Aksidenti tragjik, Olldashi po ecte me makinën në marsh automatik

Nga kontrolli autoteknik i makinës “Mercedez Benz S”, me targë AA 003 HN, që drejtohej nga Sokol Olldashi në momentin e aksidentit, ka rezultuar se sistemi i drejtimit dhe i frenimit kanë funksionuar normalisht.

Ndërsa pavarësisht këtij

përfundimi, në asfalt nuk është gjetur asnjë gjurmë frenimi. Por edhe kjo e ka pasur një shpjegim që është dhënë nga eksspertët e Benzit, të cilët janë kërkuar me urdhër të prokurorit që të asistojnë gjatë këqyrjes së automjetit. Sipas verifikimeve të kryera nga aparatura e posaçme e lidhjes me kompjuter, ka rezultuar që makina po drejtohej automatikisht dhe jo mekanikisht nga vetë viktima.

Burime nga grupi hetimor thanë se me aq sa është konstatuar nga këqyrja e makinës, rezulton që Olldashi e ka graduar makinën që të lëvizte me shpejtësi deri në 60 kilometra në orë përgjatë rrugës që ka përshkuar në tunel. Por pasi ka dalë nga tuneli nuk i ka dhënë komandën që ta kthente drejtimin e mjetit në mënyrë mekanike dhe për shkak se rruga vazhdonte me kthesa, automjeti nuk ka frenuar, e duket se Olldashi nuk e ka vënë këmbën në pedalin e frenave. Për këtë arsye nuk janë gjetur as gjurmët e frenimit në asfalt.

Policia ka bërë matjet e nevojshme që nga vendi ku dyshohet se makina ka humbur kontrollin e deri ku ka përfunduar poshtë rrugës, duke rënë përmbys në një rrugë dytësore përkrah varrezave. Sipas ekspertëve, pasi ka dalë nga tuneli, makina ka përshkuar thuajse një kilometër rrugë, derisa ka mbërritur në një kthesë të fortë dhe në një rrugë të pjerrët. Para kthesës nuk kishte tabelë lajmëruese për trajektoren majtas, pasi vazhdimisht vendosen dhe vidhen nga banorët e zonës

KONTROLLI AUTOTEKNIK

Prokurori ka urdhëruar dje këqyrjen e automjetit të aksidentit dhe kryerjen e kontrollit auto-teknik. Makina është zbritur nga karroatreci ku mbahej prej më shumë se 24 orësh te Drejtoria e Policisë së Tiranës dhe është kontrolluar me imtësi për ndonjë defekt, si dhe për të zbuluar të dhënat e sakta për shkakun e aksidentit.

Përveç ekspertëve të policisë, janë thirrur edhe ekspertët e Benz-it, të cilët kanë qenë të pajisur me aparaturat elektronike të posaçme për kontrollin e makinës. Ata kanë bërë lidhjen e sistemit elektronik të makinës me kompjuterin për të parë nëse kishte apo jo ndonjë defekt teknik. Por ajo çfarë u konstatua bëri që edhe ky veprim të mos i ndihmonte shumë ekspertët, pasi për shkak të përplasjes së fortë, sistemi ishte çakorduar dhe kompjuteri nuk ishte në gjendje të përcaktonte shumë të dhëna.

Veprimi i parë që është kryer ka qenë hapja e dyerve, pasi kanë qenë të bllokuara me siguresë, përveç njërës derë që është hapur me forcë në vendngjarje. Gjithashtu është përcaktuar përafërsisht se shpejtësia e mjetit ka qenë 50 deri në 60 kilometra në orë në momentin e aksidentit. Ndërsa ajo që është më kryesorja dhe që ka shkaktuar edhe vdekjen e Olldashit, ka qenë rripi i sigurimit që është gjetur në vend, pasi nuk ishte përdorur nga drejtuesi i mjetit.