“Vlera e dialogut, në parim u mbivendoset pengesave që e vështirësojnë atë, qëndron mbi to”. Kreu i PD-së tha dje se mes dy kampeve nuk ka komunikim
për takimin e mundshëm me Kryeministrin, por kërkesa e tij për konsensus të reformës territoriale në Kuvend, pret përgjigje. “Nuk mund të ndërmerret një reformë e tillë pa konsensus politik. Ka një paragjykim dhe ajo që unë kam kërkuar në letrën e dytë dhe që pret përgjigje është që, a është zoti Rama për konsensus apo nuk është për konsensus?”
Ka negociata për këtë takim apo jo?
Kemi shkëmbyer letrat që sapo lexuat dhe besoj se të dyja letrat janë të qarta. Por nuk ka në këtë moment asnjë negociatë mes palëve. Ka një negociatë deri tani të pasuksesshme për rezolutën e pamiratuar të Komunitetit të Stabilizim-Asociimit në Strasburg.
A ka bisedime mes stafit tuaj dhe stafit të zotit Rama?
Jo, nuk ka. Nuk ka asnjë komunikim zyrtar midis PD-së dhe PS-së, midis meje dhe zotit Rama, përveç kësaj që sapo lexuat.
Por jo zyrtar?
Po imagjinoj që qytetarë jemi dhe në një qytet jemi dhe siç flasim këtu, kjo çështje flitet edhe në ambiente të tjera. Por në kuptimin e diçkaje që orientohet, nuk ka patur asnjë zhvillim tjetër, përveç zhvillimit të fundit, që ishte letra e dërguar nga unë dhe fjala e mbajtur nga unë sot në grupin parlamentar.
A ndjeni një presion ju vetë nga ana radikale e PD-së dhe, a do shkonit në takim pa kushte veç vetos për reformën territoriale në seancë?
Për mua, dialogu është normalitet dhe normaliteti është dialog. Ky është botëkuptimi im, kjo është përpjekja ime dhe në këtë qëndrim në PD nuk më ka ndikuar asnjë luhatje apo tension mes një pale që e do dialogun dhe një pale që s’e do dialogun. PD në 23 vite ka qenë një parti që i ka qëndruar dialogut. Unë si kryetar i PD-së, që në ditën e parë në krye të PD-së i kam bërë të qarta raportet e mia me qeverinë. Në një demokraci normale që ne e dëshirojmë dhe për të cilën luftojmë, detyrat natyrisht janë të ndara. Kemi thënë dhe vazhdojmë t’i mbetemi kësaj, që detyra e opozitës është e qartë, një opozitë e fortë, propozuese dhe alternative, një analizë e bazuar në fakte, argumente dhe arsye. Ne jemi një opozitë ekzistenciale për çështje që nuk kanë të bëjnë vetëm me qeverinë dhe opozitën, çështje të Kushtetutës, të ligjit, të institucioneve dhe të vendimeve të gjykatës, pra me dy fjalë: çështje të demokracisë dhe të shtetit ligjor. Megjithatë, në letrën time unë kam qenë shumë i qartë dhe nuk ka asnjë hezitim sa i përket dialogut si vlerë. Dialogu pa takim…
Unë jam i gatshëm të takohem jo vetëm në nivelet që thatë ju. Reforma territoriale, nuk është se kemi vënë ne kushte për të. Jo, s’kemi vënë asnjë kusht. Praktika e demokracisë në 23 vite e përcakton që minimumi është konsensusi politik dhe maksimalja, konsensusi dhe gjithëpërfshirja e qytetarëve shqiptarë. Zakonisht konsensusi politik ngërthen një konsensus të gjerë shoqëror. Pra nuk jam unë, nuk është një tekë e imja. Është një standard. Nuk mund të ndërmerret një reformë e tillë pa konsensus politik. Ka një paragjykim dhe ajo që unë kam kërkuar në letrën e dytë dhe që pret përgjigje është që, a është zoti Rama për konsensus, apo nuk është për konsensus?
Në qoftë se ato që keni parashtruar në letër për konsensusin në parlament dhe jo vetëm në komision, a ka një pengesë tjetër që e pengon takimin?
Kjo reformë ka nevojë për konsensus. Nuk mund t’i iket konsensusit për këtë reformë, së cilës i është vënë një emër, për hir të së vërtetës, jo përfaqësues. Është reforma e decentralizimit me një element të fortë të reformës elektorale. Dhe një nga produktet e kësaj reforme është dhe rindarja administrative e Shqipërisë. Por nuk është thjesht reforma territoriale administrative.
Nëse kundërshtarët tanë kanë ardhur te ky përfundim, atëherë kjo është një çështje e zgjidhur. Nëse konsensusi është i vërtetë dhe jo fasada dhe pranohet, kjo është një çështje e zgjidhur.
Pra, do ketë takim?
Dialogu për mua është kulturë, është mendësi. Nuk është një ngjarje e jashtëzakonshme, nga e cila patjetër duhet të ruajmë një fotografi. Nuk paragjykoj asnjë takim me kryetarin e qeverisë dhe asnjë takim të çdo niveli tjetër, as për këtë dhe as për çështje të tjera që kanë të bëjnë me prioritetet e shqiptarëve, me integrimin e vendit në BE. Substanca është: kjo reformë, a bëhet dot pa konsensus? A është kjo një tekë e opozitës, apo një qëndrim racional? Nëse është kështu, çështja është në rrugë të mbarë, drejt zgjidhjes. Në këtë kuptim, nuk kam patur dhe nuk kam asnjë pengesë, asnjë rezervim për të kryer takime të çdolloj niveli për hir të përmbushjes së një interesi publik. Nëse e shikon këtë në një suazë më të gjerë, ftesa e zotit Rama për takim sigurisht ka ardhur për reformën dhe e ka marrë përgjigjen, por ka ardhur në një kontekst ku siç ju thashë, ato çështje për të cilat ne nuk duhet të debatonim, por i respekton si qeveria dhe opozita që janë Kushtetuta, ligji, vendimet e gjykatave dhe institucionet e pavarura, janë kthyer më fuqishëm se kurrë më parë në tavolinën e problemeve të Shqipërisë.
Çfarë teatri shikoni ju?
Nuk kemi ndonjë frikë ne. Edhe ajo mundësia reale që ekziston që mazhoranca ta keqpërdorë një fotografi, nuk i hedh dot hi askujt. As qytetarëve dhe as komunitetit ndërkombëtar. Nuk bëhet fjalë për nuanca, por bëhet fjalë për probleme të thella që janë akumuluar në këto 6 muaj. Ne mund të pretendojmë se jemi ulur në një tavolinë me njëri-tjetrin dhe po biem dakord për reformën territorialo-administrative, por kjo nuk heq fare nga vëmendja e publikut dhe institucioneve ndërkombëtare deficitin e madh që është krijuar në këto 6 muaj në vend si pasojë e qeverisjes, kryeministrit dhe kryetarit të Kuvendit. Kjo nuk do të thotë që ne t’i ikim dialogut. Jo, ne jemi të vendosur për dialog, për dialogun si vlerë dhe si instrument. Por fakti është se këto çështje për të cilat sot shqetësimet janë ngritur, janë probleme shumë të thella. Nuk mund të dialogojmë ne të respektojmë apo jo Kushtetutën, nuk mund të diskutojmë ne nëse do respektojmë apo jo vendimet e gjykatave. Nuk mund të dialogojmë ne pavarësinë e institucioneve të pavarura. Këtu nuk ka vend për dialog. Këto janë çështje që respektohen pa mëdyshje.
Lidhur me reformën administrative, kushtëzohet vetëm nga vetoja apo konsensusi në seancë? Pra, nëse nesër mazhoranca thotë e keni që nesër, apo doni një paketë konsensuale?
I kërkuam kryeministrit kur shpalli çështjen e reformës territoriale si opozitë të rivendosë instrumentin e konsensusit. A nuk ishit ju, që së bashku me ne bëmë konsensusin e 30 majit, a nuk ishit po ju që e shkelët atë konsensus në 30 shtator? Rivendos konsensusin. Përndryshe, çfarë kuptimi ka? Ne bëjmë konsensus bashkë, ti e shkel. E ke bërë një herë, turp për ty, por ta bësh për herë të dytë, është turp për mua. Pra i vumë një kërkesë shumë legjitime, rivendos konsensusin. Ka patur një zhvillim që atëherë ka dalë një vendim i Gjykatës Kushtetuese, që i dha të drejtë qëndrimit të opozitës dhe këtu mazhoranca e ka fare të thjeshtë të zbatojë vendimin e Gjykatës Kushtetuese.
Doni vetëm një gjë apo kërkoni një paketë, kjo ishte pyetja?
Për reformën territoriale jemi shprehur fare qartë. Ne nuk kemi vendosur asnjë kusht. Nuk kemi kërkuar asnjë benefit. Ne kemi kërkuar që standardi i vendosur në këto 23 vjet të mos ndryshojë, pra të rivendoset konsensusi në parlament, i cili finalizohet në Kuvend.
Nëse ua japin këtë konsensus në parlament, kushtëzohet edhe nga plotësimi i këtyre pikave të tjera. Apo shkohet drejt votimit të kësaj dhe pikat e tjera diskutohen?
Në parlamentin shqiptar në këtë moment ka dy çështje të ndryshme: njëra është e madhe dhe shumë e rëndësishme, prioritet kombëtar, integrimi i vendit që përbëhet nga 5 prioritete, administrata, çështje të drejtësisë dhe të shtetit ligjor, lufta kundër korrupsionit, krimi, të drejtat e njeriut, me të cilat politika nuk po merret. Mazhoranca ka sjellë në rendin e ditës një çështje tjetër aspak të parëndësishme, reforma territoriale, ndonëse nuk ka të bëjë me asnjë nga këto 5 prioritete. Qëndrimi ynë me reformën territoriale është i qartë, por qëndrimi ynë për reformën territoriale në çfarë do që të evoluojë nga këto dhe shpresojmë që të evoluojë ashtu siç duhet dhe siç është tradita parlamentare, nuk mundet për asnjë moment që të tërheqë vëmendjen nga këto 5 fusha që sapo përmenda.
Qëndrimi, cili do jetë? Nëse ju thotë, për reformën territoriale keni konsensus edhe në Parlament, do e kushtëzoni dhe me këto të tjerat, apo do e votoni?
Prej 4 javësh opozita ndodhet në një marrëdhënie të kushtëzuar me parlamentin. Që rrjedh nga shkelja e hapur e Kushtetutës kur u uzurpuan kompetencat e Presidentit për të krijuar atë situatë…
Pra nuk e votoni po nuk ju dhanë dhe këto?
Jo, jo nuk është ashtu. Kemi 4 javë që ne i kërkojmë parlamentit të rikthejë ligjshmërinë, të rikthejë kushtetutshmërinë. Të prapësojë marrjen e kompetencave të Presidentit. Në qoftë se kjo mazhorancë mendon se mund të ngrejë varenë dhe t’i bjerë Kushtetutës, t’u bjerë institucioneve të pavarura, mund të deklarojë vendimet e gjykatave të pavlefshme dhe këtej thotë, hajde e bëjmë reformën territoriale…
Shumë e qartë, ju nuk votoni asgjë…
Jo. Nuk është ashtu. …e ke gabim. Është shumë e thjeshtë për ne sa i përket reformës territoriale administrative. Konsensusi është normal. Dhe kaq është për reformën territoriale.
Nëse Rama thotë të votohet, kalohet?
Nëse mazhoranca vjen tek ky pozicion, mirë se të vijë. Kjo çështje e mbyll dilemën për reformën territorialo-administrative. Dhe pastaj duhet të nisë puna, të nisim me përgatitjen e kritereve, hartimin e reformës, të konsultimit të gjerë me publikun dhe pastaj të çuarjes në parlament. Nuk do shkojmë nesër me reformën në parlament. Kjo kohë do të jetë më se e bollshme për mazhorancën të reflektojë për problematikën tjetër. Të zbatojë vendimet e gjykatave. Dhe tërheqja nga revanshi antikushtetues.
Do e jepni votën për reformën nëse mazhoranca ju jep konsensusin në seancë, apo e lidhni me këto çështjet e tjera?
Rikthimi i konsensusit është e vetmja gjë për të cilën kemi insistuar. Nuk po vendosim ne kushte për hir të kushteve. Është një standard që nuk mund t’i iket.
Pra, e lidhni votën për reformën me çështjet e tjera?
Jo, për diçka që themi ne që duhet ta bëjë kështu mazhoranca e s’dua ta bëjë ashtu. Ka një gjykatë që ka marrë vendimet e saj. Ka marrë vendimin për Nëpunësin civil, ka marrë vendimin për INUK-un…
Nëse qeveria thotë se reforma territoriale bëhet me konsensus edhe në seancë, ju dërgoni deputetët në komision dhe ata fillojnë punën?
Reforma e ashtuquajtur territorialo-administrative ka një dhe vetëm një kriter, konsensusin. Për t’u ulur në tryezë dhe për të ecur përpara. Puna do kërkojë kohën e saj. Por, nëse në momentin që ne mbarojmë së diskutuari reformën, mazhoranca ka vendosur të anulojë institucionin e Presidentit dhe të shkrijë SHISH-in me komisariatin e Shijakut, duhet të shkojmë ne në parlament që të votojmë reformën. Jemi në një situatë anormaliteti sa i përket kolonave të demokracisë. Nëse kjo situatë persiston, a duhet të ulemi ne dhe të miratojmë me konsensus të plotë reformën? Opozita ka kushtin që gjërat të funksionojnë normalisht.
Nëse opozita ka konsensus edhe në seancë për reformën, ju dërgoni deputetët në komision dhe ata fillojnë punën me kolegët e tyre të majtë…
Menjëherë sapo konsensusi politik për të votuar reformën territoriale në Kuvend të marrë një përgjigje pozitive, ne jemi gati të marrim dhe të ekzekutojmë përgjegjësitë tona për këtë reformë. Por të pretendojmë se ky është realiteti në Shqipëri dhe s’ka probleme të tjera, kjo
është e gabuar. Ka një akumulim problemesh, të cilat mund të rrezikojnë thjesht reformën territoriale, por rrezikojnë stabilitetin dhe po rrezikojnë stabilitetin ekonomik dhe shoqëror.
Pra, nëse premton konsensus, ju do futeni në lojën e përgatitjes?
Vendimi i Gjykatës Kushtetuese për Nëpunësin Civil duhet respektuar. Çdo hap prapa nga kjo mazhorancë në raport me konsensusin e 30 majit, natyrisht do të reflektohet në marrëdhëniet mazhorancë-opozitë, duke përfshirë dhe reformën territorialo-administrative.
Si u votuat aq pak nëse keni bërë kaq mirë?
Konsumimi 8-vjeçar s’ka të bëjë me standardet që arritëm ne; mbetëm jashtë krizës ekonomike për 6 vite. Rritja ekonomike ra dy vitet dhe këtë shqiptarët e ndjenë, keqmenaxhimi i pushtetit dhe zmadhimi i hendekut mes qytetarit dhe administratës. Këto janë disa nga shkaqet që unë i kam thënë, por analiza do të bëhet e plotë dhe s’do të mbetet gjë pa thënë. Ne nuk ikëm si një qeveri e turpëruar, ne ikëm pas 8 vitesh pas një transformimi, por u akumuluan problemet dhe do të marrin përgjegjësinë tonë. Këta erdhën në pushtet me supermashtrimet. Janë faktet që sot qytetarët i ke të zhgënjyer.
Të flasim pak për dyshen Rama-Meta…Po e nis me një ngjarje festive, Meta ka pasur ditëlindjen, ka ftuar gjithë të majtën dhe pesë deputetë të djathtë. Keni pasur ftesë?
Jo, nuk kam pasur ftesë. Kam pasur një angazhim të vendosur prej një muaji atë ditë.
Do shkonit po të kishit ftesë?
Ai ka pasur ditëlindjen, i uroj ditëlindjen. Ky është urimi.
A do t’i shihni me dyshim atë deputetë të PD që kanë shkuar në festë?
S’kisha si të shikoja listën e të ftuarve. Disa persona që ishin në atë festë e kanë përjetuar, për nga përmasat dhe çfarë ndodhi si provokim ndaj situatës aktuale ekonomike.
Nga ju, dyshja Rama-Meta është cilësuar se po zhbën të gjitha institucionet…Meta në qeverisjen me ju ishte një engjëll, apo çfarë? Dhe në këtë pikëpamje, keni një vrarje ndërgjegjeje se LSI është sjellë njësoj dhe atëherë?
Vendimi për koalicionin me LSI-në u bë në kushtet kur ne nuk kishim votat për të qenë mazhorancë. Katër vitet me LSI-në si partner, PD-ja arriti objektiva identitare, integrimi, lëvizja e lirë dhe mbetëm jashtë krizës ekonomike. Synimi për të prodhuar vlerë të shtuar, funksionoi. A ishte marrëdhënie perfekte? Absolutisht jo.
Sot LSI është pjesë e shqiponjës së zezë që po shkatërron shtetin? Kur qeveriste me ju, ishte kështu? Se ju vratë njerëz në rrugë për LSI-në…
Njerëzit i vratë ju. Kjo që thoni është e shëmtuar. Ajo ishte ngjarje e provokuar nga Edi Rama për të marrë pushtetin dhe në këtë përpjekje katër qytetarë u vranë. Ne ia dolëm për vizat, për ekonominë dhe nuk ndërpremë asnjë mandat kushtetues.
Vota e 23 qershorit nuk ndëshkoi LSI-në, e katërfishoi. Si mendoni ta organizoni rikthimin në pushtet, si maksimalizim i një platforme politike? Pra, si mundet që PD-ja të rikthehet në pushtet? E përjashtoni një aleancë të nesërme me zotin Meta?
PD është në ringritje për të përmbushur misionin e saj. Do t’u drejtohemi qytetarëve me një platformë për të gjitha ato që kjo mazhorancë po i cenon. PS-LSI është mazhoranca, ne jemi opozita dhe me këtë do të shkojmë deri në fund.
A mendoni të ftoni aleatë të tjerë?
Në kuadër të hapjes, dera është e hapur për këdo që e sheh veten në opozitë me këtë mazhorancë.
A do pranoni peshën e individëve që janë njohur si luftëtarë të Berishës?
Nëse Sali Berisha e ka bërë këtë vetë, pse mos ta bëjë dhe Lulzim Basha.
Edhe ata që kanë sulmuar familjen e zotit Berisha?
Unë s’merrem me sulme dhe individë.
Deputetët që kanë motra ‘kurva dhe lavire bulevardi’, e kam dëgjuar nga Sali Berisha…
S’është ashtu dhe mos përdor këtë gjuhë në praninë time në këtë studio, për hir të etikës…
Kush i merr vendimet për daljet e PD-së nga Parlamenti, ia dërgoni ju nga selia e PD-së, apo vjen spontanisht?
Ka një qëndrim të kushtëzuar të PD-së pas 20 shkurtit ndaj Kuvendit.
Marrë nga emisioni “Fakt” në UTV
No comments:
Post a Comment