroria. Frika e atyre që kanë vrarë, nuk e mund dot drejtësinë dhe as që na frikëson dot ne që kemi mbetur gjallë. Dikush do ta vërë në vend drejtësinë.
Tuesday, February 15, 2011
Basha: Asnjë azilkërkues në zonën Shengen
2 muaj pas liberalizimit te vizave, shifrat flasin për një lëvizje dinjitoze të shqiptarëve15 shkurti, për Ministrinë e Brendshme, përkon me 2 mujorin e momentit kur shqiptarët nisën udhëtimin e parë pa viza në të gjithë zonën Shengen.
Për të bërë një bilanc të qartë dhe konkret se cila është ecuria e deritanishme, Ministri i Brendshëm Lulzim Basha, thërriti në një tryezë të përbashkët, përfaqësuesit e lartë të Policisë së Shtetit, të Ministrisë së Jashtme, të Bashkimit Europian, por edhe faktorët jo më pak të rëndësishm sic janë agjencitë dhe operatorët turistikë, të cilët zoti Basha i ka konsideruar si një hallkë tepër të rëndësishme në sensibilizimin e mosshkeljes së rregullave të kërkuara.
Por pas 2 muajsh, që kur u krye lëvizja e parë pa viza, Ministri i Brendshëm bëri publik shifra të cilat ai i cilësoi si dinjitoze në të gjithë rajonin dhe duke e quajtur këtë process si të suksesshëm dhe të kaluar si një provë të suksesshme me vendet e Bashkimit Europian.
“ Sot është 2 muaj që prej momentit të liberalizimit të vizave dhe ky është momenti për t’u ndalur në ecurinë e këtij proçesi, çfarë ka sjellë kjo lëvizje e lirë. Prej 15 dhjetorit dhe deri dje në mesnatë kanë ushtruar të drejtën e lëvizjes së lirë mbi 126 mije qytetarë shqiptarë. 39 mijë janë rikthyer pasi e kanë përdorur këtë të drejte që ditën e parë. Refuzimi për hyrjen e shtetasve ka qënë 2 % ose afro 700 persona, cfarë e bën këtë një shifër rekord në të gjithë rajonin. Procesi lëvizjes së lirë është është mjaft normale”, tha Ministri Basha duke theksuar një fakt tepër të rëndësishëm dhe që nga shumë përfaqësues të opozitës u paragjykua, sic është kërkimi i azilit. Zoti Basha tha se shifra e azilkërkuesve ëshët zero, të cilën ai nuk ngurroi t’a quaj tepër mbresëlënëse dhe dinjtoze veçanërisht në sytë e partnerëve ndërkombëtare dhe vendeve të Bashkimit Europian.
Në këtë kontekst, Ministri i Brendshëm falenderoi agjencitë dhe operatorët turistikë të cilët ai i quajti si një faktor mjaft të rëndësishëm për arritjen e kësaj shifre zero të azilkërkuesve por edhe të refuzimit të hyrjeve.
Sërish ministri Basha përsëriti faktin se çfarë pasojash do të sillte kërkesa për azil nga shqiptarët dhe duke bërë një thirrje-kujtesë për ata të cilët ndodhen jashtë për të mos shkelur afatet e qëndrimit në vendet e zonës Shengen.
LULËZIM BASHA: PPE, indinjatë për dhunën e 21 Janarit
Z. Basha, a mund të na thoni diçka rreth PPE-ve dhe Asamblesë Politike të saj, që miratoi rezolutën për Shqipërinë?
PPE ka grupin më të madh parlamentar në Parlamentin Evropian, ka tre nga figurat kryesore, 14 kryetarë qeverish, 2 qeveri të qendrës së djathtë, një organizatë e fuqishme e Bashkimit Evropian që shpreh qëndrime të rëndësishme për politikat e zgjerimit.
Nuk kemi të drejtë vote, por sikundër Partia Demokratike është mazhorancë në Shqipëri, PPE është mazhorancë në PE.
Asambleja politike kishte një axhendë të ngjeshur, por 70 partitë anëtare kishin si diskutim këtë dhe vetë Buzek ishte aty.
Unë personalisht i informova për situatën dhe rezoluta mbi Shqipërinë pati një vendimmarrje unanime, asnjë kundërshtim, asnjë abstenim.
Prania ime ishte për një përgjithësim të informacionit, por përfaqësuesit e PPE-ve janë funksionarë të lartë në Bashkimin Evropian, ose europarlamentarë dhe aksesin e kanë pasur nga shumë burime, nuk mund të them që isha në një dhomë ku nuk ishin të informuar.
Reagimi ishte indinjatë dhe shqetësim i thellë, për atë hap mbrapa 2 muaj nga heqja e vizave, kjo zgjoi indinjatën e tyre, shqetësim që është shprehur edhe në rezolutë.
Çfarë përmbante konkretisht rezoluta e PPE-ve?
Rezoluta ishte shumë e qartë, konstatoi se ka pasur një tentativë për të marrë pushtetin me dhunë, kjo u konstatua nga ngjarjet e 21 janarit, rreth sulmit rrethim prej 5 orësh të Kryeministrisë.
Kemi shqetësimin e faktorit evropian që në një vend ku ka patur zgjedhje të lira, ka pasur qeveri demokratike, janë përmendur “mjetet dhe teknikat e dhunshme”.
Ka konstatime në pjesën hapëse ku përshëndeten hapat e prokurorisë për zonën e Shkodrës, ambasadat e kanë përcjellë këtë dhe ka zënë vend në këtë rezolutë nuk ka pasur vend dyshim as për zgjedhjet e 2009, si të lira dhe të ndershme.
A ishte rezoluta edhe produkt për zgjidhje?
Ka një produkt që duhet lexuar me kujdes, i kërkohet Edi Ramës të ndalë përshkallëzimin politik dhe të bashkëpunojë brenda institucioneve të Shqipërisë, kërkohet një angazhim për OSBE ODIHR-in dhe e treta ka të bëjë me një hetim gjithëpërfshirës.
Rezoluta analizon një moment të rëndësishëm për aspiratat, por edhe për vetë gjendjen e vendit dhe se çfarë do të thotë kjo për qytetarët shqiptarë.