Tuesday, March 18, 2014

Berisha: Të prishen pallatet e Koços dhe të Vangjush Dakos, janë në rërë dhe det

Ish-kryeministri Sali Berisha kritikon prishjen e ndërtimeve me leje dhe thotë se edhe nëse lejet janë dhënë në mënyrë të paligjshme kjo është një përgjegjësi që duhet ta paguajë shteti dhe jo individët. Në një intervistë për Agon Channel, në emisionin Watching të Menada Zaimit, z.Berisha duke folur sonte mbi këtë temë sugjeroi se duhet të prishen pallatet siç tha ai të ndërtuara në det dhe në rërë, të kryebashkiakut të Durrësit, Vangjush Dako dhe botuesit të “Shekullit” dhe deputet i Vlorës, Koço Kokëdhima.


Në këtë intervistë, z.Berisha flet edhe debatin e ndezur ditët e fundit për SHISH.

Çfarë ka të rrezikshme në mënyrën sesi mazhoranca e re po i qaset institucioneve, kjo duket sikur vjen si alarm nga opozita e sotme?

Berisha: Të rrezikshme në qëndrimin e mazhorancës së sotme në rrafshin institucional dhe Kushtetues është qëndrimi i tyre fund e krye anti - shtet. Është përpjekja e paimagjinueshme për të zëvendësuar institucionet, ligjet, praktikat, standardet me pushtetin personal të një njeriu i cili u dëshmoi shqiptareve se përveç paranojës së tij, nga e cila vuan prej vitesh, ai nuk ka asnjë koncept për shtetin.

Pyetje: I referoheni SHISH në këtë rast?

Berisha: Jo i referohem përpjekjes së tij të hapur për të ndryshuar Kushtetutën me akte normative apo me vendime qeverie. Kur një kryetar qeverie, përpiqet të tejkalojë Kushtetuan, ai bën përpjekje të hapura siç do ta cilësonte Kryetari i Komisionit të jashtëm tëParlamentit Europain dhe Kryetari i Komisionit të të Drejtave të Njeriut, se është komisioni më i rëndësishëm dhe i Sigurisë së Parlamentin Europain, Elmar Brok, përpjekje diktatoriale të mirëfillta. Në histori kurrë një kryeministër i një vendi të lire nuk mund të imagjinojë të tejkalojë Kushtetutën me akte normative dhe vendime qeverie. E ka bërë në vitin ’37 Adolf Hitleri.

Pyetje: I referoheni aktit për nëpunësin civil?

Berisha: Jo vetëm atij. Ai është një akt flagrant. Por akoma më i rëndë në konceptin tim, që dhunon disa nene të Kushtetutës, është akti i INUK ku me një mercenar të paguar ai mendon të rrënojë banesat me leje, të rrënojë banesat e legalizuara dhe pa u dhënë të drejtë qytetarëve ti drejtohen gjykatave. Të përjashtojë pra gjykatat nga verdikti i ekzekutivit. Të përjashtojë të drejtën më themelore që kanë fituar qytetarët e vendeve të lira për tu adresuar gjykatave. Sepse këtu ke të dhunuara nenet themelore të Kushtetutës, atë të pronës private, atë të pacënueshmërisë së banesës.

Pyetje? Pse nuk e shikoni si një reagim që i vjen në mbrojtje edhe pjesës dërrmuese të qytetarëve. Vërtet mund të jetë dhënë një leje, por kur ajo është jashtë rregullave apo koncepti urbanistik...?

Berisha: Nëse është dhënë një leje, përgjegjësia është e shtetit. Shteti duhet të mbajë njëlloj si individi, përgjegjësitë e veta. Çfarë janë ligjet dhe çfarë është tërësia e ligjeve. Tërësia e ligjeve, para së gjithash dhe mbi të gjitha, është të mbrojë qytetarin nga dhuna dhe arbitrariteti shtetëror. Këtë synojnë ligjet. Nëse ti në përputhje me ligjet e vendit ke marrë një leje, ti je legjitim, loja është kontratë me shtetin.

Pyetje: Edhe jashtë çdo plani urbanistik është e justifikuar?

Berisha: Leja është leje, edhe nëse është jashtë çdo plani.

Pyetje: Edhe në rërë?

Berisha: Ai nuk po prish ato në rërë e ne det, se deri më sot pallatet e Koços dhe të Vangjush Dakos, që janë në rërë dhe në det, nuk i ka prekur njeri dhe pse ka dy vendime për të prishur kështjellën e Koços në Qeparo dhe nuk zbatohet as njëri e as tjetri. Nëse një ndërtim është bërë me leje në përputhje me një plan ai mund të preket vetëm kundrejt shtetëzimit dhe të shtetëzimit mbi kushtet që bazohen mbi ligjin për shtetëzimin. Në asnjë rrethanë tjetër shtëpia është e pa prekshme.

Pyetje: I referohem debatit më të fundit për SHISH, pse ju po e mbroni kreun e SHISH, kur në një seancë të komisionit të sigurisë ai duhet të kishte paraqitur çertifikata e sigurisë për të raportuar se çfarë ka ndodhur. A ka dhënë ai apo jo informacione për situatën e rendit dhe sigurisë në vend?

Berisha: Në hierarkinë shtetërore çertifikata e sigurisë nuk i kërkohet Presidentit të Republikës, i cili ka tagrin ligjor të deklasifikimit të çdo lloj materiali, përveç atyre që disponohen nga pushteti tjetër, pra gjykatat, Kryeministrit të vendit, i cili mund të marrë informacion nga çdo institucion por deklasifikon çdo informacion përveç atyre që janë në mbrojtje nga prokuroria dhe gjykatat. Është shefi i SHISH, ai i cili menaxhon të gjitha burimet e informacionit dhe udhëheq mbledhjen e tyre të shërbimit të tyre.

Pyetje: Ai e kishte një certifikatë të skaduar apo jo?

Berisha: Nuk e kishte për shef shërbimi, e kishte kur ishte këshilltar i imi, se si këshilltar do ta kishte atë pasi kishte të bënte me çështje të sigurisë së sistemeve informatike. Me emërimin që merr nga Presidenti ai ka çdo certifikatë që i duhet. Është njëlloj si ti kërkosh Prokurorit të Përgjithshëm çertifikatë për materialet që ai administron dhe disponon. Kjo është qesharake dhe e turpshme, të cilën mafia në pushtet kur shkoi te raportonte se cilat janë informacionet e Ministrisë së Brendshme për tritolin, e tmerruar nga raportimi i tij, gjeti një rast për të mbyllur derën.

Pyetje: Mazhoranca thotë se dy herë ka raportuar?

Berisha: Këto janë vetëm trillime dhe nëse shqiptarët vazhdojnë të besojnë trillimet e Edi Ramës nuk ka gjë më të dhimbshme, sepse një njeri që vjen me gjashtë muaj duke kaluar nga dështimi në dështim, nga mashtrimi në mashtrim, koha vjen që i thuhet të paktën nuk të besoj. Ju e keni dëgjuar dhe u tha para dy javësh se në Shqipëri gjatë vitit 2013 ka patur 300 e ca raste me tritole, kurse gjatë periudhës sime tha ka pasur 27 tritole. Pra një njeri që ndërton gjithçka mbi gënjeshtrën siç ndërtoi armët kimike mbi gënjeshtrën, siç ndertoi premtimet për shëndetësi falas mbi gënjeshtrën, siç ndërtoi premtimin për legalizime falas mbi gënjeshtër, siç ndërtoi premtimin për heqjen e TVSH-së së energjisë elektrike mbi gënjeshtrën, siç ndërtoi premtimin për uljen e taksave për 97% të shqiptarëve dhe i rriti për 100 %, siç premtoi për rrogën e 13 dhe u hodhi edhe shpërblimin në fund të vitit. Një moment është i rëndësishëm për çdo njëri të qytetëruar, mendoj të thotë vetë që të paktën të mos gënjejë më tutje. Ky njëri fabrikon vetëm gënjeshtra. A e dëgjove sot se tha rendi është shumë më mirë, në një kohë kur është shtuar kriminaliteti në një përqindje të paimagjinueshme. Një pushtet i sapo ardhur, me kë e krahason veten? E krahason veten me muajt e fundit të një pushteti tetë vjeçar, me muaj elektoral.

Pyetje: Po i referohem deklaratës që bëri sot kryeministri Rama lidhur me treguesit e kriminalitetit. Nëse ka pasur thotë reagime të forta është lufta ndaj krimit dhe Policia ka hyrë në çdo territor të vendit dhe vrasjet janë vrasje mes kriminelësh?

Berisha: Nuk ka deklaratë më skandaloze se kjo. Të shpjegosh kriminalitetin, të ngushëllosh qytetarët për kriminalitetin në rritje se po vjen nga qërimi i hesapeve të krimineleve kjo do të thotë e para: të inkurajosh qërimin e hesapeve dhe tu thuash krimineleve, vazhdoni ju punën tuaj se qeveria s’ka punë me ju. Nuk mund të imagjinohet një deklaratë e tillë. Çfarë janë këto vrasje? Në një vend që ka hequr dënimin me vdekje, asnjë qytetar nuk meriton të vritet. Në një vend ku sundon ligji, me dënim ose pa dënim me vdekje, asnjë qytetar nuk meriton të vritet dhe për kreun ekzekutivit të vendit ky kriminalitet është gjë e zakonshme se po lajnë hesapet kriminelët me njëri -tjetrin.

Pyetje: E sheh në fakt edhe si reagim dhe ndërhyrje të Policisë atje ku ndodh krimi?

Berisha: Në fakt vetëm policia nuk po ndërhyn dhe shkalla e zbulimit të vrasjeve nuk ekziston përveç rasteve kur dorëzohen vetë, se këta nuk i pranojnë as kur dorëzohen, siç ishte rasti i atij të tritolit, atij Gjokonës, që shëtiti një javë nëpër institucionet e Policisë dhe nuk ia pranonin deponimin. Në këtë kontekst ky është qëndrimi dhe deklarata më e papërgjegjshme që mund të bëjë një kryeministër, që të thotë se kriminaliteti është rritur se po lajnë hesapet kriminelet sepse e dinë që policia do të veprojë. Policia duhet të veprojë në çdo orë çdo ditë pa ndërprerje, duhet të parandalojë me çdo kusht vrasjet është një nga detyrat e saj.

Pyetje: Duhet të ketë edhe bashkëpunimin e SHISH. Pse të mos i kërkohet certifikata e sigurisë kreut të SHISH në kushtet kur ai ka edhe dy shtetësi?

Berisha: Sepse kreu i SHISH në momentin që është emëruar në atë pozicion, po të jetë për çertifikatë është ai që jep çertifikatën për çdo njëri. Është ai që administron çdo informacion që ka të bëjë me çështjen e sigurisë, të terrorizmit, që prodhohet brenda dhe jashtë vendit. Kreu i SHISH është përgjegjës për detyrën e tij vetëm para Kryeministrit dhe Presidentit.

Pyetje: Ky kryetar ka dyshtetësi apo jo?

Berisha: Nuk ka asnjë rëndësi. Sot në administratën shtetërore ka me qindra punonjës me dy shtetësi dhe për mua nuk përbën asnjë lloj problemi.

Pyetje: Po flasim për kreun e SHISH që disponon informacione sekrete, jo për një njëri të thjeshtë të administratës?

Berisha: Kreu i SHISH është shtetas shqiptar pasardhës i një familje të shkëlqyer atdhetare. Fati i shqiptarëve ishte emigracioni. Emigroi në një periudhë të caktuar, mori shtetësinë e një endni tjetër dhe nuk e la shtetësinë shqiptare. Ai funksionon si shtetas shqiptar dhe në ligjin e vendit, nuk ekziston ndonjë kriter që punonjësi i SHISH apo kryetari nuk mund të kenë shtetasi te ndonjë vendi tjetër. Ka vende të cilat e kanë në mënyrë eksplicite që duhet të ketë shtetësinë e vendit, ne nuk e kemi por kjo është e vetëkuptueshme por pse ka një shtetësi tjetër kjo nuk është problem.

Pyetej: Si e shikoni rolin e Presidentit në gjithë këtë betejë mes institucioneve?

Berisha: Kjo betejë është një betejë për pushtetin personal të një njeriu që udhëhiqet vetëm nga parimi i urrejtjes, i një bipolari të deklaruar me kartele mjekësore, e botuar kartela në media, jo nga unë nga njeriu që është sot më afër Edi Ramës, e pa përgënjeshtruar kurrë prej tij dhe unë mund të them rastin tjetër se me datën 23 janar në selinë e PS kanë qenë.

Pyetje: Mund ta themi këtë për një kryeministër që e kanë votuar një milion shqiptarë?

Berisha: Kjo nuk do të thotë gjë, pse çmendon se normal ishte Adolf Hitleri? Jo nuk ishte normal. I sëmurë ishte. I ardhur në pushtet me 17.2 milion[ vota nga gjermanët.

Pyetje: Po krahasojmë Hitlerin me Edi Ramën dhe nuk qëndron kjo..

Berisha: Jo jo. Historinë duhet ta shohim siç është ai erdhi me vota. Enver Hoxha i dhunoi zgjedhjet por nuk them se nuk erdhi nga lufta, por Enver Hoxha udhëhoqi e sundoi si një diktator paranojak për çdo njëri që ka njohuritë me elementare në psikiatri dhe që lexon një vepër të tij e kupton që është paranojak, kur thoshte se nuk jam specialist nafte, por mendja ime ma thotë se në këtë trekëndësh ka naftë dhe shkonin inxhinierët shponin nuk nxirrnin naftë dhe dilnin armiq të popullit. Çfarë thotë ky zotëria. Nuk ka ekonomist në Shqipëri përveç meje. Njeriu që absolutisht nuk ka abc-në e ekonomisë, është totalisht jashtë.

Pyetje: Ju e krahasuat Shqipërinë me Gjermaninë?

Berisha: Po e krahasova dhe çfarë thashë. Kurrë ndonjëherë nuk e kam krahasuar Shqipërinë me Gjermaninë në rrafshin ekonomik përveçse në një shifër, rritja ekonomike. Po për atë që njohin e dinë se çdo të thotë rritje ekonomike kuptojnë se përqindja 2%, 3%, 4% i referohet vendit përkatës dhe nëse rritja ekonomike në përqindje e Shqipërisë ishte 3% dhe e Gjermanisë 2% në çdo matematikë të botës si përqindje kjo e jona është 1 % më e madhe, si vlerë është një mijë herë me e vogël. Se çfarë është rritja ekonomike? Është rritja e GDP, e cila vlerësohet me shitjet e përgjithshme në një vit, me transaksionet monetare. Pra nëse ekonomia gjermane rritet 2%, 2% e kujt? P.sh 2% e 2 trilionëve GDP, ekonomia shqiptare rritet 3% e 15 miliardëve. Rritja e GDP si përqindje është standard botëror.

Pyetje: E parë në këtë mënyrë mund të qëndrojë si arsyetim por gjithçka përkthehet në xhepat e qytetareve. E krahasoni ju një qytetar shqiptar me një qytetar gjerman?

Berisha: Nuk mund të krahasohet kurrë, sepse 2% i 2 trilionëve është të paktën 200 herë më i madh sesa 3% i 15 miliardëve, nuk kanë të krahasuar këto. Por a mund të themi se është rritje, rritje është kjo. Rritja e Shqipërisë 3% nuk është duke iu referuar prodhimit të brendshëm të Gjermanisë por është rritje e prodhimit të brendshëm të Shqipërisë. Por ka nga ata që kanë spekuluar me këtë dhe e kanë bërë ata që nuk kanë njohuritë më elementare për GDP. Janë të vërteta dhe ato i dha FMN.

Pyetje: Ishin këto institucione ndërkombëtare që bekuan qeverinë Rama duke i dhënë asaj të drejtë që të adaptojë taksën progresive?

Berisha: Këto institucione ndërkombëtare fillimisht i thanë se ti nuk ke program. Dhe jua thanë shqiptarëve që nuk ke program dhe ia thanë atij që nuk ke program dhe i thanë nëse nuk bën një program deri në dhjetor, te gjithë qëndrimet tona do të shkarkohen publikisht mbi ty. Natyrisht ai program nuk bënte dot.

Pyetje: Po u miratua marrëveshja me FMN?

Berisha: Po ky pranoi kushtet për të ngrirë tre vjet rrogat. Po si mund ti ngrish tre vjet? Kusht që se pranoj dot kurrë. FMN çfarë tha ta provojmë njëherë këtë është në intervistë shefi i misionit, të provohet nise nuk ecën kthemi prapa mbrapa. Me një skepticizëm shumë të madh.

Pyetje: A mund ti japë FMN para një qeverie tek e cila nuk beson?

Berisha: Po i jep, 300 milion dollarë për 3 vjet të ndara në transhe, transhi i parë do të rrisësh këtë, transhi i dytë do të rritësh çmimin e energjisë, transhi i tretë do të rritësh taksën e tokës bujqësore dhe po përgatitet ligji për rritjen e taksë bujqësore, transhi i katërt e me radhë. I ka që të gjitha me kushte.

Pyetje: Këtë gjë nuk e përjashton as qeveria Rama se duhet të kishte kushte dhënia e këtyre parave?

Berisha: Po këto kushte kush i pranonte? I pranon vetëm Rama se unë nuk do i pranoja kurrë. Si mund të pranoja unë të rrisja energjinë qytetarëve të mi. Nuk e pranova unë. Iku CEZ por ajo nuk ndodhi. Nuk ndodhi sepse detyra e qeverisë është të mbrojë qytetarët. Si mund të pranoja unë të ngrija rrogat . E dini çdo të thotë të ngri rrogat tre vjet, do të thotë që në krye të tre vjetëve me inflacion dhe lëvizje të tjetra ti je të paktën 20 deri në 30 % më i varfër se sot. Ke një përkeqësim nga viti në vit të jetesës tënde.

Pyetje: Z.Berisha thatë pak më parë se qeveria Rama bën gabim kur krahason gjashtë muajt e parë të qeverisjes me muajt e fundit të një qeverie tetë vjeçare, ju po krahasoni gjashtë muajt e parë të qeverisë Rama?

Berisha: Jo, unë po krahasoj dhe po them se i ka shkuar ligji për rritjen e energjisë elektrike pasi bëmë ndryshimet në parlament dhe kur ju thamë shqiptarëve se këto ndryshime kanë vetëm një qëllim rritjen e çmimit të energjisë dhe tani po përgatitet të rrisë çmimin dhe t’jua rrisë para së gjithëve njerëzve në nevojë. Është e faktuar se 60% e familjeve shqiptare konsumojnë 220 kv energji elektrike në muaj. Këta e kanë me çmim 77 leke energjinë, të tjetër që shpenzojnë më shumë këta e paguajnë me 120 leke kilovatin. Tani çdo të bëjnë këta, do të gjejnë një mesatare të artë. Ky njeriu që thotë se punon për shtresat e varfra ky do të barazojë çmimin me shtresën e mesme dhe te lartë të shoqërisë. Dhe ky është një akt shumë i papërgjegjshëm. Ky do të rrisë çmimin e tokës bujqësore. Ferma e vogël mund të jetë edhe pa taksë fare dhe ka vende që e kanë pa taksë fare fermën e vogël. Ndërsa këta kë të rrjepin. Pas dështimeve që po pësojnë në tatime dhe në dogana, thonë çdo muaj realizim, absolutisht çdo muaj mashtrim.

Pyetje: Kjo pjesa e ekonomisë kërkon emision më vete me ju?

Berisha: Nuk ka pjesë që i dhëmb më shumë shqiptarëve sesa ekonomia, ky është problemi. Po ndodh shkatërrim masiv i vendeve të punës. Çfarë ju këshilloj miqësisht si media. Bëni një hetim në sipërmarrje. Çfarë do ju thonë sipërmarrjet. Pa përjashtim po heqin nga borderotë 15 deri në 30% të punonjësve sepse ka rënë në mënyrë dramatike numri i vendeve të punës. Po rriten taksat. Po përballen me konsekuencat. Po bërtite nga mëngjesi deri në darkë, po qe se e nxjerr jashtë energjinë negative që ka shpirti, atë natyrisht do reflektosh vetëm negativitet dhe energjinë e njeriut të sëmurë dhe them këtu më vjen keq se unë jam mjek, por e bej këtë për një interes më të madh të popullit, energjia negative e njeriut të sëmurë është e pakufishme. U thotë doganierëve se simboli i hajdutit është doganieri. Mund tu themi shqiptarëve se në të gjitha pollet del se korrupsioni në dogana është nga të ul[tit? Pa pyesni biznesmenët se çfarë ju thonë. Po ky ecën me paragjykimin dhe dje ju thoshte kokëpalarë. Vetëm një njëri që ka shpërthime negative mund të sillet në këtë mënyrë në publik, mund të shfrytëzojë të qenit kryeministër për të ofenduar kolektivisht tamam në stilin e etërve të tij. Se në atë kohë ndodhin por sot është një standard tjetër. Po rrezaton negativitet mbi ekonominë në mënyrën më të paimagjinueshme. Shenjat e recensionit janë në shfaqe e sipër, ka një rënie dramatike të kreditit ekonomik, ka një rënie katastrofale të eksporteve çka do të thotë se ka një rënie të punësimit.

Pyetje: Një situatë të cilën mazhoranca aktuale pretendon se e trashëgon nga ju me financa publike të rrënuara dhe e ka pranuar edhe ambasadori amerikan Aleksandër Arvizu?

Berisha: Bën garë me Ilir Metën tek fasonët. Çfarë bëjnë tek fasonët këta. Në u hoqëm atyre TVSH-në dhe çdo detyrim tjetër, është qeveria ime që ju ka hequr tarifën doganorë atyre, është qeveria ime që ju ka hequr TVSH dhe që ju hoqi tatimin mbi të ardhurat personale për rrogat e e tyre. Nga këto të treja mbajtën vetëm tatimin mbi të ardhurat personale që nuk i kthyen, kthyen TVSH për makineritë, kthyen tarifat, kthyen gjithçka dhe në këtë mënyrë faktikisht bënë që shumë nga këta investitorë të shkojnë drejt Malit të Zi dhe Maqedonisë dhe tani bërtasin në garë si Don Kishoti me Sanço Pançon pas industrisë fasone.

Pyetje: A jeni penduar për deklaratën që bëtë për Stefan Fyle, e quajtët serbofil dhe duket se nuk ju mbështetën në këtë arsyetim shumë prej drejtuesve të PD?

Berisha: Së pari në çdo fjalë që kam shkruar aty është fakt është e vërtetë dhe po të mos ishin të tilla kurrë nuk do ia lejoja vetes të shkruaj madje do të thoja se kam shkruar jo më shumë se gjysmën e atyre që mund të shkruaja, unë e dëgjova intervistën e tij.

Pyetje: Ai reagoi dhe tha se ishin false dhe të pabazuara madje edhe me pak ironi tha se nuk ju ka mik në Facebook por se është mik i shqiptarëve?

Berisha: Do t’ju them një gjë këtu Komisionerit, se kurrë faktet me deklarata nuk rrëzohen. Nuk ka mënyrë më të dështuar. Kurrë. Përsa i përket pyetjes konkrete, Komisioneri dhe jo unë ka kërkuar të falur për deklaratën që bëri në Beograd dhe e ka bërë këtë me dëshmitarë dhe kur ka ardhur në Shqipëri, pasi unë sigurisht në instancat përkatëse e kisha ngritur këtë, i ka deklaruar zonjës Bregu se ai ka qenë një gabim dhe ka kërkuar falje “I Apologise”. Nuk dua të hyj në çështje të tjera. Tre ligjet. Unë kam bërë një shqyrtim shumë gjakftohtë. Nuk jam duke fajësuar atë pse nuk mori Shqipëria statusin. Jo. Ajo ishte një kurth i tij me Ramën. Po të jetë puna për historik, historike është heqja e imuniteti dhe ajo është një reform që një pjesë e vendeve të BE nuk e kanë hequr dhe ajo është një kryereformë. Tre ligjet nuk kishin vakum, kishte ligje më të mira për përmirësim të mëtejshëm. A mund ta fajësoj unë atë? Jo absolutisht. Ishte Edi Rama dhe jo Stefan Fyle që udhëhiqte PS. Unë nuk e bëj këtë. Një njeri i papërgjegjshëm si Edi Rama që me lehtësinë më të madhe shkelmon mbi interesin e qytetarëve. Çfarë po bën tani Rama? Çdo ditë po rrënon standardet ndërkombëtare.

Pyetje: Çfarë po bëni ju? Keni bojkotuar komisionin per reformën territoriale dhe keni paralajmëruar edhe një bojkot të Parlamentit?

Berisha: A ishte Fyle këtu? A është ai që udhëheq nga Komisioni Evropian negociatat me Shqipërinë? A e shqiptoi qoftë edhe një herë të vetme reformën territoriale. Jo. A mendoni ju se në rast se kjo do të ishte një përparësi e tillë, ekipi i Brukselit nuk do ta vinte numër një në axhendë.

Pyetje: Ka patur një deklaratë të Ambasadorit Holandez në Tiranë se edhe bojkotet e pjesshme mund ta pengojnë statusin.

Berisha: Unë po flas për këto një herë në radhë të parë. Reforma territoriale nuk është reforme territorial, është reformë elektorale me të cilën dyshja Rama - Meta po përpiqet me çdo kusht të fitojnë zgjedhjet lokale. Nuk po bojkotojmë Parlamentin. Dyshja Rama - Meta po përpiqet me çdo kush të fitojë zgjedhjet lokale. Ne nuk po bojkotojmë Parlamentin. Ka dhe një praktikë, ka 23 vjet, reformat elektorale janë bërë vetëm bashkërisht dhe kanë një kuadër të stimuluar shumë qartë. Lexoni vendimin e Parlamentit çfarë. vendimet merren me 50 +1.

Pyetje: Ju kanë dhënë të drejtën e vetos në komision, keni të drejtë anëtarësh…

Berisha: Ajo është qesharake. e drejta e vetos në komision s’ka vlerë, vlerë ka zotimi solemn se nuk do të përdoren votat e mazhorancës për të miratuar.

Pyetje: Po ç’është ky gjykim, pa marrë pjesë në komision..

Berisha: Në të gjitha reformat e mëparshme ky ka qenë kushti themelor. Ua u kemi dhënë sa herë, në çdo reformë të tillë, cila forcë politike ka lejuar dhe ka pranuar sistemin zgjedhor që ka kërkuar opozita dhe e ka bërë, e kemi bërë ne, dhe nuk pendohem kurrë pse e bëra. Pra, problemi është këtu. Edi Rama po rrënon një nga standardet, shtetin ligjor, Kushtetutën, një Kryeministër që elaboron teorinë e dezinfektimit. A e dini ju që ministrat nëpër ministri thonë të dezinfektohen ministritë? Dhe këtë e kanë absolutisht nga mendja e Edi Ramës, dezinfektimi është një term i përdorur në regjimet më gjakësore më mizore të historisë. po spastrojnë administratën ndërkohë që porosia më kryesore që i dhanë në Bruksel ishte administrata, po e injorojnë totalisht. Sjellin militantë të rekrutuar nga siti i Partisë Socialiste, i zëvendësojnë me njerëz që kanë vite që kanë marrë shkolla, diploma, gradime, dhe çfarë ndodh një shkresë nuk formulojnë sot. shko kërko një gjë, nuk formulojnë dot një shkresë. dhe shkojnë e merren gjithë ditën me luftë klasash.

Pyetje: Ka një çështje të ngritur edhe nga televizioni ynë Agon Channel, a mundet që në një vend demokratik të kërkohet shkarkimi i Kryetares së Autoritetit të Medias Audiovizive pasi ajo të jetë kërcënuar madje edhe me vdekje edhe nga drejtori i një prej grupeve më të rëndësishme mediatike…

Berisha: Mafia mediatike është një nga mafiet më të rrezikshme të kombit shqiptar. ka disa lloje mafia, por në të gjithë këtë përpjekje të madhe është Digitalb, epiqendër e kësaj që ndodh është Digitalb. Keni parë ju një shkresë që Didi i Policisë u dërgon të gjitha institucioneve, gjashtë institucioneve, ku u kërkon atyre të bashkëpunojnë për të mbështetur Digitalbin. Vetëm mafia vepron në këtë mënyrë. Absolutisht unë kam vlerësimin për rolin që ka luajtur por absolutisht nuk mund të pranoj kurrë qoftë edhe për një moment që ai të diktojë politikën e komunikimeve mediatike elektronike të kombit shqiptar. çfarë po ndodh, është përgatitur set up-i që në interesat e Digitalbit të mos jepen tre licenca publike, por të jepen dy dhe tjetra t’i kalojë Digitalbit. U kërkohet me çdo kusht. Para tre vitesh kryepirati i Shqipërisë ka qenë Digitalbi dhe mua më vinin kompani amerikane, kompani të ndryshme me ankesa, janë letrat që dërgonin…

Pyetje: Pse nuk kërkuat masë….

Berisha: Jo unë u përpoqa ç’është e vërteta dhe pastaj se si i zgjidhën akuzat që kishin, problemet që kishin me filmat që u grabisnin, i zgjidhën në një mënyrë soft, apo me të paguar, këto nuk i di unë. E rëndësishme është që ankesa nuk pata më. E rëndësishme është që Digitalbi të operojë si një ndërmarrje, sipërmarrje që respekton rregullat e tregut dhe jo me rregulla mafioze, me kërcënime, jo me futjen në xhep të Drejtorit të Përgjithshëm të Policisë që është larguar nga detyra nga Fatos Nano, është shkarkuar nga Fatos Nano, sepse i është dhënë informacioni që ka marrë 4 milionë dhrahmi nga trafikantët. Të dalë tani dhe të thotë sa milionë ka marrë nga Digitalbi që bën shkresa institucioneve dhe u thotë…

Pyetje: A duhet të japë kjo kompani për këtë shkak llogari? Sepse është e vërtetuar që ka evazion të rëndë fiskal? në shkelje me të drejtën e autorit, me të drejtat televizive…

Berisha: Ato janë probleme të gjitha të zbatimit të ligjit, ajo që është e papranueshme për mua është që kjo të fusë në xhep institucionet shtetërore, Ministrin e Brendshëm, mos mendo ti që Didi e ka bërë me kokën e tij. Jo kategorikisht. Ajo është bërë vetëm me urdhër të Edi Ramës dhe s’mund të jetë ndryshe, që një Drejtor i Përgjithshëm policie tu dërgojë institucioneve shkresën që të bashkëpunojnë për të mbrojtur Digitalbin. Kjo është fundi i këtij institucioni, i kryeministrit dhe i ministrit të tij. Pra, tani interesi publik përfundon në xhepat e tyre. Duan të heqin licencat që janë të përcaktuara tre licenca në transmetim digital publik, në mënyrë që qytetarët të mos e kenë të ndaluar dhe të mos taksohen për të parë në Digital. Tani duan tua heqin, ka bërë planin mafia.

Pyetje: Nuk i përgjigjet pyetjeve të TV që janë edhe garanci për më shumë transparencë për publikun. Ne i kemi dërguar zyrtarisht lidhur me këtë çështje pyetje ministrit të Financave, deri më tash nuk kemi asnjë përgjigje.

Berisha: Një ministër, guxoi të përgjigjet, jo ju, por Parlamentit dhe atij gati sa nuk i kushtoi posti. Parlamenti i kërkoi ministrit të Drejtësisë sa punonjës keni shkarkuar nga sistemi. U përgjigj 783 punonjës. Dhe kjo një javë resht, një javë resht, është marrë Edi Rama me presione nga më të ulëtat dhe ndaj ministrit që të mos guxonte …., atëherë ç’prisni ju të dhëna kur nuk i jepen Parlamentit. Kur del dhe deklaron në mënyrën më të papërgjegjshme se vetëm 338 vetë janë pushuar nga puna në një kohë kur ministri i Drejtësisë informon se vetëm nga Ministria e Drejtësisë janë 783. Në një kohë kur vetëm nga tatimet, organi tatimor, në një ditë janë pushuar 400 e ca. Pra, ky zbaton kodin e heshtjes, që është një kod mafioz në këtë rast, sepse nuk ka asgjë më të papranueshme se bllokimi total i informacionit dhe Parlamentit i është përgjigjur vetëm zoti Naço. Asnjë ministër tjetër nuk guxoi.

Pyetje: Çfarë do të kishit bërë ju si kryetar i qeverisë kundrejt një ministri, kur një gazetare në detyrë shkon i kërkon një intervistë dhe ai e shtyn?

Berisha: Përsa i përket intervistës ky është një problem tjetër. Jep s’jep intervistë…

Pyetje: Akti i shtyrjes së një gazetari në detyrë, a mund ta dhunojë kështu një ministër?

Berisha: Akti i bllokimit të informacionit është i papranueshëm. Është shkelje e radhëve të Kushtetutës, e drejta për informacion është e garantuar në Kushtetutë, është e garantuar në aktin e informacionit. Kjo është e papranueshme. A jep apo nuk jep intervista, kjo pastaj është diçka tjetër.

Pyetje: Dakord, po a mund të shtyhet gazetari?

Berisha: Mund të shtyhet. Standardi Nano ishte shkarkimi. Mua nuk më ka ndodhur sepse ministrat e kishin shumë të qartë, por ka ndodhur një herë në qeverinë Nano dhe e shkarkoi ministri. Ose i imponoi dorëheqjen. Ajo s’mund të ndodhë, një ministër nuk mund të shtyjë kurrë një gazetar. Asnjë gazetar. Ai ka zyrën e shtypit, mund të komunikojë, mund të përcaktojë rregullat, mund të mos japë intervistë, por gjë tjetër nuk mund të bëjë.

Pyetje: Zoti Berisha edhe një pyetje të fundit, gjatë këtyre ditëve televizioni ynë ka pasqyruar me shqetësim, shqetësimin e qytetarëve në fakt, të cilët nuk mund ta shohin dot Televizionin Publik Shqiptar edhe pse paguajnë taksën për Televizionin Publik Shqiptar. A kanë të drejtë ata të shohin Televizionin Publik Shqiptar pa qenë nevoja të marrin një dekoder Digitalb në këtë rast?

Berisha: Kjo është absolutisht në kundërshtim flagrant me ligjin e vendit dhe me direktivën europiane, e cila detyron shtetet, që transmetimin dixhital qytetarët ta kenë në mjetet publike falas. Është përcaktim i qartë po Edi Rama nuk pyet për direktivat europiane, e ka mendjen te pushteti personal. Paguhet nga Dixhitalbi me ndonjë pagë shtesë apo nga të tjerë dhe vepron në këtë mënyrë. Është absurde t’i imponosh qytetarëve dekoderin e Digitalb.

No comments: