Friday, November 1, 2013

Zbardhet debati me dyer të mbyllura në PS, Rama “sherr” me Tom Doshin

Shkruar nga Rexhep Polisi
Zbardhen debatet me dyer të mbyllura të zhvilluara në mbledhjen e Grupit Parlamentar të PS.
Socialistët realizuan dje, disa minuta para se të votohej kandidatura e Bashkim Dedjes për kryetar të Gjykatës Kushtetuese, mbledhjen për të vendosur rreth qëndrimit që do të mbanin për dekretin e Presidentit Nishani.
Burime nga Grupi i PS-së zbardhën për gazetën “Panorama” debatin e zhvilluar në sallën e seancës plenare. Gjatë kësaj mbledhjeje, që zgjati rreth 30 minuta, kryetari i Komisionit të Ekonomisë, Erjon Braçe, ka deklaruar votën kundër Bashkim Dedjes, duke thënë se ky i fundit është i përfshirë në koncesionin e ngjyrosjes së karburanteve. Por debati ka vijuar më tej mes Kryeministrit Rama dhe deputetit të Shkodrës, Tom Doshi, për emërimet që janë bërë në Tatime dhe Dogana, për koncesionet dhe për emërimet në Polici.
Doshi ka kërkuar nga qeveria që të mbajë premtimet dhe të zhbëjë monopolin e ngjyrosjes së karburanteve, pullave fiskale, Lotarinë Kombëtare dhe HEC-et. Ai akuzoi ministrat se po mbrojnë biznesmenë të caktuar, që sipas tij, po gëzojnë të njëjtat koncesione si kur ishte PD-ja në pushtet. Por Rama ka debatuar me deputetin e Shkodrës duke thënë se çdo gjë do të bëhet duke ndjekur një strategji të caktuar dhe se po të prishen kontratat në mënyrë të njëanshme, atëherë qeveria rrezikon të humbasë miliona në Gjykatën e Arbitrazhit. Po ashtu Rama ka kërkuar nga deputetët mbështetje për ministrat dhe ka shpjeguar pse PD duhet të votojë pro kandidaturës së Dedjes.
Debati në mbledhjen e Grupit të PS
Gramoz Ruçi: Çështja e kryetarit të Gjykatës Kushtetuese duhej shqyrtuar në mbledhjen e Grupit. Votimi sipas Rregullores është nominal për t’i dhënë mbështetjen, ndaj dhe kjo ishte arsyeja e kësaj mbledhjeje. Dakord?
Ben Blushi: Si do votojmë? Pro apo kundër?
Bashkim Fino: Do të japim argumente?
Erjon Braçe: Për çështjen e ngjyrosjes së karburanteve, që ne si Grup Parlamentar kemi kontestuar, unë kam 4-5 muaj që merrem me këtë çështje dhe më rezultojnë dy gjëra. Në gjykatë janë ndarë para dhe ky zotëria me këtë çështje ka gënjyer dhe ka investuar karrierën nëpërmjet kësaj çështjeje. Çështja për të cilën flasim është një çështje me karakter tërësisht publik. Për çdo tre lekë për litër karburant që ngarkohet për një shërbim ngjyrosje, ose 7 lekë, ky koncesion për një litër karburant që ngarkohet, pa kthyer në asnjë shërbim pas për qytetarët e Shqipërisë, ka ndikim të drejtpërdrejtë te qytetarët për interesin e qytetarëve. Mua më mjafton ky rast që të vërtetoj që ky gjykatës është apo jo në shërbim të interesit të qytetarëve. Në këtë rast ky gjyqtar që ka ndikuar dhe në vendimmarrje në Gjykatën e Kushtetuese, këtë herë për këtë çështje vendimi i marrë apo që është shpallur ka qenë drejtpërdrejt në interes të një kompanie, e cila mbetet okulte dhe sot e kësaj dite dhe që përfiton nga ky koncesion të paktën 20 milionë dollarë në një vit. Kjo kompani, për shkak se ngjyros dhe karburantin që prodhohet në vend dhe nga kompani të tjera, përfitimi i kësaj kompanie është 300 milionë dollarë në vit. Unë nuk jam i gatshëm ta votoj këtë gjyqtar. Dhe për këtë arsye, dhe e përsëris, dhe për arsye të ndarjes së parave brenda asaj gjykate. Dhe për arsye se ky zotëria, për karrierën e tij në Gjykatën Kushtetuese vazhdon t’ia dijë për nder Zenit. Në qoftë se ia di për nder karrierën e tij Zenit, të shkojë të marrë votat e Zenit.
Tom Doshi: Ne duhet me ia tregu shqiptarëve kush është dhe se do të anulojmë të gjitha koncesionet. Ne e dimë mirë kush i ka marrë koncesionet. I ka marrë Zamir Mane. Qeveria po e mbron Zamir Manen, nuk po i bie. Të gjitha këto koncesione, që nga lojërat e fatit, ngjyrosja e karburantit dhe te Lotaria Kombëtare, të gjitha, ai po i merr dhe po i gëzon sikur është në kohën e vet. Prandaj po ju them që ministrat tanë e mbështetin, deputetët tanë e mbështetin, Kryeministri e mbështet, dhe unë votën time e kam kundër.
Edi Rama: Më fal, fole ti? Herë tjetër më mirë t’i mendosh këto gjëra. Mendoj unë. Ajo që do t’i thosha Erjonit është që, pavarësisht vendimit të Gjykatës, ne jemi zotuar, qoftë për ngjyrosjen e karburanteve apo qoftë dhe për pullat fiskale, ne do ta liberalizojmë tregun. Ne kemi thënë në fushatë çfarë do bëjmë, dhe do t’i bëjmë. Por këto nuk po bëhen për një arsye, kemi rrëzuar një pjesë të konsiderueshme të marrëveshjeve dhe të koncesioneve që janë bërë, dhe po merremi me studimin, por, nga ana tjetër, nuk mund t’i pasurojmë sepse janë shuma marramendëse që mund të ikin nga Arbitrazhi. Nuk janë të lehta për t’u rrëzuar dhe po punohet intensivisht dhe krejtësisht kundërt asaj që spekulohet dhe në mënyrë tendencioze ministrat absolutisht nuk janë të angazhuar të merren me çështjen e Lotarisë Kombëtare apo për çështjen e të drejtave të dhëna në mënyrë arbitrarisht si të drejta ekskluzive, por për të rivendosur normalitetin. Kjo është e sigurt dhe më vjen keq që ka informacion dhe ka më shumë lartësi pala tjetër. Ata e dinë mirë, prandaj bërtasin. Lidhur me votimin, ne këtu nuk po zgjedhim një gjykatës, por thjesht dhe vetëm ne po hyjmë në votim në lidhje me një zgjedhje brenda kuorumit të Gjykatës Kushtetuese. Dhe ndërkohë jeni në prag të votimeve të tjera për Gjykatën e Lartë. Se dakord po e marrim që do votojmë kundër. Ç’do të vijë? Do vijë një tjetër dhe do të krijojmë një konflikt të panevojshëm. Në mënyrë që të jemi krejtësisht të lirë, që pastaj kur të vijë puna për të vendosur për gjykatësit, të mos pranojmë asnjë kandidaturë që nuk i përmbush kërkesat. Për më tepër, mos harroni, jemi në një terren shumë të vështirë sepse jemi nën një presion që vjen duke u rritur nga BE-ja, për ndryshimet, për vendimet që merren. Kështu që me këtë votim ne japim një shembull duke i thënë që s’kemi problem të votojmë edhe kandidatura që nuk vijnë nga kampi i përgjegjshmërisë sonë. Kjo është arsyeja. Shqetësimi i ngritur nga Erjoni është shumë serioz, është real. Është e vërtetë që ka një situatë skandaloze me atë koncesion dhe ne kemi vendosur edhe strategjinë me të cilën do të merremi me të. Mos harroni dhe kini parasysh që çdo dosje, sidomos këto të hidrocentraleve, janë të blinduara paraprakisht. Aq më tepër që pas zgjedhjeve ne folëm aq shumë, sa që të gjithë kanë rendur që t’i rikopsitin dhe të bëjnë çdo gjë. Ne nuk do të tërhiqemi, por mund ta bëjmë këtë gjë me minimumin e kostos, që do të thotë se sa më shumë kujdes të kemi, aq më pak para do të paguajmë. S’ka kuptim që të godasim që sot koncesionet sepse më pas shteti do të paguajë miliona për dëmet. Këtë ne nuk dëshirojmë ta bëjmë sot me entuziazëm të madh dhe pas një viti të gjendemi rrugëve të gjykatave.
Tom Doshi: Drejtoritë e Doganave dhe Tatimeve janë mbushur me njerëz të PD-së. Ka
edhe në Polici. Ata kanë më shumë informacion se ne.
Edi Rama: Edhe një herë, ta them miqësisht, ta them vëllazërisht, po ta them si kryetari yt, po ta them si Kryeministri yt. Unë jam krenar për çfarë kemi bërë deri më sot. Dhe po ta përsëris ty dhe gjithë të tjerëve: çfarë jemi zotuar në raport me këto çështje, ne do t’i bëjmë. Nuk jemi zotuar t’i bëjmë për 40 ditë, nuk jemi zotuar as t’i bëjmë për 58 ditë. Ne jemi zotuar që do ta bëjmë. Kemi anuluar thuajse të gjitha marrëveshjet dhe koncesionet e dhëna mbas 23 qershorit, që i kemi gjetur gati…

Rama-Doshit: Nuk mund të fus në dogana njerëz me precedentë penalë

Punesimi i njerezve, ne menyre te vecante ne Tatime e Dogana ka qene nje nga ceshtjet e debatit te djeshem ne mbledhjen e Grupit te PS-se.

Deputeti Tom Doshi ka ngritur shqetesimin se Drejtoritë e Doganave dhe Tatimeve janë mbushur me njerëz të PD-së. Rama, ne pergjigje te Doshit ka thene se aty nuk mund të shkojnë kandidatë njerëz me dosje penale, që kur i kërkohet pastaj dëshmia e penalitetit, tërhiqen.
Duke iu referuar denoncimit te opozites, sipas te ciles kreu i Policise ka qene numerues, Rama ka terhequr vemendjen per kujdes.
“Një njeri që të jetë numërues është detyrë qytetare në këtë rast, por kjo është për të kuptuar se ata merren me çdo person, me çdo detaj, në çdo fushë, në çdo zyrë. Ne nuk mund t’ia lejojmë vetes që nga njëra anë ta forcojmë këtë strukturë, nga ana tjetër nuk mund ta katandisim që partnerët ndërkombëtarë të na lënë pa mbështetje”, ka thene Rama

 


No comments: